[1] Cɛ dɔ tun bɛ Benjamɛn bɔnsɔn na, o tɔgɔ ko Kis. Kis fa tun ye Abiɛl ye. Abiɛl fa tun ye Zeror ye. Zeror fa tun ye Bekorat ye. Bekorat fa tun ye Afiak ye. Afiak fa tun ye Benjamɛn bɔnsɔn dɔ ye. Cɛ ja gɛlɛn tun don.
[2] Denkɛ kelen tun bɛ ale fɛ, o tɔgɔ ko Saul. Kamalenɲuman tun don. Kamalen si tun tɛ Israɛl bɔnsɔn cɛma min tun b'a bɔ cɛɲɛ la. Mɔgɔ tɔw bɛɛ tun bɛ dan a kamankun na.
[3] Don dɔ la, Saul fa Kis ka faliw tununna. Kis y'a fɔ a denkɛ Saul ye ko: «I ka ne ka baaraden dɔ ta i fɛ ka taa an ka faliw ɲini.»
[4] U ye Efrayim kulu jamana yaalayaala ka Salisa jamana yaala, u ma u ye. U ye Salim jamana cɛ tigɛ ka Benjamɛn jamana fana cɛ tigɛ. U ma u ye o si la.
[5] U selen Zuf jamana la, Saul y'a fɔ a nɔfɛ baaraden ye ko: «Na, an ka kɔsegin walisa ne fa kana miiri an ko la ka faliw to yen.»
[6] Baaraden y'a jaabi ko: «A filɛ, Ala ka cɛ dɔ bɛ nin dugu kɔnɔ. Mɔgɔba don. A bɛ fɛn o fɛn fɔ, o bɛɛ bɛ kɛ. Ayiwa an ka taa yen, a dɔrɔ a na an taa sira jira an na.»
[7] Saul y'a fɔ a ka baaraden ye ko: «Nka ni an taara, an na mun di o cɛ ma? An ka sirafanaw banna ka bɔ an ka bɔrɛw kɔnɔ, fɛn si tɛ an bolo ka di Ala ka cɛ ma. Mun tora an bolo?»
[8] Baaraden ye kuma ta k'a fɔ Saul ye ko: «Warijɛ sikle tila naaninan bɛ ne bolo. Ne na o di Ala ka cɛ ma, walisa a ka an taa sira jira an na.»
[9] A tun bɛ deli ka kɛ tan Israɛl bɔnsɔn cɛma. Ni i tun bɛ taa Ala ɲininka, u tun b'a fɔ ko: «A' ye na an ka taa yelikɛla yɔrɔ la.» Katuguni min bɛ wele ko kira, o tun bɛ wele ko yelikɛla o waati la.
[10] Saul y'a fɔ a ka baaraden ye ko: «I ka miirili ka ɲi. Ayiwa an ka taa.» Ala ka cɛ tun bɛ dugu kɔnɔ yɔrɔ min na, u taara yen.
[11] Ka u yɛlɛntɔ to ka taa dugu kɔnɔ, u ni npogotigi dɔw bɛnna, olu tun bɛ taa ji ta. U ye olu ɲininka ko: «Yala yelikɛla bɛ yan wa?»
[12] O npogotigiw ye u jaabi ko: «A filɛ aw ɲɛ fɛ. Nka a' ye aw tɛliya k'a masɔrɔ a nana dugu kɔnɔ bi, sabu mɔgɔw bɛ saraka bɔ batoli kɛ yɔrɔ.
[13] Aw dontɔ dugu kɔnɔ, aw na a ye sani a ka yɛlɛn ka taa dumuni kɛ yɔrɔ la. Mɔgɔw tɛna dumuni kɛ sani a ka se yen, katuguni ale ka kan ka dubaw kɛ sarakaw kosɔn, o kɔ, mɔgɔ welelenw bɛ dumuni kɛ. Ayiwa a' ye yɛlɛn sisan ka taa, aw na a sɔrɔ yen yɛrɛ.»
