[1] Filisitikaw ye u ka kɛlɛdenw lajɛ kɛlɛ kama. U ye ɲɔgɔn lajɛ Soko, o ye Juda bɔnsɔn ka dugu dɔ ye. U ye daga sigi Soko ni Azeka cɛ, Efɛs-Damim.
[2] Saul ni Israɛl bɔnsɔn fana ye ɲɔgɔn lajɛ ka u ka daga sigi Ela jɛkɛnɛ la ka u labɛn Filisitikaw kama ka u kɛlɛ.
[3] Filisitikaw jɔlen tun bɛ kulu kan fan kelen na, Israɛl bɔnsɔn fana jɔlen tun bɛ kulu kan fan dɔ la. Jɛkɛnɛ tun bɛ u cɛ.
[4] Kɛlɛ dafilɛbaa dɔ bɔra Filisitikaw ka kɛlɛ daga la, o tɔgɔ ko Goliati ka bɔ Gat dugu kɔnɔ. O janya tun ye nɔnkɔnɲɛ wɔɔrɔ ni sibiriɲɛ kelen ye.
[5] Nsiranɛgɛ fugula tun bɛ a kun na, nɛgɛ dulɔki tun bɛ a kan na. O fɛnw giriya tun bɛ kilo biwɔɔrɔ bɔ.
[6] Nsiranɛgɛ kɛra ka a senkalaw ni a worow datugu. Nsiranɛgɛ tama dulonnen tun bɛ a kɔ la.
[7] A ka biɲɛ kala tun bɛ i ko gese dala ka bankalama, o biɲɛkisɛ nɛgɛ giriya tun ye kilo wolonwula ye. A ka nɛgɛ bɛnnan tabaa tun bɛ taama a ɲɛ fɛ.
[8] O tuma la a ye i jira Israɛl bɔnsɔn na ka kuma u ka kɛlɛbolow fɛ ko: «Mun y'a to aw bɔra ka aw labɛn kɛlɛ kama? Ne tɛ Filisitika ye wa, aw tɛ Saul ka jɔnw ye wa? Aw ka cɛ kelen ɲɛnatɔmɔ aw la min bɛ na ne kama.
[9] Ni o sera ka ne kɛlɛ ka ne faga, an na kɛ aw ka jɔnw ye, nka ni ne ye se sɔrɔ ale kan ka a faga, aw na kɛ an ka jɔnw ye. Aw na baara kɛ an ye.»
[10] Filisitika y'a fɔ tun ko: «Ɔwɔ, ne bɛ Israɛl bɔnsɔn ka kɛlɛbolo mafiɲɛya. A' ye cɛ kelen ci ne ma, an ka kɛlɛ kɛ.»
[11] Saul ni Israɛl bɛɛ ye o Filisitika ka kuma mɛn tuma min na, u ja tigɛra, u siranna kosɛbɛ.
[12] Ayiwa Dawuda tun ye Efrata jamana mɔgɔ dɔ denkɛ ye, o tɔgɔ ko Isayi, ka bɔ Bɛtilɛhɛm Juda jamana la. Denkɛ segin tun bɛ o cɛ fɛ. Isayi tun kɛra cɛkɔrɔba ye Saul ka waati la.
[13] Isayi denkɛ saba tun bɛ Saul nɔ fɛ kɛlɛ la. O cɛ saba minw tun taara kɛlɛ yɔrɔ la, olu tɔgɔw filɛ ninw ye: denkɛ fɔlɔ tɔgɔ ko Eliab, a filanan tɔgɔ ko Abinadab, a sabanan tɔgɔ ko Sama.
[14] Dawuda tun ye sinnaban ye. A kɔrɔkɛ saba tun bɛ Saul nɔ fɛ tuma min na,
[15] a bɔra Saul ka so ka taa a fa ka so ka sagaw gɛn Bɛtilɛhɛm.
[16] O waati la Filisitika tun bɛ a madon sɔgɔma ni wula fɛ ka a yɛrɛ jira, a ye o kɛ tile binaani kɔnɔ.
[17] Ayiwa Isayi y'a fɔ a denkɛ Dawuda ye ko: «I ka nin alikama jirannen efa ɲɛ kelen ni buurukun tan ta ka taa u di i kɔrɔkɛw ma kɛlɛ daga la.
[18] I ka nin nɔnɔ kuru tan fana ta ka taa u di kɛlɛ kuntigi ma. I n'a dɔn ni i kɔrɔkɛw ka kɛnɛ ka na o kibaru fɔ ne ye.
[19] U ni Saul ani Israɛl bɔnsɔn bɛ Ela jɛkɛnɛ la ka Filisitikaw kɛlɛ.»
[20] Dawuda solila ka wuli ka sagaw to saga gɛnna bolo yen ka o fɛnw ta ka taa i ko Isayi tun y'a fɔ a ye cogo min na. A sera kɛlɛ daga la k'a sɔrɔ kɛlɛbolo bɔtɔ don kɛlɛ kama, u bɛ kɛlɛ kulokan bɔ.
