[1] Ayiwa Filisitikaw ye Ala ka wagande minɛ Ebɛn-Ezɛr ka taa n'a ye Asdɔd.
[2] Ala ka wagande minɛlen kɔ fɛ, u taara n'a ye bato fɛn Dagɔn ka so kɔnɔ ka a sigi Dagɔn kɛrɛ fɛ.
[3] O dugusajɛ sɔgɔma da fɛ, Asdɔdkaw wulila tuma min na, u y'a sɔrɔ Dagɔn bira k'a ɲɛ biri Matigi ka wagande kɔrɔ. U ye Dagɔn ta ka a bila a sigi yɔrɔ la.
[4] O dugusajɛ u solila ka taa yen, u y'a sɔrɔ Dagɔn birilen tun bɛ Matigi ka wagande kɔrɔ. A kunkolo ni a bolo fila tigɛlen tun don ka bila da la. U y'a kulukutu sɔrɔ yen.
[5] O de kosɔn Dagɔn ka sarakalasebaaw ni Dagɔn ka so kɔnɔ donbaaw tɛ u sen da Dagɔn ka so dakun na Asdɔd halibi.
[6] Nka Matigi y'a bolo se Asdɔdkaw ma ka u tɔɔrɔ kosɛbɛ ka sumuni bila Asdɔdkaw ni u lamini jamana la.
[7] Asdɔdkaw ye o ye minkɛ, u pɛrenna ko: «Israɛl bɔnsɔn ka Ala ka wagande tɛ to an fɛ yan tun, katuguni a ye a bolo se an ka bato fɛn Dagɔn ma.»
[8] U ye cidenw bila ka Filisitikaw kuntigiw bɛɛ wele ka olu ɲininka ko: «An na mun kɛ ni Israɛl bɔnsɔn ka Ala ka wagande ye?» Kuntigiw ye jaabili kɛ ko: «An ka taa ni Israɛl ka Ala ka wagande ye Gat.» U ye Israɛl ka Ala ka wagande ta ka taa n'a ye.
[9] U selen yen, o yɔrɔ nin bɛɛ, Matigi bolo sera o dugu ma u ka ko kɛlen kosɔn. A ye dugu kɔnɔ mɔgɔw bɛɛ gosi, denmisɛn ni mɔgɔ kɔrɔ, ka sumuni kɛ u la. O kɛra tɔɔrɔba ye.
[10] U taara ni Ala ka wagande ye Ekirɔn. Ala ka wagande sera Ekirɔn tuma min na, Ekirɔnkaw pɛrɛnna ko: «Aw nana ni Israɛl ka Ala ka wagande ye walisa ka an ni an ka mɔgɔw bɛɛ faga.»
[11] U ye Filisitikaw kuntigiw bɛɛ wele k'a fɔ olu ye ko: «Aw ka Israɛl ka Ala ka wagande lasegin a yɔrɔ la. A' ye Israɛl ka Ala ka wagande bila ka taa a ka yɔrɔ la walisa a kana na an ni an ka mɔgɔw bɛɛ faga.» Sayaba kɛra dugu kɔnɔ yɔrɔw bɛɛ la. Ala bolo tun bɛ digi u la ka ta'a fɛ.
[12] Hali minw ma sa, sumuni ye olu tɔɔrɔ. Dugu kɔnɔ mɔgɔw kasikan sera fo sankolo la.