[1] Dawuda bolila ka bɔ Najɔt, Rama kɛrɛ fɛ ka taa Jonatan sɛgɛrɛ k'a fɔ a ye ko: «Ne ye mun kɛ? Ne ka ko jugu kɛlen ye mun ye? Ne ye ko jugu jumɛn kɛ i fa la fo a b'a fɛ ka ne faga?»
[2] Jonatan y'a jaabi ko: «Ala ma i kisira o ma. Ne fa tɛ koba wala ko fitinin si latigɛ ni a ma o fɔ ne ye. Ayiwa mun kosɔn ne fa bɛ o dogo ne la? O tɛ se ka kɛ.»
[3] Nka Dawuda y'i kali ko: «I fa y'a dɔn ko ne ko ka di i ye, o de kosɔn a b'a fɔ ko Jonatan kana nin dɔn, o kana na a ɲɛnasisi. Matigi ɲɛnama tɔgɔ kosɔn, ka i ɲɛnama to, senda ko kelen dɔrɔn bɛ ne ni saya cɛ.»
[4] Jonatan y'a fɔ Dawuda ye ko: «E b'a fɛ ne ka mun kɛ i ye?»
[5] Dawuda ko: «Sini, kalo kura na jɔ. Ne ka kan ka taa ne sigi dumuni la masakɛ fɛ. I ka ne bila ka taa ka ne dogo kungo kɔnɔ fo a tile sabanan don wula da fɛ.
[6] Ni i fa y'a dɔn ko ne tɛ yen, i k'a fɔ a ye ko Dawuda ye ne deli kosɛbɛ ko ne ka a bila ka taa Bɛtilɛhɛm, a yɛrɛ ka dugu kɔnɔ, ko a so mɔgɔw bɛ u ka san yɛlɛma saraka bɔ.
[7] Ni a y'i jaabi ko, o ka ɲi, o tuma la i ka baaraden na to hɛrɛ la. Nka ni a diminna, i k'a dɔn ko a b'a fɛ ka ne faga.
[8] Ayiwa i ka ɲumaya jira i ka baaraden ta fan fɛ, k'a masɔrɔ i ye layidu ta i ka baaraden ye Matigi tɔgɔ la. Nka ni ko jugu dɔ bɛ ne la, i yɛrɛ ka ne faga, mun y'a to i bɛ taa ni ne ye i faɲɛ kɔrɔ?»
[9] Jonatan ko: «Ala ka o miirili yɔrɔ janya i la. O bɛɛ n'a ta ni ne y'a dɔn sɛbɛ la ko ne fa b'a fɛ ka i faga, mun na ne tɛna o fɔ i ye?»
[10] Dawuda ye Jonatan ɲininka ko: «Nka ni i fa diminna, jɔn na o kuma fɔ ne ye?»
[11] Jonatan y'a fɔ Dawuda ye ko: «Na, an ka taa kungo kɔnɔ.» U fila bɔra ka taa kungo kɔnɔ.
[12] Jonatan ko: «Matigi, Israɛl ka Ala ye ne seere ye, ko ne na ne fa ɲininka sini wala sinikɛnɛ nin waati kelen na. Ni ne y'a ye ko hɛrɛ bɛ i ta fan fɛ, ne na mɔgɔ ci ka taa o fɔ i ye.
[13] Nka ni ne fa b'a fɛ ka ko jugu kɛ i la, ni ne ma mɔgɔ si ci ka taa o fɔ i ye, Matigi ka o bɛɛ kɛ ne yɛrɛ la ten ka dɔ fara o kan. O tuma la i na taa hɛrɛ la. Matigi ka to i fɛ i ko a tora ne fa fɛ cogo min na.
[14] Don nataw la ni ne ɲɛnama tora, i ka hinɛ ne la Matigi tɔgɔ kosɔn. Nka hali ni ne sara,
[15] ni Matigi ye Dawuda juguw bɛɛ halaki ka bɔ dugukolo kan tuma min na fo ka se a jugu laban ma, i kana i ka ɲumaya dabila ne ka so mɔgɔw ye abada.»
[16] Ayiwa Jonatan ye layidu ta Dawuda ni a ka so ye ko ni Dawuda ye o layidu tiɲɛn, Matigi ka a mɔnɛ bɔ Dawuda la.
[17] Jonatan ye layidu ta Dawuda ye ko kura u cɛ kanuya kosɔn, sabu a tun b'a kanu i ko a yɛrɛ ni.
[18] Jonatan ko: «Sini ye kalo kura ye, kɔlɔsili na kɛ i yebaliya ko la, k'a masɔrɔ u na i sigi yɔrɔ lankolon ye.
[19] I tun ye i dogo yɔrɔ min na o don na, sinikɛnɛ i ka jigin ka taa i dogo yen Ezɛl kabakurun kɔrɔ.
[20] Ne na biɲɛkisɛ saba bon o fan fɛ, i n'a fɔ ne bɛ fɛn dɔ bon.