[21] Israɛl bɔnsɔn ni Filisitikaw bɛɛ ye u labɛn kɛlɛ kama ka kɛlɛbolo fila sinɲɔgɔn ma.
[22] Dawuda ye a ka doniw jigin ka u di doni kɔlɔsibaa ma. O kɔ, a bolila ka taa kɛlɛdenw yɔrɔ la ka a kɔrɔkɛw fo.
[23] Ka a to a kɔrɔkɛw ɲininkali la, Filisitikaw ka cɛ barikama Goliati y'i mabɔ Filisitikaw ka kɛlɛdenw la, a delila ka kuma min fɔ, Dawuda ye o fɔkan mɛn a fɛ.
[24] Israɛl bɔnsɔn bɛɛ siranna ka boli o cɛɲɛ ka yɛrɛyɛrɛ a kosɔn.
[25] U bɛɛ ko: «O cɛ natɔ filɛ. A bɛ na ka Israɛl bɔnsɔn neni. Ni mɔgɔ dɔ y'a faga, masakɛ na o tigi kɛ fɛntigi ye, a na a denmuso di o tigi ma ka nisɔngɔ sarali bɛɛ yafa a ka so ma Israɛl bɔnsɔnw cɛma.»
[26] Dawuda y'a fɔ a kɛrɛfɛ cɛw ye ko: «Ni mɔgɔ min ye o Filisitika faga ka o mafiɲɛyali kuma mabɔ Israɛl bɔnsɔn la, mun na kɛ o tigi ye? O Filisitika bolokobali, o min bɛ na ka Ala ɲɛnama ka kɛlɛbolo Israɛl bɔnsɔn neni, o ye jɔn ye?»
[27] U ye a jaabi ko: «Ni mɔgɔ min y'a faga, nin fɛnw na di o tigi ma.»
[28] Nka Isayi denkɛ fɔlɔ Eliab ye Dawuda ka kuma mɛn minkɛ, a diminna a kɔrɔ k'a fɔ a ye ko: «E nana mun ɲini yan? E ye jɔn bila i ka sagaw nɔ fɛ kungo kɔnɔ? Ne bɛ i ka kuncɛbaya ni i ka dusukun gɛlɛya dɔn. I ma na foyi kama ni kɛlɛ filɛli tɛ.»
[29] Dawuda y'a jaabi ko: «Ne ye mun kɛ sa? Ne ye ɲininkali dɔrɔn de kɛ.»
[30] A y'i mabɔ a kɔrɔkɛ la ka o ɲininkali kɛ mɔgɔ wɛrɛ la. O y'a jaabi i ko fɔlɔ cogo.
[31] Mɔgɔw ye Dawuda ka kumaw mɛn ka olu fɔ Saul ye. O ye Dawuda wele ka na.
[32] Dawuda y'a fɔ Saul ye ko: «Mɔgɔ si ja kana tigɛ o Filisitika kosɔn. I ka baaraden na taa a kɛlɛ.»
[33] Saul ye Dawuda jaabi ko: «I tɛ se ka taa o Filisitika kama k'a kɛlɛ k'a masɔrɔ i ye denmisɛn ye, k'a sɔrɔ ale ye kɛlɛkɛ cɛ ye kabini a kamalenma.»
[34] Dawuda ye Saul jaabi ko: «Ka i ka baaraden to a fa ka sagaw gɛnni la, ni waraba dɔ wala ursi wara dɔ tun nana sagaden dɔ minɛ ka bɔ sagakulu la,
[35] ne tun bɛ boli a nɔ fɛ ka a gosi ka saga minɛ ka bɔ a da la. Ni a tun yɛlɛmana ne kama, ne tun b'a minɛ a bonbonsi ma k'a faga.
[36] I ka baaraden ye waraba ni ursi wara faga cogo min na, o Filisitika bolokobali na kɛ o cogo la. A ye Ala ɲɛnama ka kɛlɛbolo neni.»
[37] Dawuda y'a fɔ tun ko: «Matigi min ye ne kisi ka bɔ waraba ni ursi wara bolo, o na ne kisi ka bɔ o Filisitika bolo.» Saul ye Dawuda jaabi ko: «I ka taa, Matigi ka to i fɛ.»
[38] Saul y'a ka kɛlɛkɛ finiw don Dawuda la, ka nɛgɛ fugula don a kun na ka nɛgɛ dulɔki kɛ ka a yɔrɔ bɛɛ datugu.
[39] Dawuda ye a cɛ siri ni Saul ka npan ye o finiw kan k'a filɛ ni a bɛ se o kɔrɔ ka taama n'a ye, nka a tun ma deli u la. A y'a fɔ Saul ye ko: «Ne tɛ se ka taama ni nin kɛlɛkɛ minanw ye, k'a masɔrɔ ne ma deli u la.» Dawuda ye o fɛnw bɔ.
