[1] Saul y'a fɔ a denkɛ Jonatan ni a ka baaradenw bɛɛ ɲɛ na ko a na Dawuda faga. Nka Saul denkɛ Jonatan min tun ye Dawuda teri ye,
[2] o ye Dawuda lasɔmi ko: «Ne fa Saul b'a fɛ ka i faga. I ka i yɛrɛ kɔlɔsi sini sɔgɔma k'i dogo yɔrɔ dɔ la.
[3] I dogolen bɛ foro min na, ne ni ne fa na bɔ ka taa yen. Ne na ne jɔ ale kɛrɛ fɛ ka kuma a fɛ i ko la. A na min fɔ i ko la, ne na o dɔn ka o fɔ i ye.»
[4] O tuma la Jonatan ye Dawuda tɔgɔɲuman fɔ a fa Saul ye ko: «Masakɛ kana ko jugu si kɛ a ka baaraden Dawuda la k'a masɔrɔ a ma ko jugu si kɛ i la. A ye ko ɲuman caman kɛ i ye.
[5] A y'a ni di ka Filisitika faga. Matigi ye tilali koba kɛ a bolo Israɛl bɔnsɔn bɛɛ ye. I y'o ye, i nisɔndiyara o kosɔn. Mun y'a to i bɛ joli jalakibali hakɛ ta ka Dawuda faga k'a sɔrɔ kun t'a la?»
[6] Saul y'i tulo majɔ Jonatan kan na ka i kali ko: «Matigi ɲɛnama tɔgɔ kosɔn, Dawuda tɛna faga.»
[7] O tuma la Jonatan ye Dawuda wele ka o ko fɔlenw lakali a ye. O kɔ, Jonatan taara ni Dawuda ye Saul kɔrɔ. Dawuda y'a ka baara kɛ i ko a delila k'a kɛ cogo min na.
[8] Kɛlɛ tun bɛ juguya ka ta'a fɛ. Dawuda tugura Filisitikaw nɔ fɛ ka u kɛlɛ ka u tiɲɛn kosɛbɛ fo u tun bɛ boli a ɲɛ.
[9] Nka Matigi ye ni jugu ci ka jigin Saul kan k'a sigilen to a ka bon kɔnɔ. A ka tama tun bɛ a bolo, Dawuda tun bɛ nkɔni fɔ.
[10] Saul tun b'a fɛ k'a gengen kogo la ni a ka tama ye, nka Dawuda ye i cɛ ka bɔ tama kɔrɔ. A ka tama ye kogo sɔgɔ. Dawuda bolila ka dan kɛ o su fɛ.
[11] Saul ye mɔgɔ dɔ ci ko u ka taa Dawuda ka so ka a minɛ k'a faga sɔgɔma da fɛ. Nka Dawuda muso Mikal tun y'a lasɔmi ko: «Ni i ma boli bi su in na, sini i na faga.»
[12] Mikal ye Dawuda lajigin finɛtiri fɛ, a bolila ka dan kɛ.
[13] O kɔ, Mikal ye terafim ta ka o bila dalan kan ka basi kunkɔrɔdalan don a kun kɔrɔ ka birifini biri a la.
[14] Saul ye mɔgɔw ci ka taa Dawuda nɔ fɛ tuma min na, Mikal y'a fɔ u ye ko: «Dawuda man kɛnɛ.»
[15] Saul ye u ci ka taa a filɛ, ko u ka na ni Dawuda ye a yɔrɔ ka a to a ka dalan kan walisa a k'a faga.
[16] O tuma la cidenw taara, u y'a sɔrɔ terafim tun bɛ dalan kan ani basi kunkɔrɔdalan tun bɛ a kun kɔrɔ.
[17] Saul y'a fɔ Mikal ye ko: «Mun y'a to i ye ne lafili ten, e de y'a to ne jugu ka dan kɛ.» Mikal ye Saul jaabi ko: «A y'a fɔ ne ye ko ne k'a bila ka taa wala a bɛ ne faga.»
[18] O tuma la Dawuda bolila ka dan kɛ. A taara Samuɛl sɛgɛrɛ Rama. Saul ye ko minw kɛ a la, a y'o bɛɛ lakali Samuɛl ye. O kɔ, u taara u sigi Najɔt.
[19] A fɔra Saul ye ko Dawuda filɛ Najɔt Rama kɛrɛ fɛ.
[20] Saul ye a ka cidenw bila ko u ka taa Dawuda minɛ, nka u ye kiraw lajɛlen ye, olu tun bɛ kiraya kɛ. Samuɛl tun bɛ u ɲɛ minɛ. Ala Ni jiginna Saul ka cidenw kan. Olu fana ye kiraya kɛ.
[21] Saul ye mɔgɔ wɛrɛw ci ka taa, olu fana ye kiraya kɛ i ko fɔlɔ taw. Saul ye ciden sabananw ci ka taa ko kura, olu fana ye kiraya kɛ.
[22] O tuma la a yɛrɛ taara Rama. A sera Seku kɔlɔn da la ka ɲininkali kɛ ko: «Samuɛl ni Dawuda bɛ min?» Olu y'a jaabi ko: «U bɛ Najɔt, Rama kɛrɛ fɛ.»
[23] O tuma la a taara Najɔt. Ala Ni jiginna ale fana kan, ale fana y'a daminɛ ka kiraya kɛ fo ka taa se Najɔt, Rama kɛrɛ fɛ.
[24] A ye a ka finiw bɔ a kan na ka kiraya kɛ Samuɛl ɲɛkɔrɔ. A farilankolon dalen tun bɛ duguma o tile ni o su bɛɛ la. O de kosɔn mɔgɔw y'a fɔ ko: «Saul fana kɛra kira dɔ ye wa?»