[1] O kɔ, Dawuda bɔra yen ka taa a dogo yɔrɔw la En-Gedi.
[2] Saul nalen ka bɔ Filisitikaw nɔ fɛ, a fɔra a ye ko: «Dawuda filɛ En-Gedi kungoba kɔnɔ.»
[3] Saul ye cɛ waa sabaɲɛnatɔmɔlen minɛ ka bɔ Israɛl bɔnsɔn cɛma ka tugu Dawuda ni a nɔfɛ cɛw nɔ fɛ ka u ɲini fo ka taa se kungokɔnɔbaw dogo yɔrɔw la.
[4] A taara se saga sulu ma sira da la, kuluwo tun bɛ yen. Saul donna kuluwo kɔnɔ ko a bɛ banakɔ taa kɛ. O y'a sɔrɔ Dawuda ni a nɔfɛ cɛw tun bɛ kuluwo ju la.
[5] Dawuda fɛ cɛw y'a fɔ a ye ko: «Matigi ye don min fɔ i ye ko a na i jugu don i bolo, o selen filɛ. Min ka di i ye, o kɛ a la.» Nka Dawuda wulila nɛmɛnɛmɛ ka Saul ka dulɔkiba senkɔrɔlan tigɛ.
[6] O kɔ, Dawuda dusukun y'a yɛrɛ jalaki masakɛ ka dulɔkiba senkɔrɔlan tigɛli la.
[7] A y'a fɔ a nɔfɛ cɛw ye ko: «Matigi ka ne kisi ko jugu kɛli ma ne matigi la ka ne bolo se Saul ma. Ala ma an kisira o ma, sabu Matigi ka munlen don.»
[8] Dawuda ye o kuma fɔ ka a nɔfɛ cɛw bali, u kana ko jugu kɛ Saul la. Saul wulila ka bɔ kuluwo kɔnɔ ka sira minɛ ka taa.
[9] Dawuda fana wulila ka bɔ kuluwo kɔnɔ ka Saul wele k'a fɔ a ye ko: «E masakɛ, ne matigi.» Saul y'i kɔ filɛ. Dawuda ye a ɲɛ biri duguma ka Saul bonya.
[10] Dawuda y'a fɔ Saul ye ko: «Mɔgɔ minw b'a fɔ i ye ko Dawuda b'a fɛ ka i faga, mun y'a to i bɛ i tulo majɔ olu ka kumaw la?
[11] A filɛ, i bɛ se k'a ye i yɛrɛɲɛ la ko Matigi tun ye i don ne bolo kuluwo kɔnɔ bi. I fagali ko tun fɔra, nka ne ye i tila k'a fɔ ko ne tɛna ne bolo se i ma, k'a masɔrɔ Matigi ye i ɲɛnatɔmɔ ka kɛ masakɛ ye.
[12] A filɛ, ne fa, i ka dulɔki senkɔrɔlan tigɛlen filɛ ne bolo. Ne ye i ka dulɔki senkɔrɔlan tigɛ, sabu ne tun t'a fɛ ka i faga. I k'a dɔn k'a jɛya ko miirili jugu wala ko jugu tɛ ne kɔnɔ, ne ma ko jugu si kɛ i la, hali k'a sɔrɔ i b'a fɛ ka ne faga.
[13] Matigi ka kiri tigɛ e ni ne cɛ, Matigi ka ne hakɛ bɔ i la, nka ne tɛna ne bolo se i ma.
[14] An ka cɛkɔrɔbaw bɛ ntalen da ko: ‹Ko jugu bɛ bɔ mɔgɔ juguw fɛ,› nka ne bolo tɛna se i ma.
[15] Israɛl ka masakɛ bɛ tugu jɔni kɔ? I bɛ jɔn nɔgɛn? Wulu salen wala nkaranka?
[16] Ayiwa Matigi na kiri tigɛ, a na kiri tigɛ e ni ne cɛ. A ka nin ko filɛ ka ne kunkoɲɛnabɔ, a ka ne kɛ tilennen ye ka ne tila ka bɔ i bolo.»
[17] Dawuda tilalen kɔ o kuma fɔli la Saul ye, Saul ko: «Ne denkɛ Dawuda, i yɛrɛ kan don wa?» Saul kasira.
[18] A y'a fɔ Dawuda ye ko: «I tilennen don ka tɛmɛn ne kan, k'a masɔrɔ ne ye ko jugu min kɛ i la, i ye o sara ni ko ɲuman ye.
[19] I y'a jira ne la bi ko i bɛ miiri ko ɲuman la ne ta fan fɛ, sabu Matigi tun ye ne don i bolo, nka i ma ne faga.
[20] Ni mɔgɔ dɔ y'a jugu sɔrɔ, o bɛ sɔn ka o bila ka taa hɛrɛ la wa? O de kosɔn Matigi ka i baraji i ka ko ɲuman kɛlen na ne ye bi.
[21] Ne y'a dɔn sisan ko i na kɛ masakɛ ye, ko Israɛl bɔnsɔn ka masaya na sabati i bolo.
[22] Ayiwa i kali Matigi la ne ye sisan ko i tɛna ne bɔnsɔn halaki ne kɔ, ko i tɛna ne tɔgɔ ban ka bɔ ne fa ka so kɔnɔ.»
[23] Dawuda y'i kali Saul ye. O tuma la Saul ye sira minɛ ka taa a ka so. Dawuda ni a nɔfɛ cɛw yɛlɛnna ka taa u dogo yɔrɔw la.