[1] Cɛ dɔ tun bɛ Ramatayim-Zofim Efrayim kulu jamana la, o tɔgɔ ko Elkana. Ale fa tun ye Jeroham ye. Jeroham fa tun ye Elihu ye, Elihu fa tun ye Tohu ye, Tohu fa tun ye Zuf ye, Efrayim bɔnsɔn tun don.
[2] Muso fila tun bɛ o Efrayimka cɛ fɛ. O kelen tɔgɔ ko Ane, kelen tɔgɔ ko Penina. Denw tun bɛ Penina fɛ, nka den si tun tɛ Ane fɛ.
[3] Elkana tun bɛ bɔ a ka dugu kɔnɔ ka taa Kɛlɛbolow Matigi bato Silo san o san ka saraka faga a ye. Eli denkɛ fila, Hofini ni Fineɛs tun bɛ Matigi ka sarakalasebaaya baara kɛ yen.
[4] Ni Elkana tun bɛ saraka bɔ tuma o tuma, a tun bɛ a muso Penina ni o denkɛw ni a denmusow niyɔrɔ di u ma,
[5] nka a tun bɛ olu ɲɔgɔn fila di Ane ma, k'a masɔrɔ a ko tun ka di a ye ani Matigi tun ma den di a ma.
[6] Ane sinamuso Penina tun bɛ dimin don a la k'a tɔɔrɔ k'a dusu kasi katuguni Matigi tun ma den di Ane ma.
[7] Ayiwa ni Elkana tun bɛ taa Matigi ka so la san o san, a tun bɛ o ɲɔgɔn kɛ Ane ye, nka Penina tun bɛ to ka Ane tɔɔrɔ. A tun bɛ kasi fo a tun tɛ dumuni kɛ.
[8] Ane cɛ Elkana y'a fɔ a ye ko: «Ane, mun na i bɛ kasi? Mun y'a to i tɛ dumuni kɛ? i ɲɛnasisira mun na? Yala ne man fisa ni denkɛ tan ye i fɛ wa?»
[9] U tilalen kɔ dumuni ni minni la Silo, Ane wulila. O y'a sɔrɔ sarakalasebaa Eli sigilen tun bɛ sigilan kan Matigi batosoba da kɔrɔ.
[10] Ɲɛji tun bɛ toni ka bɔ Aneɲɛda la. A tun bɛ kasi Matigi ɲɛ kɔrɔ kaɲɛji caman bɔ.
[11] Ane ye i dafale k'a fɔ ko: «E Kɛlɛbolow Matigi, ni i ye i hakili to i ka jɔnmuso ka tɔɔrɔ ko la, ni i ye i hakili to a la, ni i maɲinɛ a kɔ, ni i ye denkɛ di i ka jɔnmuso ma, ne na o di Matigi ma kabini a bange don fo ka taa a sa. Kun dilan tɛna don a kun na.»
[12] Ane ka delili waati janyara Matigi ɲɛ kɔrɔ minkɛ, Eli ye a dawolo kɔlɔsi.
[13] Ane tun bɛ kuma a yɛrɛ kɔnɔ, a dawolo tun bɛ lamaga nka a kumakan tun tɛ mɛn. O de kosɔn a tun bɛ Eli kɔnɔ ko a falen bɛ diwɛn la.
[14] Eli y'a fɔ Ane ye ko: «I na nin dabila tuma jumɛn? I ka minni dabila sa.»
[15] Ane y'a jaabi ko: «Ayi, ne matigi, ne ye muso dusu kasilen ye. Ne ma diwɛn wala minni fɛn farinma si min, nka ne ye ne kɔnɔna kow bɛɛ fɔ Matigi ye ka foori.
[16] I kana i ka jɔnmuso jate muso sɔnjugu ye, k'a masɔrɔ ne ka tɔɔrɔw ni ne dusu kasi kow y'a to ne ka kuma fɔ sisan.»
[17] O tuma la Eli ko: «I ka taa hɛrɛ la, i ye fɛn min ɲini Israɛl ka Ala fɛ, a ka o di i ma.»
[18] Ane ko: «I ka jɔnmuso ka nɛɛma sɔrɔ i ɲɛ kɔrɔ.» Ayiwa Ane bɔra ka taa ka dumuni kɛ, a ɲɛ ma kumu tun.
[19] O dugusajɛ sɔgɔma da joona fɛ, u tilalen kɔ batoli la Matigi ɲɛ kɔrɔ, u kɔseginna ka taa u ka so Rama. Elkana ye a muso Ane dɔn. Matigi y'i hakili to a la.
[20] Waati dɔ selen, Ane ye kɔnɔ ta ka denkɛ bange. A ye o den tɔgɔ da ko Samuɛl, k'a masɔrɔ a ko: «Ne y'a deli Matigi fɛ.»
[21] Ane cɛ Elkana ni a ka gwa mɔgɔ bɛɛ taara saraka faga Matigi ye Silo ka a ka dafale saraka fana bɔ i ko u delila k'a kɛ cogo min na san o san.
[22] Nka Ane ma taa katuguni a y'a fɔ a cɛ ye ko: «Ni den da bɔra sin na tuma min na, ne na taa n'a ye k'a jira Matigi la, a na to yen kudayi.»
[23] A cɛ Elkana ko: «Min ka ɲi i ɲɛ na, i ka o kɛ. I ka to yan fo a da ka bɔ sin na. Matigi ka kuma fɔlen ka kɛ dɔrɔn.» Muso tora a ka so ka den labalo fo ka a da bɔ sin na.
[24] Den da bɔlen sin na, a taara ni den ni ntura saba ni farini mugu efa ɲɛ kelen ani forokoɲɛ kelen diwɛn ye Matigi ɲɛ kɔrɔ Silo. Cɛni tun ka dɔgɔ fɔlɔ.
[25] U ye ntura kan tigɛ ka taa ni cɛni ye Eli yɔrɔ.
[26] Ane ko: «Ne matigi, i ka ne lamɛn. Ka i to ni la, ne matigi, muso min nana a jɔ i kɔrɔ ka Matigi deli, o ye ne ye.
[27] Ne ye nin den deli Ala fɛ. Ne ye min deli, Matigi ye o di ne ma.
[28] O de kosɔn ne nana ka a di Matigi ma. A bilara Matigi ye a si bɛɛ la.» U y'u biri duguma ka Matigi bato.