[1] Don dɔ la Saul denkɛ Jonatan y'a fɔ a ka kɛlɛkɛ minan tabaa ye ko: «Filisitika minw bɛ fan dɔ fɛ, an ka taa olu ka daga da la.» Nka a ma foyi fɔ a fa ye.
[2] O y'a sɔrɔ Saul tun bɛ Gibea dan na gerenati sun kɔrɔ Migrɔn. Kɛlɛbolo min tun bɛ Saul fɛ, o tun ye cɛ kɛmɛ wɔɔrɔɲɔgɔn ye.
[3] Efɔd tun bɛ Matigi ka sarakalasebaa Akija kan na Silo. Ale tun ye I-Kabɔd balimakɛ Akitub denkɛ ye. Akitub fa tun ye Fineɛs ye. Fineɛs fa tun ye Matigi ka sarakalasebaa Eli ye min sigilen tun bɛ Silo. Mɔgɔw m'a dɔn ko Jonatan taara.
[4] Jonatan tun b'a fɛ ka taa Filisitikaw ka daga la kulu sira min fɛ, farakurun jamanjan fila tun bɛ yen, kelen bɛ sira fan kelen na, dɔ bɛ sira fan dɔ la. Farakurun kelen tɔgɔ ko Bozɛz, kelen tɔgɔ ko Sɛnɛ.
[5] O kelen tun bɛ saheli yanfan fɛ, Mikmas kuntilenna la, dɔ tun bɛ worodugu yanfan fɛ, Geba kuntilenna la.
[6] Jonatan y'a fɔ a ka kɛlɛkɛ minan tabaa ye ko: «An ka taa bi bolokobaliw ka kɛlɛ daga kan. A dɔrɔ Matigi na u don an bolo, k'a masɔrɔ foyi tɛ Ala kɛɲɛ, a ka se di an ma i ko a b'a di mɔgɔ caman ma cogo min na.»
[7] A ka kɛlɛkɛ minan tabaa ko: «Min ka di i ye, i ka o kɛ. I bɛ taa yɔrɔ min na, ne bɛ taa i fɛ.»
[8] Jonatan ko: «Ayiwa an ka sira minɛ ka taa o mɔgɔw fan fɛ, ka an yɛrɛw jira u la.
[9] Ni u y'a fɔ an ye ko: ‹A' ye aw jɔ fo an ka taa se aw ma,› an na to an jɔyɔrɔ la, an tɛna taa u kama.
[10] Nka ni u ko: ‹A' ye yɛlɛn ka na an fɛ yan,› o tuma la an na yɛlɛn, k'a masɔrɔ Matigi na u don an bolo. O na kɛ an ka taamashyɛn ye.»
[11] O tuma la u fila yɛlɛnna ka taa Filisitikaw ka daga la. Filisitikaw y'a fɔ ko: «Hɛburuw bɔtɔ filɛ u dogo yɔrɔw la.»
[12] Dagala kɛlɛkɛ cɛw pɛrɛnna k'a fɔ Jonatan ni a ka kɛlɛkɛ minan tabaa ye ko: «A' ye yɛlɛn ka na an fɛ yan, fɛn dɔ bɛ an fɛ k'a fɔ aw ye.» Jonatan y'a fɔ a ka kɛlɛkɛ minan tabaa ye ko: «Tugu ne la katuguni Matigi ye u don Israɛl bɔnsɔn bolo.»
[13] Jonatan yɛlɛnna ni a bolow ni a senw ye, a ka kɛlɛkɛ minan tabaa tugura a nɔ fɛ. Filisitikaw bira Jonatanɲɛ, a ka kɛlɛkɛ minan tabaa tugulen tun bɛ a la ka u faga.
[14] Kɛlɛ ko fɔlɔ, Jonatan ni a ka kɛlɛkɛ minan tabaa ye cɛ muganɲɔgɔn faga foroni dɔ la.
[15] Siranba ye Filisitikaw ka dagala mɔgɔw ni u ka jamana mɔgɔw bɛɛ minɛ. Dagala mɔgɔw bɛɛ yɛrɛyɛrɛla, a kɛra i ko dugukolo yɛrɛyɛrɛba. O jatigɛ tun ye Ala nɔ ye.
[16] Saul kɔlɔsibaa minw tun bɛ Gibea Benjamɛn jamana la, olu ye Filisitikaw jama bolitɔ ye ka tunun ka u bɛɛ jɛnsɛnnen ye.