[21] O kɔ, ne na ne ka baaraden ci ni nin kumaw ye ko: ‹Taa biɲɛkisɛw ɲini.› Ni ne y'a fɔ a ye ko: ‹Biɲɛkisɛw filɛ i kɔrɔ yanfan fɛ, u ta ka na,› o tuma la i bɛ se ka na katuguni ko jugu tɛ yen i ta fan fɛ, foyi tɛ i sɔrɔ, ne bɛ o fɔ Ala ɲɛnama kosɔn.
[22] Nka ni ne y'a fɔ kamalen ye ko: ‹Biɲɛkisɛw filɛ fo i ɲɛ fɛ yen,› o tuma la i ka taa, sabu Matigi sago ye i taali ye.
[23] An ye layidu min diɲɔgɔn ma, Matigi ka kɛ seere ye ne ni e cɛ o la badaa.»
[24] O tuma la Dawuda taara i dogo kungo la. Kalo kura jɔlen, masakɛ y'i sigi tabali la ka dumuni kɛ.
[25] A y'i sigi a sigi yɔrɔ kɔrɔlen na a ka sigilan kan kogo kɛrɛ fɛ. Jonatan wulila walisa Abinɛr k'i sigi Saul kɛrɛ fɛ. Dawuda sigi yɔrɔ lankolon tora.
[26] Saul ma foyi fɔ o don na, k'a masɔrɔ a tun bɛ miiri ko siga t'a la, ko dɔ kɛra a la min y'a nɔgɔ fo a tɛ se ka na.
[27] Nka o dugusajɛ, kalo kura tile filanan don Dawuda sigi yɔrɔ lankolon tun don. Saul y'a fɔ a denkɛ Jonatan ye ko: «Mun y'a to Isayi denkɛ Dawuda ma na dumuni la kunun wala bi?»
[28] Jonatan y'a fɔ Saul ye ko: «Dawuda ye ne deli ko ne ka sɔn a ka taa Bɛtilɛhɛm.
[29] A ye ne deli ko ne k'a to a ka taa, k'a masɔrɔ a ka gwa mɔgɔw bɛ saraka bɔ dugu kɔnɔ. A kɔrɔkɛ y'a fɔ ko a ka taa o la. Ayiwa sisan, a ko ni a ko diyara ne ye, ne ka sɔn a ka taa a kɔrɔw filɛ. O de kosɔn a ma na masakɛ ka dumuni la.»
[30] O tuma la Saul diminna Jonatan kɔrɔ k'a fɔ a ye ko: «Muso tilenbali murutilen den. Ne y'a dɔn ko i teri ye Isayi denkɛ ye, e ni i ba min ye i bange, aw ka malo.
[31] Ɔwɔ, ka Isayi denkɛ ɲɛnama to dugukolo kan, e ni i ka masaya tɛna sabati. Ayiwa sisan, i ka mɔgɔ dɔ ci ka taa a nɔ fɛ ka na n'a ye, sabu a ka kan ka faga.»
[32] Jonatan y'a fɔ a fa Saul ye ko: «Mun kosɔn i b'a faga? A ye mun kɛ?»
[33] Saul ye a ka tama kerun Jonatan ma ko a b'a faga. O tuma la Jonatan y'a dɔn ko a fa tun y'a latigɛ ka Dawuda faga.
[34] Jonatan diminnen wulila ka bɔ tabali la. A ma o kalo kura don filanan dumuni kɛ a fa ka kɛlen kosɔn Dawuda la.
[35] O dugusajɛ sɔgɔma da fɛ Jonatan taara foro la Dawuda ka yɔrɔ fɔlen na. Kamalen dɔ taara a fɛ.
[36] A y'a fɔ o kamalen ye ko: «Boli ka taa ne ka biɲɛ bonnenw cɛ.» O kamalen bolila. Jonatan ye biɲɛ bon a ɲɛ fɛ.
[37] Ka kamalen taatɔ to biɲɛ fili yɔrɔ fan fɛ, Jonatan pɛrɛnna kamalen fɛ ko: «Biɲɛ tɛ i ɲɛ fɛ wa?»
[38] A ko fana: «I tɛliya ka taa. I kana i jɔ.» Jonatan ka kamalen taara o biɲɛkisɛw ɲini ka na ni u ye a makɛ yɔrɔ.
[39] Kamalen tun tɛ foyi dɔn o ko la, nka Jonatan ni Dawuda tun bɛ o kow dɔn.
[40] Jonatan ye a ka kɛlɛkɛ minanw di o kamalen ma k'a fɔ a ye ko: «Taa ni ninw ye dugu kɔnɔ.»
[41] Kamalen mabɔlen yen na, Dawuda wulila ka bɔ worodugu yanfan fɛ ka i bi k'a ɲɛ biri duguma ka o kɛ siɲɛ saba. O kɔ, u ye ɲɔgɔn da susu ka kasiɲɔgɔn fɛ fo Dawudaɲɛji tun bɛ jigin.
[42] Jonatan y'a fɔ a ye ko: «I ka taa hɛrɛ la sisan, i hakili to a la ko an y'an kaliɲɔgɔn ye Matigi tɔgɔ la. An y'a fɔ ko: ‹Matigi ka ne ni e kɛ kantigi ye ka ne bɔnsɔn ni e bɔnsɔn kɛ kantigi ye an kɔ.›» O tuma la Dawuda wulila ka taa, Jonatan seginna dugu kɔnɔ.