[1] Dawuda bɔra Gat ka taa i dogo Adulam kuluwo kɔnɔ. A kɔrɔkɛw ni a so mɔgɔw bɛɛ y'o dɔn, u taara a sɛgɛrɛ.
[2] Minw bɛɛ degunnen tun don ani juruw tun bɛ minw na ani mɔgɔ dusu kasilenw, olu bɛɛ taara u lajɛ a yɔrɔ. A kɛra olu kuntigi ye. Minw tun bɛ a fɛ yen, olu tun ye cɛ kɛmɛ naaniɲɔgɔn ye.
[3] Dawuda bɔra yen ka taa Mizpa, Moab jamana la k'a fɔ Moab masakɛ ye ko: «I k'a to ne fa ni ne ba ka sigi i fɛ yan sani ne ka ne yɛrɛ cogo dɔn Ala fɛ.»
[4] O tuma la Dawuda taara ni u ye Moab masakɛ ɲɛ kɔrɔ. U tora masakɛ fɛ yen Dawuda ka yaalayaala waatiw bɛɛ la kungokolon kɔnɔ.
[5] Nka kira Gat y'a fɔ Dawuda ye ko: «I kana to nin kuluwo kɔnɔ, i ka taa Juda jamana la.» O tuma la Dawuda taara Herɛt tu kɔrɔ.
[6] Saul sigilen tun bɛ ntamaro sun kɔrɔ Gibea san fɛ, a ka tama tun bɛ a bolo, a ka baaradenw jɔlen tun bɛ a kɛrɛ fɛ. Saul y'a mɛn ko Dawuda ni a fɛ mɔgɔw yera minkɛ,
[7] Saul y'a fɔ a ka baaradenw ye ko: «Aw Benjamɛn bɔnsɔn, a' ye aw tulo majɔ. Aw bɛ miiri ko Isayi denkɛ na forow ni rezɛn nakɔw di aw ma wa? Aw jigi b'a kan ko a na aw sigi ka kɛ cɛ waa kelen-kelen ni cɛ kɛmɛ-kɛmɛ kuntigiw ye wa?
[8] Mun kosɔn aw bɛɛ bɛ jɛ siri ne kama? Aw si ma fɔ ne ye ko ne denkɛ ye layidu ta Isayi denkɛ ye. Mun na mɔgɔ si ma sɔrɔ aw cɛma min bɛ hinɛ ne la ka ne lasɔmi ko ne denkɛ ye ne ka baaraden lasu ka kɛ ne kan fo a ka i dogo neɲɛ i ko a y'a kɛ bi cogo min na?»
[9] Ayiwa Saul ka baaradenw kuntigi Doɛg min bɔra Edɔm, o ko: «Ne ye Isayi denkɛ ye Akitub denkɛ Akimelɛk yɔrɔ la Nob dugu kɔnɔ.
[10] O ye Matigi ɲininka a ye, ka balo di a ma ka Filisiti Goliati ka npan fana di a ma.»
[11] Masakɛ Saul ye Akitub denkɛ sarakalasebaa Akimelɛk ni a so mɔgɔw bɛɛ wele. U tun ye sarakalasebaaw ye, u sigilen tun bɛ Nob dugu kɔnɔ. U taara masakɛ ka so.
[12] Saul ko: «Akitub denkɛ, i tulo majɔ.» O ko: «Ne filɛ, ne matigi.»
[13] Saul ko: «Mun y'a to i ni Isayi denkɛ ye jɛ siri ne kama? I ye buuru ni npan kelen di a ma ka Ala ɲininka a ye walisa a ka wuli ne kama k'a yɛrɛ dogo ne ɲɛ i ko a y'a kɛ bi.»
[14] Akimelɛk ye masakɛ jaabi ko: «I ka baaradenw bɛɛ la jumɛn ye dannamɔgɔ ye i ko Dawuda? Masakɛ birankɛ fana don. A bɛ i ka ciw bɛɛ kɛ, i ka so mɔgɔw bɛɛ b'a bonya.
[15] Ne ye Ala ɲininkali daminɛ a ye bi wa? Ayi dɛrɛ. Ala ma ne kisira i janfali miirili ma. Masakɛ, i kana o doni da i ka baaraden wala a ka mɔgɔw kun, k'a masɔrɔ i ka baaraden tɛ fɛn misɛn wala fɛnba dɔn o kow si la.»
[16] Masakɛ y'a jaabi ko: «Ɔwɔ, Akimelɛk, e ni i fa ka so mɔgɔw bɛɛ na faga.»
[17] O tuma la masakɛ y'a fɔ a kɔlɔsibaaw ye ko: «A' ye aw madon ka Matigi ka sarakalasebaaw faga, sabu u ni Dawuda bɛ jɛ la. U y'a dɔn ko Dawuda bolila, nka u ma foyi fɔ ne ye.» Nka masakɛ kɔlɔsibaaw si ma sɔn ka u bolo da Matigi ka sarakalasebaaw kan ka u faga.
[18] O tuma la masakɛ y'a fɔ Doɛg ye ko: «E k'i madon ka sarakalasebaaw faga.» Doɛg y'i yɛlɛma u fan fɛ ka sarakalasebaaw efɔdtigi bisegin ni duuru faga o don na.
[19] Saul ye sarakalasebaaw ka dugu Nob ci ni npan ye, cɛw ni musow, denmisɛnw ni sinminnaw, misiw ni faliw ani sagaw, a ye olu bɛɛ faga ni npan ye.
[20] O bɛɛ n'a ta Akimelɛk denkɛ kelen Abiatar bolila ka dan kɛ. Akimelɛk fa tun ye Akitub ye. O taara i dogo Dawuda fɛ yen.
[21] Abiatar taara a fɔ Dawuda ye ko Saul ye Matigi ka sarakalasebaaw faga.
[22] Dawuda ye Abiatar jaabi ko: «Ne y'a faamu o don na ko Edɔm Doɛg tun bɛ yen, ko a na o kow fɔ Saul ye. I fa ka so mɔgɔw bɛɛ fagara ne kosɔn.
[23] I ka to ne fɛ yan. I kana siran. Mɔgɔ min b'a fɛ ka i faga, o b'a fɛ ka ne fana faga. I na to hɛrɛ la ne fɛ yan.»