[1] Samuɛl ye tulu minan ta ka o bɔn Saul kun na, ka a da susu k'a fɔ a ye ko: «A filɛ, nin munli y'a jira ko Matigi ye i ɲɛnatɔmɔ ka sigi ka kɛ a ciyɛn marabaa ye.
[2] Ni i bɔra ne fɛ yan bi, i ni mɔgɔ fila na bɛn Rasɛl kaburu yɔrɔ la Benjamɛn bɔnsɔn ka dugukolo dancɛ la Zelzak. Olu n'a fɔ i ye ko i tun taara fali minw ɲini, olu yera. I fa tɛ miiri faliw ko la tun, a bɛ hami e de ko la, ko a na mun kɛ walisa ka a denkɛ ye.
[3] Ni i bɔra yen ka taa ɲɛ, i na se sensun kɔrɔ Tabɔr. Aw ni cɛ saba na bɛn, olu bɛ taa Ala bato Bɛtɛl. Baden saba bɛ kelen bolo, buurukun saba bɛ kelen bolo, diwɛn foroko bɛ sabanan bolo.
[4] U na i fo ka buurukun fila di i ma. I ka sɔn ka olu minɛ u bolo.
[5] O kɔ, i na se Gibea-Elohim. Filisitikaw ka kɛlɛ daga kelen bɛ yen. N'i sera yen, i dontɔ dugu kɔnɔ, i ni kira jamakulu dɔ na bɛn. U jigintɔ don ka bɔ batoli kɛ yɔrɔ la. U bɛ nkɔni ni dunun fɔ ka file fyɛ ani ka npɔlɔn fana fɔ. U bɛ kiraya kɛ.
[6] Matigi Ni na jigin i kan. I na kiraya kɛ olu fɛ. I na yɛlɛma ka kɛ mɔgɔ sifa wɛrɛ ye.
[7] Ni i ye o taamashyɛnw ye tuma min na, i ka o kɛ, sabu Ala bɛ i fɛ.
[8] O kɔ, i ka jigin ka taa neɲɛ Gilgal, ne na i kunbɛn yen ka taa saraka jenitaw ni nisɔndiya sarakaw bɔ yen. I na tile wolonwula kɛ ka ne makɔnɔ sani ne ka se yen. O tuma la i ka kan ka min kɛ, ne na i kalan o la.»
[9] O yɔrɔ nin bɛɛ, Saul y'i kɔ don Samuɛl la ka taa. Ala ye dusukun wɛrɛ di a ma. O taamashyɛnw bɛɛ kɛra o don kelen na ka dafa.
[10] U selen Gibea, u ni kira jama bɛnna. Matigi Ala Ni jiginna Saul kan, a ye kiraya kɛ u cɛma.
[11] Minw bɛɛ tun y'a dɔn ka kɔrɔ, olu y'a ye ko a bɛ kiraya kɛ kira tɔw fɛ, olu ye ɲɔgɔn ɲininka ko: «Mun kɛra Kis denkɛ la? Saul fana kɛra kiraw dɔ ye wa?»
[12] Gibeaka dɔ ko: «U fa ye jɔn ye?» Nin ntalen dara o yɔrɔ la ko: «Saul fana kɛra kiraw dɔ ye wa?»
[13] Saul tilalen kɔ kiraya kɛli la, a taara batoli kɛ yɔrɔ la.
[14] Saul binaakɛ ye a ni a ka baaraden ɲininka ko: «Aw tun taara min?» Saul ko: «An tun taara an ka faliw ɲini, an ma u ye, an taara Samuɛl ɲininka.»
[15] Saul binaakɛ ko: «Samuɛl ye min fɔ aw ye, i ka o fɔ ne ye.»
[16] Saul ye a binaakɛ jaabi ko: «A y'a fɔ an ye k'a jɛya ko faliw yera.» Nka Samuɛl ye masaya ko min fɔ a ye, a ma o fɔ a binaakɛ ye.
[17] Samuɛl ye mɔgɔw bɛɛ wele ka taa Matigi ɲɛ kɔrɔ Mizpa,
[18] k'a fɔ Israɛl bɔnsɔn ye ko: «Matigi, Israɛl ka Ala ko: ‹Ne ye aw labɔ Misira jamana la ka aw tila ka bɔ Misirakaw bolo, ka aw tila ka bɔ masakɛ wɛrɛw bolo, olu minw ye aw tɔɔrɔ.›
[19] Nka aw banna aw ka Ala la bi, o min ye aw tila ka bɔ aw ka tɔɔrɔ kow ni aw ɲɛni kow bɛɛ la. Aw y'a fɔ ko a ka masakɛ dɔ sigi aw kun na. Ayiwa sisan, aw ka siyaw ni aw ka gwaw ka na Matigi ɲɛ kɔrɔ.»
[20] Ayiwa Samuɛl ye Israɛl siyaw bɛɛ madon Matigi ɲɛ kɔrɔ. Benjamɛn bɔnsɔn jirala.
[21] A ye Benjamɛn siya madon ka kɛɲɛ ni u ka gwaw ye Matigi ɲɛ kɔrɔ. Matiri ka gwa jirala. O kɔ, Kis denkɛ Saul jirala. U y'o ɲini, nka u ma a ye.
[22] O tuma la u ye Matigi ɲininka ko kura ko: «Mɔgɔ wɛrɛ bɛ yen min tun ka kan ka na wa?» Matigi ko: «A dogolen filɛ minanw cɛma.»
[23] U bolila ka taa ka na ni Saul ye k'a jɔ jama cɛma. A tun ka jan ni mɔgɔw bɛɛ ye.
[24] Samuɛl y'a fɔ mɔgɔw ye ko: «Matigi ye cɛ min ɲɛnatɔmɔ, a' ye o filɛ. A bɔɲɔgɔnko si tɛ jama la.» Jama bɛɛ pɛrɛnna ko: «Masakɛ ka si sɔrɔ badaa.»
[25] Masakɛ ka kan ka min kɛ ani a ka sariyaw, Samuɛl ye o bɛɛ fɔ mɔgɔw ye ka u bɛɛ sɛbɛn kitabu la ka o bila Matigi ɲɛ kɔrɔ. O kɔ, a ye jama bɛɛ labila ka taa u ka yɔrɔw la.
[26] Saul fana taara a ka so Gibea. Cɛ ja gɛlɛn dɔw taara a fɛ, Ala tun ye baara kɛ olu dusukunw na.
[27] O bɛɛ n'a ta mɔgɔ kunntan dɔw y'a fɔ ko: «Nin bɛ se ka an kisi cogo di?» U y'a mafiɲɛya, u ma nili fɛn di a ma, nka Saul ma o jate.