[1] Denmisɛn Samuɛl tun bɛ baara kɛ Matigi ye Eli ɲɛ kɔrɔ. O waati la Matigi tun tɛ kuma mɔgɔ fɛ ko caman, yeli fɛn tun tɛ ye ko caman.
[2] O tuma la Eli tun tɛ yeli kɛ kosɛbɛ, a ɲɛw y'a daminɛ ka fiyen. Don dɔ su fɛ, a dalen tun bɛ a ka yɔrɔ la.
[3] Ala ka fitinɛ tun ma sa fɔlɔ. Layidu wagande senuma tun bɛ yɔrɔ min na Matigi ka so kɔnɔ, Samuɛl dalen tun bɛ yen.
[4] O tuma la Matigi ye Samuɛl wele. O y'a jaabi ko: «Naamu.»
[5] A bolila ka taa Eli kɔrɔ k'a fɔ a ye ko: «Ne filɛ, katuguni i ye ne wele.» Eli y'a jaabi ko: «Ne ma i wele. Taa i da.» Samuɛl taara a da.
[6] Matigi y'a wele ko kura. Samuɛl wulila ka taa Eli kɔrɔ k'a fɔ ko: «Ne filɛ, katuguni i ye ne wele.» Eli y'a jaabi ko: «Ne denkɛ, ne ma i wele, taa i da.»
[7] O y'a sɔrɔ Samuɛl tun ma Matigi dɔn fɔlɔ. Matigi ka kuma tun ma jira a la fɔlɔ.
[8] Matigi ye Samuɛl wele a siɲɛ sabanan la. A wulila ka taa Eli kɔrɔ k'a fɔ a ye ko: «Ne filɛ, katuguni i ye ne wele.» O tuma la Eli y'a ye ko Matigi ye denmisɛn wele.
[9] A y'a fɔ Samuɛl ye ko: «Taa i da. Ni a y'i wele tun, i k'a fɔ ko: ‹Matigi, i ka kuma, i ka jɔn tulo b'a la.›» Samuɛl seginna ka taa a da a dayɔrɔ la.
[10] Matigi taara ka i jɔ yen ka a wele i ko tɔw kɛra cogo min na, ko: «Samuɛl, Samuɛl.» Samuɛl y'a jaabi ko: «I ka kuma, i ka jɔn tulo b'a la.»
[11] Matigi y'a fɔ Samuɛl ye ko: «A filɛ, ne na ko dɔ kɛ Israɛl bɔnsɔn cɛma, mɔgɔ o mɔgɔ mana o mɛn, o na kabakoya.
[12] Ne ye fɛn o fɛn fɔ Eli ka so ko la, ne na o bɛɛ kɛ k'a dafa o don na. Ne n'a daminɛ, ne n'a laban fana.
[13] Eli ye a denw ka tilenbaliya kow dɔn. O de kosɔn ne y'a fɔ a ye ko ne na kiri bi a ka so kan badaa. A denkɛw ye u yɛrɛw kɛ dangadenw ye, a ma u bali o la.
[14] O de kosɔn ne ye ne kali ko Eli ka so ka tilenbaliya tɛna kafari ni saraka wala nili fɛn ye abada.»
[15] Samuɛl dalen tora fo sɔgɔma da fɛ. O kɔ, a ye Matigi ka so daw yɛlɛ. A siranna, a ma o ko yelenw lakali Eli ye.
[16] Nka Eli ye Samuɛl wele k'a fɔ a ye ko: «Ne denkɛ, Samuɛl.» Samuɛl y'a jaabi ko: «Naamu.»
[17] Eli y'a ɲininka ko: «Matigi dun ye mun fɔ i ye? Ne bɛ i deli, i kana foyi dogo ne la. Ni i ma o kow bɛɛ fɔ ne ye k'a dafa, Matigi ka o tɔɔrɔ kow bɛɛ kɛ i la ka dɔ fara a kan.»
[18] O tuma la Samuɛl ye o kow bɛɛ lakali a ye k'a foori. A ma foyi dogo a la. Eli ko: «Matigi don. Min ka di a ye, a ka o kɛ.»
[19] Samuɛl ɲɛnatigɛra. Matigi tun bɛ a fɛ. A ka kuma fɔlen si ma to ni min ma kɛ ka dafa.
[20] Ka bɔ Dan fo ka taa se Beɛr-Seba, Israɛl bɔnsɔn bɛɛ y'a dɔn ko Samuɛl sigira ka kɛ Matigi ka kira ye.
[21] Matigi tora ka a yɛrɛ jira Silo, k'a masɔrɔ Matigi tun bɛ a yɛrɛ jira Samuɛl la Silo ka a ka kumaw fɔ a ye.