[1] Amɔn bɔnsɔn Nakas taara Jabɛs kama Galad jamana la ka daga a da la. Jabɛskaw bɛɛ y'a fɔ Nakas ye ko: «I ka layidu ta an ye, an na baara kɛ i ye.»
[2] Amɔn bɔnsɔn Nakas ye u jaabi ko: «Ne bɛ layidu ta aw ye cogo min na, o filɛ nin ye. An na aw bɛɛ kinin fɛɲɛ ci walisa ka Israɛl bɔnsɔn maloya.»
[3] Jabɛs cɛkɔrɔbaw y'a fɔ a ye ko: «I ka tile wolonwula sarati di an ma, an na ci bila ka taa Israɛl jamana yɔrɔ bɛɛ la. Ni mɔgɔ si ma an tila, an na an yɛrɛw di i ma.»
[4] O cidenw sera Saul ka dugu la Gibea ka o kuma fɔ mɔgɔw ɲɛ na. O tuma la jama bɛɛ kasira kosɛbɛ.
[5] O y'a sɔrɔ Saul ni a ka misiw natɔ don ka bɔ foro la. A ye ɲininkali kɛ ko: «Mun kɛra fo jama bɛɛ bɛ kasi?» Jabɛskaw ye min fɔ, u y'o lakali a ye.
[6] Saul ye o kuma mɛn minkɛ, Ala Ni jiginna a kan. A diminna kosɛbɛ.
[7] A ye misi fila minɛ ka olu tigɛtigɛ ka u ci Israɛl jamana yɔrɔ bɛɛ la cidenw bolo ni lasɔmili kuma ye ko: «Ni mɔgɔ o mɔgɔ ma tugu Saul ni Samuɛl la, o ka misiw na kɛ nin cogo la.» Matigi ɲɛsiran ye Israɛl bɔnsɔn minɛ, u bɛɛ nana i ko cɛ kelen.
[8] Saul ye u bɛɛ jate Bezɛk. Israɛl bɔnsɔn kɛra cɛ waa kɛmɛ saba ye. Juda bɔnsɔn tun ye cɛ waa bisaba ye.
[9] Jabɛs Galadkaw tun ye ciden minw ci, u y'a fɔ olu ye ko: «A' ye taa a fɔ Jabɛs Galadkaw ye ko sini tile gwan fɛ aw na hɔrɔnya.» Cidenw taara o kuma fɔ Jabɛskaw ye. O ye olu nisɔndiya kosɛbɛ.
[10] Jabɛskaw y'a fɔ Amɔn bɔnsɔn ye ko: «Sini an na taa aw fɛ yen, min ka di aw ye, aw ka o kɛ an na.»
[11] Ayiwa, o dugusajɛ Saul ye jama tila bolo saba ye. Sani dugu ka jɛ, u taara Amɔn bɔnsɔn ka daga la ka olu gosi fo ka taa tile gwan. Minw kisira, olu jɛnsɛnna, hali u la mɔgɔ fila ma se ka toɲɔgɔn fɛ.
[12] Jama y'a fɔ Samuɛl ye ko: «Mɔgɔ minw ko Saul tɛ sigi ka kɛ an ka masakɛ ye, olu bɛ min? A' ye o mɔgɔw don an bolo, an ka olu faga.»
[13] Nka Saul ko: «Mɔgɔ si tɛ faga bi, katuguni Matigi ye Israɛl bɔnsɔn kisi bi.»
[14] Samuɛl y'a fɔ u ye ko: «An bɛɛ ka taa Gilgal ka Saul sigi ka kɛ masakɛ ye ko kura.»
[15] Mɔgɔw bɛɛ taara Matigi ɲɛ kɔrɔ Gilgal ka Saul sigi ka kɛ masakɛ ye. U ye nisɔndiya sarakaw faga Matigi ye. O kɔ, Saul ni Israɛl bɔnsɔn jama bɛɛ ye ɲɛnajɛ kɛ yen.