[1] Samuɛl kɔrɔla tuma min na, a y'a denkɛw sigi ka kɛ Israɛl bɔnsɔn ka kiritigɛlaw ye.
[2] Ayiwa a den fɔlɔ tɔgɔ ko Joɛl, a filanan tɔgɔ ko Abija. U taara kɛ kiritigɛlaw ye Beɛr-Seba.
[3] Nka Samuɛl denw tun tɛ taama a sagona sira fɛ, u tun bɛ fɛnw nanbara ka u yɛrɛw fɛntigiya. U tun bɛ surɔ fɛn minɛ ka kiri ko tiɲɛn.
[4] Israɛl bɔnsɔn bɛɛ y'u lajɛ ka taa Samuɛl sɛgɛrɛ Rama
[5] k'a fɔ a ye ko: «A filɛ, i kɔrɔla. I denkɛw tɛ taama i sagona sira fɛ. Ayiwa sisan i ka masakɛ sigi an kun na, o na an ka kiri kow ɲɛnabɔ i ko siya tɔw.»
[6] Mɔgɔw y'a fɔ ko: «I ka masakɛ sigi an kun na, o ka an ka kiri tigɛ,» o ma diya Samuɛl ye. Samuɛl ye Ala deli.
[7] Matigi y'a fɔ Samuɛl ye ko: «O jama bɛ fɛn o fɛn fɔ i ye, i ka u kan minɛ ka o bɛɛ kɛ. U ma i bila, u ye ne de bila walisa ne kana sigi u kun na tun.
[8] U bɛ min kɛ e la, u ye o ɲɔgɔn kɛ ne la kabini ne ye u labɔ Misira jamana la fo ka na se bi ma. U ye ne bila ka baara kɛ bato fɛn wɛrɛw ye.
[9] Ayiwa sisan, i ka u kan minɛ, nka i kana ɲinɛ u lasɔmini kɔ o masakɛ ka kɛtaw la.»
[10] Jama minw ye masakɛ ɲini Samuɛl fɛ, a taara Matigi ka kuma bɛɛ fɔ olu ye.
[11] A y'a fɔ u ye ko: «Aw ka masakɛ na min kɛ aw la, o filɛ nin ye. A na aw denkɛw minɛ ka olu dɔw kɛ wotoro bolilaw ni so bolilaw ye walisa u ka boli a ka wotorow ɲɛ fɛ.
[12] A na u dɔw sigi ka kɛ cɛ waa kelen-kelen kuntigiw ni biduuru-duuru kuntigiw ye. U dɔw na a ka foro sɛnɛ ka a ka suman tigɛ ka a ka kɛlɛkɛ minanw labɛn kɛlɛ kama ka a ka wotoro minanw dila.
[13] A na aw denmuso dɔw minɛ ka olu kɛ latikɔlɔn dilabaaw ni tobilikɛlaw ni buuru dilabaaw ye.
[14] A na aw ka forow ni aw ka rezɛn nakɔw ni aw ka olive nakɔw bɛɛ laɲumanw minɛ ka olu di a ka baaradenw ma.
[15] A na aw ka sumanw jakaw ni aw ka rezɛn mɔw jakaw minɛ ka olu di a ka kuntigiw ni a ka jɔnw ma.
[16] A na aw ka baarakɛ cɛw ni aw ka baarakɛ musow ni aw ka kamalenw ni aw ka faliw minɛ, u na a ka baara kɛ.
[17] A na aw ka baganw jakaw minɛ, aw na kɛ a ka jɔnw ye.
[18] O tuma la aw na kulo aw ka masakɛ ɲɛnatɔmɔlen kosɔn, nka Matigi tɛna aw jaabi.»
[19] Mɔgɔw ma sɔn ka Samuɛl ka kuma lamɛn. U ko: «Ayi, an b'a fɛ masakɛ ka sigi an kun na.
[20] An b'a fɛ ka kɛ i ko siya tɔw. An ka masakɛ na an ka kiri koɲɛnabɔ. A na an ɲɛ minɛ ka kɛ an kuntigi ye kɛlɛ la.»
[21] Samuɛl ye jama ka kuma bɛɛ lamɛn ka u fɔ Matigi ye.
[22] Matigi ye Samuɛl jaabi ko: «I ka u kan minɛ ka masakɛ di u ma.» O tuma la Samuɛl y'a fɔ Israɛl bɔnsɔn ye ko: «Aw bɛɛ ka kɔsegin ka taa aw ka duguw la.»