[1] Ҳоким билан овқатланишга ўтирганда, олдингга қўйилган нарсаларга назар сол.
[2] Агар иштаҳанг катта бўлса, бўғзингга пичоқ тиралгандай, ўзингни назорат қил.
[3] Унинг неъматларини кўнглинг тусамасин, чунки бу алдамчи таомдир.
[4] Бой бўлай деб кўп ҳаракат қилма, фаҳму фаросат билан бу фикрингдан воз кеч.
[5] Бойлик кўз очиб юмгунча йўқ бўлади, қанот қоқиб бургутдай осмонга учиб кетади.
[6] Хасиснинг овқатидан ема, унинг неъматларини кўнглинг тусамасин.
[7] Чунки у кўнглида ўзининг фойдасини ҳисоблайди, “Егин, ичгин”, — дейди–ю, кўнгли сен билан эмас.
[8] Еган луқмангни қайт қиласан, ширин сўзларинг ҳавога учиб кетади.
[9] Аҳмоққа гап гапирма, у ҳикматли сўзларингни рад этади.
[10] Қадимий чегараларни бузма, етимларнинг даласини тортиб олма.
[11] Чунки уларнинг Ҳимоячиси қудратли, У етимларнинг тарафини олади.
[12] Юрагингни насиҳатга, қулоқларингни эса идрокка оч.
[13] Боладан танбеҳни аяма, чунки таёқ билан урсанг ўлмайди.
[14] Таёқ билан уриб жазоласанг, жонини дўзахдан сақлайсан.
[15] Ўғлим, қалбингда донолик бўлса, юрагим қувонади.
[16] Тилингдан тўғри сўз чиқса, кўнглим ҳам шодланади.
[17] Гуноҳкорларга ҳавас қилма, доимо Эгамиздан қўрқиб юр.
[18] Чунки албатта келажак бор, умидинг рўёбга чиқади.
[19] Ўғлим, тинглаб доно бўл, юрагингни тўғри йўлга сол.
[20] Майхўр ва очкўзлик билан гўшт ейдиганлар орасида бўлма.
[21] Чунки майхўр ва очкўз қашшоқ бўлади, уйқучилик жулдур кийим кийдиради.
[22] Сени дунёга келтирган отангга қулоқ сол, онанг қариганда уни хор қилма.
[23] Ҳақиқатни сотиб ол, донолик, йўл–йўриқ, идрок ҳам ол, уларни сотма.
[24] Солиҳ отасининг бошини кўкка етказади, доно фарзанд уни хурсанд қилади.
[25] Ота–онанг сендан хурсанд бўлсин, сенга ҳаёт берган онанг шод бўлсин.
[26] Ўғлим, менга қалбингни оч, кўзларинг ишларимни кузатсин.
[27] Чунки бузуқ хотин — тубсиз чоҳ, зинокор хотин тор қудуқдир.
[28] У қароқчи каби пойлаб туради, одамлар орасида вафосизликни орттиради.
[29] Қайғу кимда, ким ғам–ташвиш тортади? Ким жанжал қилади, шикоят қилган ким? Ким сабабсиз яраланади? Кимнинг кўзлари қип–қизил?
[30] Шароб ичишга берилганлар, хушбўй майни тотиб кўришга кўп борганлар.
[31] Шаробнинг қизиллигига, қадаҳда чўғдай товланишига, текис қуйилишига қарама.
[32] Охирида у илон каби чақади, қора илондай заҳар сочади.
[33] Кўзларинг ғалати нарсаларни кўради, юрагингда эгри фикрлар бўлади.
[34] Кўпирган денгиз ўртасида ётгандай, тўлқинларда чайқалган кемада ухлагандай бўласан.
[35] “Мени урдилар, оғримади, калтакладилар, лекин билмадим. Қачон уйғонаман? Яна бир ичай”, — дейсан.