[17] O tuma la Saul y'a fɔ a fɛ mɔgɔw ye ko: «A' ye mɔgɔw dan k'a filɛ ni min bɔra an na.» U ye mɔgɔw dan minkɛ, u y'a ye ko Jonatan ni a ka kɛlɛkɛ minan tabaa tɛ yen.
[18] Saul y'a fɔ Akija ye ko a ka Ala ka wagande madon yen na, k'a masɔrɔ Ala ka wagande tun bɛ Israɛl bɔnsɔn cɛma o don na.
[19] Nka ka Saul to kuma la sarakalasebaaw fɛ, mankan tun bɛ bonya Filisitikaw ka daga la ka ta'a fɛ. Saul y'a fɔ sarakalasebaa ye ko: «A to ten.»
[20] O kɔ, Saul ni a fɛ mɔgɔw ye ɲɔgɔn lajɛ ka u madon ka taa fo kɛlɛ yɔrɔ la. U y'a ye ko Filisitikaw tun b'a la kaɲɔgɔn faga ni npan ye. A kɛra tiɲɛnniba ye.
[21] Heburu minw tun farala Filisitikaw kan ka yaalayaala u fɛ ka kɔrɔ, olu yɛlɛmana ka fara Israɛl bɔnsɔn kan Saul ni Jonatan fɛ.
[22] Israɛl bɔnsɔn minw fana dogolen tun bɛ Efrayim kulu jamana la, olu y'a mɛn ko Filisitikaw bolila, olu farala kɛlɛdenw kan ka Filisitikaw nɔgɛn.
[23] Matigi ye u don Israɛl bɔnsɔn bolo o don na ka u gosi fo ka taa se Bɛt-Avɛn kɔ fɛ.
[24] O don yɛrɛ la Israɛl bɔnsɔn barika bannen tun don kosɛbɛ, katuguni Saul tun y'i kali k'a fɔ ko: «Ni mɔgɔ min ye dumuni kɛ sani wula ka se, sani ne ka ne mɔnɛbɔ ne juguw la, o dangalen bɛ.» O de kosɔn mɔgɔ si ma dumuni si kɛ.
[25] O tuma la mɔgɔw bɛɛ sera tu dɔ ma, di tun bɛ duguma yɔrɔ bɛɛ la.
[26] O tuma la jama bɛɛ sera o yɔrɔ la ka o di ye ko a bɛ woyo, nka mɔgɔ si ma a bolo don a la ka o don a da la katuguni jama tun b'a fɛ ka o kalilikan dafa.
[27] Nka Jonatan tun ma a fa ka kalili ko dɔn, o gɛrɛla a la ka a ka bere nun su o la ka o don a da la k'a dun. O yɔrɔ nin bɛɛ, a ye barika sɔrɔ.
[28] O tuma la mɔgɔ dɔ y'a fɔ a ye ko: «I fa ye kangari da mɔgɔw ye k'a gɛlɛya u ma, ko cɛ min bɛ dumuni kɛ bi, o ye dangaden ye.» Ayiwa mɔgɔw barika banna.
[29] Jonatan y'a jaabi ko: «Ne fa ye mɔgɔw sɛgɛn. A filɛ, ne ye o di nɛnɛ tuma min na, ne ye barika sɔrɔ.
[30] Mɔgɔw ye u juguw ka fɛn minw cɛ, ni mɔgɔ tun ye o dɔw dun, u tun na se sɔrɔ Filisitikaw kan ka tɛmɛn nin kan.»
[31] Ayiwa u ye Filisitikaw gosi o don na k'a daminɛ Mikmas fo ka taa se Ajalɔn. Mɔgɔ sɛgɛnnenw girinna fɛn cɛlenw kan. U ye sagaw ni nturaw ni misidenw minɛ ka olu kan tigɛ duguma ka u sogow dun k'a sɔrɔ u joli ma ban u la.
[33] A fɔra Saul ye ko: «Mɔgɔw b'a la ka Matigi hakɛ ta ka sogo n'a joliɲaaminen dun.» Saul ko: «O ye kan bilali ye. A' ye kabakurunba dɔ kolonkolon ka na ne kɔrɔ yan.»
[34] A ko fana: «A' ye taa mɔgɔw bɛɛ yɔrɔ la ko u bɛɛ ka na ni u ka misiw ni u ka sagaw ye ne sɛgɛrɛ. An ka olu kan tigɛ yan. O kɔ, aw na dumuni kɛ, aw tɛna jurumu kɛ Matigi ɲɛ kɔrɔ ka sogo ni a joli dun.» Mɔgɔw bɛɛ nana ni u bolo baganw ye o su fɛ ka u kan tigɛ o fara kan.