[14] U yɛlɛnna ka taa fo dugu kɔnɔ. U ni Samuɛl bɔtɔ bɛnna, ko a bɛ taa batoli kɛ yɔrɔ.
[15] O y'a sɔrɔ Matigi tun y'i jira Samuɛl la tile kelen sani Saul ka se yen,
[16] ko: «Siniɲan tuma, ne na Benjamɛn bɔnsɔn cɛ dɔ jira i la. I ka o mun ka kɛ ne ka siya Israɛl kuntigi ye. O na ne ka mɔgɔw tila ka bɔ Filisitikaw bolo, katuguni ne ye neɲɛ jɔ ne ka mɔgɔw la. U kasikan sera fo ne ma.»
[17] Samuɛl ye Saul ye minkɛ, Matigi y'a fɔ a ye ko: «Ne tun ye cɛ min ko fɔ i ye, nin yɛrɛ don, sabu ale de na ne ka mɔgɔw mara.»
[18] Saul y'i madon Samuɛl la dugu donda la k'a fɔ a ye ko: «Ne b'i deli, i ka yelikɛla ka yɔrɔ jira ne la.»
[19] Samuɛl ye Saul jaabi ko: «Ne yɛrɛ ye yelikɛla ye. I ka yɛlɛn ka taa batoli kɛ yɔrɔ la. Aw na dumuni kɛ ne fɛ yen bi. Sini sɔgɔma ne na i bila ka taa ka i kɔnɔna kow bɛɛ fɔ i ye.
[20] Aw ka fali minw tun tununna, ni bi ye o tile saba ye, i kana i yɛrɛ tɔɔrɔ o kosɔn, u yera. Ayiwa, Israɛl bɔnsɔn ka fɛnw bɛɛ laɲuman na kɛ jɔn ta ye? I m'a dɔn ko o ye e ni i fa ka so ta ye wa?»
[21] Saul ko: «Ne tɛ Benjamɛn bɔnsɔn ye wa? O ye Israɛl siyaw bɛɛ la dɔgɔmanni ye. Ne ka gwa ye Benjamɛn siya ka gwaw bɛɛ la dɔgɔmanni ye. Mun na i bɛ nin kuma fɔ ne ye?»
[22] Samuɛl taara ni Saul ni a ka baaraden ye ka don ni u ye bon kɔnɔ ka dumuni kɛ yɔrɔ la sigi yɔrɔ fɔlɔw di u ma mɔgɔ welelenw cɛma, olu tun ye mɔgɔ bisabaɲɔgɔn ye.
[23] O tuma la Samuɛl y'a fɔ tobilikɛla ye ko: «Ne tun y'a fɔ ko i ka dumuni min bila kɛrɛ fɛ, i ka na ni o ye sisan.»
[24] Tobilikɛla nana ni o sogo woro ye ka o sigi Saul kɔrɔ. Samuɛl ko: «Fɛn min tun bilara i ɲɛ, o filɛ. I k'a dun. Ne ye o mara nin kosɔn kabini ne ye mɔgɔw wele waati min na.» Ayiwa Saul ye dumuni kɛ Samuɛl fɛ o don na.
[25] O kɔ, u jiginna ka bɔ batoli kɛ yɔrɔ la ka taa dugu kɔnɔ. Samuɛl taara ni Saul ye so kun na.
[26] O dugusajɛ sani kɛnɛ ka tigɛ, Samuɛl ye Saul wele a ka so san fɛ k'a fɔ a ye ko: «I ka wuli, ne na i bilasira.» Saul wulila, a ni Samuɛl fila bɛɛ bɔra.
[27] U selen dugu dan na, Samuɛl y'a fɔ Saul ye ko: «I k'a fɔ i ka baaraden ye ko a ka taa anɲɛ.» Baaraden taara u ɲɛ. Samuɛl ko: «Ayiwa, sisan i ka i jɔ. Matigi ye kuma min fɔ, ne b'a fɛ ka o fɔ i ye.»