[40] A ye bere dɔ ta a bolo ka kabakurun nugulen duuruɲɛnatɔmɔ ka bɔ kɔ da la ka u bila a ka saga gɛn bɔrɛ kɔnɔ. A ka ntanfura tun bɛ a bolo. A ye i madon o Filisitika kama.
[41] Filisitika fana ni a ka nɛgɛ bɛnnan tabaa y'i madon ka gɛrɛ Dawuda la.
[42] Filisitika ye Dawuda filɛ k'a ye ko denmisɛn don, a tun ka bilen, a cɛ tun ka ɲi. A m'a jate fɛn ye.
[43] Filisitika y'a fɔ Dawuda ye ko: «Yala ne ye wulu ye, ko i bɛ gɛrɛ ne la ni bere ye wa?» O Filisitika ye Dawuda danga ni a ka bato fɛn tɔgɔ ye.
[44] A ko fana: «I ka na yan, ne na i sogo di sanfɛ kɔnɔw ni kungo kɔnɔ waraw ma.»
[45] Dawuda y'a fɔ Filisitika ye ko: «I bɛ na ne kama ni npan ni kala ani tama ye, nka ne bɛ taa i kama ni Kɛlɛbolow Matigi, Israɛl ka Ala tɔgɔ ye, i ye o min neni.
[46] Matigi na i don ne bolo bi, ne na i faga ka i kunkolo tigɛ ka Filisitikaw ka kɛlɛbolow suw di sanfɛ kɔnɔw ni kungo kɔnɔ waraw ma bi yɛrɛ. Dugukolo kan mɔgɔw bɛɛ n'a dɔn ko Ala bɛ Israɛl bɔnsɔn fɛ.
[47] Nin mɔgɔw bɛɛ fana n'a dɔn ko Matigi mago tɛ npan wala kala wala tama la ka kɛlɛ kɛ ni u ye ka se sɔrɔ, katuguni Matigi ye nin kɛlɛ kuntigi ye, a na aw don an bolo.»
[48] O Filisitika wulila ko a bɛ gɛrɛ Dawuda la. Dawuda tɛliyara ka boli ka taa juguw fan fɛ ka Filisitika kunbɛn.
[49] A ye a ka ntanfura minɛ a bolo ka a bolo don a ka bɔrɛ kɔnɔ ka kabakurun kelen ta ka o fili ka Filisitika gosi a ten na. O kabakurun donna a ten na. Goliati bira a ɲɛda kan duguma.
[50] Ayiwa Dawuda ye se sɔrɔ Filisitikaw kan ni a ka ntanfura ni kabakurun ye. A y'a faga k'a sɔrɔ npan t'a bolo.
[51] O kɔ, Dawuda bolila ka taa o Filisitika kɔrɔ ka o ka npan sama ka bɔ a tan na ka a kunkolo tigɛ. Filisitikaw y'a ye ko u ka cɛ barikama fagara minkɛ, u bolila.
[52] O tuma la Israɛl bɔnsɔn kɛlɛkɛ cɛw ni Juda bɔnsɔn kɛlɛkɛ cɛw wulila ka pɛrɛn kɛlɛ kama ka Filisitikaw nɔgɛn fo ka taa se Gat donda la ka taa Ekirɔn daw la. Filisitika joginnenw ni salenw dalen tun bɛ Sarayim sira kan ka taa se fo Gat ka taa bila Ekirɔn.
[53] Israɛl bɔnsɔn tilalen kɔ Filisitikaw nɔgɛnni la, u seginna ka taa Filisitikaw ka kɛlɛ daga kɔnɔ fɛnw bɛɛ cɛ.
[54] Dawuda ye Goliati kunkolo ta ka taa n'o ye Jerusalɛm, nka a ye Goliati ka kɛlɛkɛ minanw bila a yɛrɛ ka finiso kɔnɔ.
[55] Saul ye Dawuda taatɔ ye Goliati kunbɛn minkɛ, a ye kɛlɛbolo kuntigi Abinɛr ɲininka ko: «Abinɛr, nin kamalen ye jɔn den ye?» Abinɛr y'a jaabi ko: «Ka i to ni la, masakɛ, ne m'a dɔn.»
[56] Masakɛ ko: «I ka mɔgɔw ɲininka ko, o cɛni ye jɔn den ye?»
[57] Dawuda ye o Filisitika faga ka kɔsegin tuma min na, Abinɛr y'a minɛ ka taa n'a ye Saul ɲɛkɔrɔ. O Filisitika kunkolo minɛlen tun bɛ Dawuda bolo.
[58] Saul y'a fɔ Dawuda ye ko: «Kamalen, i ye jɔn den ye?» Dawuda y'a jaabi ko: «Ne ye i ka baaraden Isayi denkɛ ye ka bɔ Bɛtilɛhɛm.»