[35] Saul ye saraka bɔlan jɔ Matigi ye ka o kɛ a ka saraka bɔlan fɔlɔ ye Matigi ye.
[36] O kɔ, Saul ko: «A' ye jigin ka na, an ka taa Filisitikaw nɔ fɛ bi su in na ka u kɛlɛ ka u bolo fɛnw cɛ fo ka taa dugu jɛ. An kana hali mɔgɔ kelenɲɛnama to.» U ko: «Min ka di i ye, i ka o kɛ.» O tuma la sarakalasebaa ko: «An ka gɛrɛ Ala la yan.»
[37] Saul ye Ala ɲininka ko: «Ne ka jigin ka taa Filisitikaw nɔ fɛ bi su in na wa? I na u don Israɛl bɔnsɔn bolo wa?» Nka Ala ma a jaabi o don na.
[38] Saul ko: «Kuntigiw, aw bɛɛ ka gɛrɛ yan na, an k'a sɛgɛsɛgɛ k'a filɛ nin jurumu kɛra cogo min na bi.
[39] Israɛl Kisibaa, Matigi ɲɛnama tɔgɔ kosɔn, hali ni a kɛra ne denkɛ Jonatan nɔ ye, a na sa, siga t'a la.» Nka jama la mɔgɔ si m'a jaabi.
[40] O tuma la, a y'a fɔ Israɛl bɔnsɔn bɛɛ ye ko: «Aw bɛɛ ka aw jɔ fan kelen na, ne ni ne denkɛ Jonatan na jɔ fan kelen na.» Jama ye Saul jaabi ko: «Min ka di i ye, i ka o kɛ.»
[41] Saul y'a fɔ Matigi ye ko: «Israɛl ka Ala, i ka tiɲɛ jira an na.» Jonatan ni Saul jirala. Jama hɔrɔɲara.
[42] Saul ko u ka kala da ale ni a denkɛ Jonatan cɛ. Jonatan jirala.
[43] Saul y'a fɔ Jonatan ye ko: «I ye min kɛ, o fɔ ne ye sa!» Jonatan ko: «Ne ye ne ka bere nun don di la ka ne bolo da o la ka o dɔɔnin dun. Ayiwa, ne sɔnna saya ma.»
[44] Saul y'a fɔ a ye ko: «Ala ka o ko lase ne ma ni Jonatan ma faga.»
[45] Mɔgɔw bɛɛ y'a fɔ Saul ye ko: «Jonatan min ye nin kisili koba kɛ Israɛl cɛma, o ka sa wa? Ayi dɛrɛ. Matigi ɲɛnama tɔgɔ kosɔn, hali a kunsigi kelen tɛna bi duguma, katuguni ale ni Ala ye baara kɛɲɔgɔn fɛ bi.» Ayiwa mɔgɔw ye Jonatan kisi, a ma sa.
[46] O kɔ, Saul ye Filisitikaw nɔgɛnni dabila. Filisitikaw taara u ka jamana la.
[47] Saul sigilen kɔ ka kɛ Israɛl bɔnsɔn ka masakɛ ye, a ye u juguw kɛlɛ u fan bɛɛ la, Moab bɔnsɔn ni Amɔn bɔnsɔn ni Edɔm ni Zoba masakɛw ani Filisitikaw. A taara yɔrɔ o yɔrɔ, a ye se sɔrɔ.
[48] A y'a mɔnɛbɔ. A y'a ka se jira Amalɛk bɔnsɔn ta fan fɛ ka Israɛl kisi a bolo fɛn cɛbaaw ma.
[49] Saul denkɛw tun ye Jonatan ni Jisivi ani Malkisua ye. A denmusow tɔgɔ ko Merab, o dɔgɔmuso tɔgɔ ko Mikal.
[50] Saul muso tɔgɔ ko Akinoam, o tun ye Akimaz denmuso ye. A ka kɛlɛbolo kuntigi tɔgɔ ko Abinɛr, o tun ye Ner denkɛ ye, Saul fa dɔgɔkɛ denkɛ don.
[51] Saul fa Kis ni Abinɛr fa Ner tun ye Abiɛl denkɛw ye.
[52] Kɛlɛ tun bɛ Filisitikaw ni Saul cɛ Saul si bɛɛ la. Ni Saul tun ye cɛ farinma wala cɛ ja gɛlɛn dɔ ye tuma o tuma, a tun bɛ o minɛ k'a kɛ kɛlɛkɛ cɛ dɔ ye.