[1] Matigi ka wagande ye kalo wolonwula kɛ Filisitikaw ka jamana la.
[2] U ye sarakalasebaaw ni u ka filɛlikɛlaw wele ka olu ɲininka ko: «An ka mun kɛ ni Matigi ka wagande ye? An ka kan ka min kɛ ka a bila ka taa a bɔ yɔrɔ la, aw ka o fɔ.»
[3] U ko: «Ni aw bɛ Israɛl ka Ala ka wagande bila ka taa, aw kana a bila ka taa ni saraka tɛ, nka aw ka jalaki yafa saraka bɔ Matigi ye, o tuma la aw na kɛnɛya, kun min y'a to a bolo digira aw la, aw na o dɔn.»
[4] U ye ɲininkali kɛ ko: «An ka jalaki yafa saraka sifa jumɛn bɔ a ye walisa ka an hɔrɔnya?» O filɛlikɛlaw ko: «Sumuni bisigi duuru dilalen ni sanu ye aniɲinɛ bisigi duuru dilalen ni sanu ye ka kɛɲɛ ni Filisitikaw kuntigiw hakɛ ye, k'a masɔrɔ o sumuniw bɔra aw ni aw kuntigiw bɛɛ la.
[5] Aw ka sumuni bisigiw dila ni sanu ye, ɲinɛ minw bɛ aw ka jamana tiɲɛn, aw ka olu bisigiw dila ni sanu ye fana ka nɔɔrɔ da Israɛl ka Ala kan. A dɔrɔ o na kɛ sababu ye ka a bolo bɔ aw ni aw ka bato fɛnw ani aw ka jamana kan.
[6] Mun na aw bɛ aw dusu gɛlɛya i ko Misirakaw ni Faraon y'a kɛ cogo min na? Matigi bolo digilen kɔ Misirakaw la, u ma Israɛl bɔnsɔn bila ka taa wa?
[7] Ayiwa, aw ka wotoro kura kelen dila ka misi birita fila bɔ, zu ma da minw kan na fɔlɔ. Aw ka wotoro siri u la, aw ka taa ni u denw ye so kɔnɔ.
[8] O kɔ, aw ka Matigi ka wagande ta ka a bila wotoro kɔnɔ. Aw ka kɛsu dɔ sigi a kɛrɛ fɛ, aw ye fɛn minw dila ni sanu ye ka kɛ jalaki yafa saraka ye, ka olu bila o kɔnɔ. O kɔ, aw ka Matigi ka wagande bila ka taa.
[9] Aw k'a filɛ, ni a taara a ka jamana sira fɛ ka se Bɛt-Semɛs, an n'a dɔn ko Matigi de ye nin ko juguba kɛ an na. Ni a ma taa yen, an n'a dɔn ko nin ko juguba kɛra an ma a yɛrɛma, ko ale bolo nɔ tɛ.»
[10] O mɔgɔw y'a kɛ ten. U ye misi birita fila minɛ, zu ma da minw si kan na fɔlɔ, ka wotoro siri olu la ka taa u denw datugu so kɔnɔ.
[11] U ye Matigi ka wagande sigi wotoro kɔnɔ ani o kɛsu niɲinɛ ani sumuni bisigiw.
[12] O misiw sinna ka taa Bɛt-Semɛs sira fɛ. U tun bɛ kasi sira fɛ ka taa. U ma fara ka taa kinin wala numan fɛ. Filisitikaw ka kuntigiw ye u bilasira fo ka taa se Bɛt-Semɛs dancɛ ma.
[13] Bɛt-Semɛskaw tun bɛ alikama kanni la jɛkɛnɛ la. U y'uɲɛw kɔrɔta ka layidu wagande natɔ ye, o yeli ye u nisɔndiya.
[14] Wotoro sera Josue ka foro la Bɛt-Semɛs ka jɔ yen. Farakurun belebeleba dɔ tun bɛ yen. U ye wotoro jiriw karikari ka o misiw kɛ saraka jenita ye Matigi ye.
[15] Levitew ye Matigi ka wagande ni a kɛrɛfɛ kɛsu ni a kɔnɔ fɛn sanumaw jigin ka olu sigi o farakurunba kan. Bɛt-Semɛskaw ye saraka jenita ni nisɔndiya sarakaw bɔ Matigi ye o don na.
[16] Filisitikaw ka kuntigiw ye o ye minkɛ, u kɔseginna ka taa Ekirɔn o don kelen na.
[17] Filisitika minw ye o sanu sumuni bisigiw di Matigi ma ka kɛ u ka jalaki yafa saraka ye, olu ka dugu tɔgɔw filɛ ninw ye: Asdɔd ye kelen di, Gaza kelen, Askalɔn kelen, Gat kelen ani Ekirɔn kelen.
[18] Filisitikaw ka kuntigiw duuru ka duguw ye sanuɲinɛ bisigiw fana di, lamini kogow bɛ Filisitikaw ka dugu minw na ani lamini kogo tɛ minw na, olu bɛɛ sen tun b'a la. Matigi ka wagande sigira farakurunba min kan, o kɛra o kow bɛɛ seere ye. O farakurun bɛ Josue ka foro la Bɛt-Semɛs halibi.
[19] Matigi ye Bɛt-Semɛska dɔw faga, k'a masɔrɔ u ye Matigi ka wagande kɔnɔ filɛ. A ye jama la cɛ biwolonwula faga. Jama bɛɛ kasira. Matigi ye tɔɔrɔba lase u ma.
[20] O tuma la Bɛt-Semɛskaw ko: «Jɔn bɛ se ka jɔ Matigi Ala senumaɲɛ kɔrɔ? Matigi ka wagande na bɔ an ka so ka taa jɔn ka so?»
[21] U ye cidenw bila ka taa Kirjat-Jearim k'a fɔ yenkaw ye ko: «Filisitikaw nana ni Matigi ka wagande ye, a' ye jigin ka na a ta ka taa aw fɛ yen.»