[1] O kɔ tile saba, Dawuda ni a nɔfɛ cɛw sera Ziklag. U y'a sɔrɔ Amalɛk bɔnsɔn taara bi Juda bɔnsɔn jamana worodugu yanfan kan ka Ziklag jeni ni tasuma ye,
[2] ka a kɔnɔ musow ni u ka fɛnw bɛɛ cɛ, fɛn misɛnw ni fɛnbaw. U ma mɔgɔ si faga nka u seginna u ka so tuma min na, u taara olu bɛɛ kɛ jɔnw ye.
[3] Dawuda ni a fɛ cɛw sera dugu kɔnɔ tuma min na, u y'a sɔrɔ a jenina, u musow ni u denkɛw ni u denmusow bɛɛ cɛra ka taa jɔnya la.
[4] O tuma la Dawuda ni a nɔfɛ cɛw kasira kosɛbɛ fo ka u kan sisi.
[5] Dawuda muso fila, Jizreɛl Akinoam ani Karmɛl Abigail, Nabal muso kɔrɔ, olu fana minɛna.
[6] Dawuda dusu kasira kosɛbɛ katuguni a fɛ cɛw tun b'a fɛ k'a bon ni kabakurun ye sabu u dusukun tɔɔrɔlen tun don u denkɛw ni u denmusow minɛli kosɔn, nka Dawuda ye barika sɔrɔ Matigi a ka Ala fɛ.
[7] Dawuda y'a fɔ Akimelɛk denkɛ Abiatar ye ko: «Ne bɛ i deli ko i ka na ni efɔd ye ne fɛ yan.» Abiatar taara ni efɔd ye Dawuda fɛ yen.
[8] Dawuda ye Matigi ɲininka ko: «Yala ne ka mɔgɔw nɔgɛn wa? Ne na kun u la wa?» Matigi y'a jaabi ko: «I labɛn ka u nɔgɛn, siga t'a la i na se sɔrɔ u kan ka mɔgɔ cɛlenw tila ka bɔ u bolo.»
[9] O tuma la Dawuda ni a fɛ cɛw kɛmɛ wɔɔrɔ wulila ka u nɔgɛn. U taara se Besɔr kɔji da la. Kɔfɛ mɔgɔw tora yen.
[10] Dawuda ni cɛ kɛmɛ naani tugura Amalɛk bɔnsɔn nɔ fɛ. Cɛ kɛmɛ fila tora kɔ da la yen sabu u sɛgɛnnen tun don, u ma se ka Besɔr kɔ tigɛ.
[11] Dawuda fɛ cɛw ni Misiraka cɛ dɔ bɛnna kungo kɔnɔ. U taara n'a ye Dawuda yɔrɔ. U ye dumuni ni ji di a ma, a ye dumuni kɛ ka i min.
[12] U ye toro mɔlen kun dɔ ani rezɛn mɔ tusuu fila di a ma. A ye dumuni kɛ ka barika sɔrɔ, k'a masɔrɔ a tun ma dumuni wala minni kɛ tile saba ni su saba kɔnɔ.
[13] Dawuda ye o cɛ ɲininka ko: «I ye jɔn ye, i bɔra min?» Cɛ ko: «Ne ye Misiraka ye, ne ye Amalɛk bɔnsɔn dɔ ka jɔn ye, nka ne makɛ taara ka ne to yan, o tile saba ye bi ye sabu ne tun man kɛnɛ.
[14] An taara tiɲɛnni kɛ Juda worodugu yanfan ni Kalɛb ka yɔrɔ fan fɛ ka Ziklag jeni.»
[15] Dawuda y'a fɔ a ye ko: «I bɛ sɔn ka taa ni ne ye o kɛlɛdenw yɔrɔ la wa?» O cɛ ko: «I kali Ala la ne ye ko i tɛna ne faga wala ka ne don ne makɛ bolo. Ni o kɛra, ne na taa ni i ye o kɛlɛdenw yɔrɔ la.»
