[1] Saul salen kɔ, Dawuda kɔseginna ka bɔ Amalɛk bɔnsɔn faga yɔrɔ la ka tile fila kɛ Ziklag.
[2] A tile sabanan don, mɔgɔ dɔ nana ka bɔ Saul ka daga la. O ka finiw faralen tun don, a kunkolo jɛlen tun bɛ buguri la. O selen Dawuda fɛ yen, a ye i bi k'a ɲɛ biri duguma.
[3] Dawuda y'a fɔ a ye ko: «I bɔra min?» A ye Dawuda jaabi ko: «Ne kisira ka bɔ Israɛl bɔnsɔn ka daga la.»
[4] Dawuda y'a fɔ a ye ko: «Mun dun kɛra yen? I ka o lakali ne ye.» O cɛ ko: «Mɔgɔw bɛɛ bolila ka bɔ kɛlɛ daga la. U la mɔgɔ caman sara yɛrɛ. Saul ni a denkɛ Jonatan fana fagara.»
[5] Kamalen min ye o kibaru fɔ, Dawuda ye o ɲininka ko: «I y'a dɔn cogo di ko Saul ni a denkɛ Jonatan fagara?»
[6] Kamalen ko: «Ne yaalatɔ sera Gilboa kulu kan, ne ye Saul sinsinnen ye a ka tama kan. Wotorotigiw ni sotigiw gunna a la.
[7] A ye a kɔ filɛ ka ne ye ka ne wele, ne ko: ‹Naamu.›
[8] A y'a fɔ ne ye ko: ‹I ye jɔn ye?› Ne y'a jaabi ko ne ye Amalɛk bɔnsɔn dɔ ye.
[9] O tuma la a ko ne ka gɛrɛ a la ka a faga, k'a masɔrɔ diminba bɛ a la k'a to ni la.
[10] O tuma la ne ye ne madon k'a faga, sabu ne y'a dɔn ko a tɛna kisi ka bɔ o bana la. O kɔ, ne y'a ka masafugula bɔ a kun na k'a bolokala la nɛgɛ bɔ a bolo la ka na ni olu ye ne matigi fɛ yan.»
[11] O tuma la Dawuda ye a ka dulɔkiba fara, a fɛ mɔgɔw fana ye u taw fara.
[12] U dusu kasilen ye su kasi kɛ ka sun don fo wula da fɛ Saul ni a denkɛ Jonatan ani Matigi ka jama ni Israɛl ka so kosɔn, katuguni u fagara npan fɛ.
[13] Dawuda y'a fɔ o kibaru fɔbaa kamalen ye ko: «I bɔra min?» A ko: «Ne ye Amalɛk bɔnsɔn siginfɛ dɔ den ye.»
[14] Dawuda y'a fɔ o kamalen ye ko: «Mun y'a to i ma siran Matigi ka munlen fagali ɲɛ?»
[15] O kɔ, Dawuda y'a fɛ mɔgɔw la kelen wele k'a fɔ o ye ko: «I gɛrɛ nin cɛ la k'a faga.» O cɛ ye Amalɛk bɔnsɔn gosi k'a faga.
[16] Dawuda ko: «I joli hakɛ bɛ i yɛrɛ kun. I da kɛra i yɛrɛ seere ye sabu i y'a fɔ ko: ‹Ne de ye Matigi ka munlen faga.›»
[17] Ayiwa Dawuda ye Saul ni a denkɛ Jonatan su kasi,
[18] k'a fɔ ko Juda bɔnsɔn ka dege bonnikɛla ka dɔnkili la, o sɛbɛnnen bɛ Jusite ka kitabu la, ko:
[19] «E Israɛl, i nɔɔrɔ fagara i ka tintinw kan. U ye cɛ ja gɛlɛnw labi.
[20] O kana fɔ Gat dugu kɔnɔ, o welewele kana da Askalɔn dugu bɔlɔnw la, walisa Filisitikaw denmusow kana nisɔndiya, walisa o bolokobaliw denmusow kana ɲagali ka u panpan.
[21] «Aw Gilboa kuluw, ngomi kana da aw kan, sanji kana bi aw kan tun, suman kura bɛɛ kun fɔlɔ saraka bɛ sɔrɔ foro minw la, olu kana sɔrɔ yen tun, k'a masɔrɔ fangatigi ka nɛgɛ bɛnnan ma bonya sɔrɔ yen. Saul ka nɛgɛ bɛnnan tɛna mun ni tulu ye tun.
[22] Jonatan ka kala ma taa kɛlɛ la ni a ma joginni kɛ ka joli bɔn. A ka biɲɛ ye kɛlɛkɛ cɛ ja gɛlɛnw sɔgɔ. Saul ka npan ma segin kɔ ni a ma a juguw gosi.
[23] Saul ni Jonatan ye ɲɔgɔn kanu u si bɛɛ la, u ma fara ka bɔ ɲɔgɔn na u sa tuma la. U tun ka tɛli ka tɛmɛn bɔn kan, u barika tun ka bon waraba ta ye.
[24] Israɛl denmusow, aw ka Saul su kasi, ale de ye fini saramaw di aw ma ka sanu masiri fɛnw kɛ ka aw ka dulɔkiw masiri.
[25] Cɛ ja gɛlɛnw bira kɛlɛ cɛmancɛ la, Jonatan su dalen bɛ tintinw kan.
[26] «Ne balimakɛ Jonatan, ne dusu kasilen bɛ i kosɔn. I kɛra ne teri sɛbɛ ye. I ka kanuya tun ye kabako ye ne ta fan fɛ, a tun ka bon ni musow kanuya ye.
[27] Cɛ ja gɛlɛnw bira, u ka kɛlɛkɛ minanw tiɲɛnna ka ban.»