[16] O Misiraka ye u ɲɛ minɛ ka taa. U taara k'a sɔrɔ Amalɛk bɔnsɔn fɛnsɛnen bɛ kungokolon yɔrɔ bɛɛ la ka dumuni kɛ ka minni kɛ ka u ɲɛnajɛ o fɛn cɛlenw kosɔn, ka bɔ Juda jamana ani Filisiti jamana la.
[17] Dawuda ye u tiɲɛn kabini sɔgɔma fo o dugusajɛ wula da fɛ. U si ma dan kɛ fɔ kamalen kɛmɛ naani minw yɛlɛnnaɲaamɛw kan ka boli.
[18] Amalɛk bɔnsɔn tun ye fɛn minw cɛ, Dawuda ye o bɛɛ minɛ ka a muso fila fana minɛ.
[19] U ka mɔgɔ si ma tunun, denmisɛn fara mɔgɔ kɔrɔ kan, denkɛ wala denmuso. U ka fɛn cɛlen misɛnman ni kunbaba si fana ma tunun. Amalɛk bɔnsɔn tun ye fɛn minw cɛ, Dawuda ye olu bɛɛ minɛ tun.
[20] Dawuda taara ni o bɛɛ ye, a ye bagan misɛnw ni bagan kunbabaw fana minɛ. A fɛ cɛw taara o fɛn cɛlenw ɲɛ fɛ k'a fɔ ko: «Dawuda ka fɛn cɛlenw filɛ.»
[21] Cɛ kɛmɛ fila minw sɛgɛnnen tun bɛ taama fɛ, ni u tun ye olu to Besɔr kɔ da la, Dawuda seginna ka na olu yɔrɔ. Olu taara ka Dawuda ni a fɛ mɔgɔw kunbɛn. Dawuda gɛrɛla u la ka u fo.
[22] Nka mɔgɔ juguw ni mɔgɔ kunntan minw tun bɛ Dawuda fɛ mɔgɔw cɛma, olu ko: «K'a sɔrɔ ninw ma taa an fɛ, an tɛna niyɔrɔ si di u ma fɛn cɛlenw la fɔ u musow ni u denw dɔrɔn. U ka olu ta ka taa ni u ye.»
[23] Nka Dawuda ko: «Matigi ye fɛn minw di an ma, ne balimaw, aw kana o kɛ ten. O mɔgɔ minw nana an kama, a ye olu don an bolo.
[24] Ayiwa jɔn na sɔn aw ka kuma fɔlen ma? Mɔgɔ minw taara kɛlɛ la ani minw ye minanw kɔlɔsi, olu bɛɛ niyɔrɔ ka kan. O fɛnw na tilatila u bɛɛ cɛ.»
[25] Kabini o don na, Dawuda ye o sariya sigi Israɛl bɔnsɔn bɛɛ kan fo ka na se bi ma.
[26] O tuma la Dawuda kɔseginna Ziklag. A ye o fɛn cɛlen dɔw sama a terikɛw Juda cɛkɔrɔbaw ma k'a fɔ u ye ko: «Aw sama filɛ ninw ye ka bɔ Matigi juguw ka fɛn cɛlenw la.»
[27] A ye dɔ ci Bɛtɛlkaw ni worodugu yanfan Ramɔtkaw ni Jatirkaw
[28] ni Aroɛrkaw ni Sifmɔtkaw ni Estemoakaw
[29] ni Rakalkaw ni Jerakmeɛl ka dugu mɔgɔw
[30] ni Hormakaw ni Kor-Asankaw ni Atakkaw ma,
[31] ka dɔ ci Heborɔnkaw ma ka dɔ ci Dawuda ka mara yɔrɔw bɛɛ ma, a ni a fɛ cɛw tun bɛ yaalayaala yɔrɔ minw na, a ye dɔ ci olu bɛɛ ma.