[1] Fî-li-sṳ-ngìn lâu Yî-set-lie̍t-ngìn chhai Kî-li-pô-sân siông-chhṳ̀. Tông tô Yî-set-lie̍t-ngìn pûn-ngìn chhṳ̀-sí; mò sí ke ngìn chhiòn-phu thò-chéu.
[2] Fî-li-sṳ-ngìn kiuk-tó Só-lò lâu kì ke-têu lai-é, chhṳ̀-thet Yok-nâ-tân, Â-pí-nâ-tha̍t lâu Ma̍k-kî-Sû-â.
[3] Si chû-vì hiong Só-lò ke kûng-kit kín-lòi kín kit-lie̍t; kì pûn thi̍t-ngìn ke chien sa-tó, su chhûng-sông.
[4] Só-lò tui thoi kì nâ vú-hi ke sṳ-ví kóng: “Ngì ke tô-é pâng chhut-lòi, chiông ngài chhṳ̀-thet! Án-ngiòng, ke-têu mò su kot-lî ke Fî-li-sṳ-ngìn chhiu mò fap-thu chhṳ̀-tó ngài lòi lìn-yu̍k ngài.” Chúng-he ke sṳ-ví fî-sòng kiâng, m̀-kám chhṳ̀; só-yî Só-lò pâng-chhut chhṳ-kâ ke tô-é lòi, phu̍k chhai tô-é táng-kô chiông chhṳ-kâ chhiuk-sí.
[5] Ke sṳ-ví yit khon-tó Só-lò sí-thet, ya phu̍k chhai chhṳ-kâ ke tô-é táng-kô chhṳ-sat, lâu Só-lò khiung-ha sí.
[6] Liá chhiu-he Só-lò lâu sâm-ke lai-é, pin ke thoi kì nâ vú-hi ke sṳ-ví sí ke chhìn-hìn; chhai ke-ngit, Só-lò ke kiûn-chhui chhiòn-phu chan-sí.
[7] Yâ-sṳ̂-lie̍t sân-lak ke-phién lâu Yok-tan-hò tûng-phién ke Yî-set-lie̍t-ngìn khon-tó Yî-set-lie̍t ke kiûn-chhui chhiòn-phu thò-chéu, yu khon-tó Só-lò lâu kì ke-têu lai-é lûng-chúng chan-sí, chhiu thò-nan lì-khôi kì-têu ke sàng; Fî-li-sṳ-ngìn chhiu lòi cham-liâng, he̍t chhai ke-têu sàng.
[8] Thi-ngi ngit, Fî-li-sṳ-ngìn hi pok sí-ngìn ke chan-sâm; kì-têu fat-hien Só-lò lâu kì sâm-ke lai-é ke sṳ̂-thí vang chhai Kî-li-pô-sân,
[9] chhiu to̍k-hâ Só-lò ke thèu, pok-thet kì ke vú-hi. Kì-têu phai-ngìn to Fî-li-sṳ kok-thi hi, hiong kì-têu ke ngiéu-siong lâu ngìn-mìn po-ko liá sêu-sit.
[10] Kì-têu chiông Só-lò ke vú-hi piong chhai Â-sṳ̂-thâ-liu̍k ńg-sṳ̀n meu-tú, chiông kì ke sṳ̂-thí tâng chhai Pak-Sân ke sàng-chhiòng táng.
[11] Kî-lie̍t thi-khî Ngâ-pí-sàng ke ngìn-mìn yit thâng-tó Fî-li-sṳ-ngìn tui Só-lò só-cho ke sṳ,
[12] kì-têu tông-chûng só-yû ke yúng-sṳ chhiu chhut-fat, hàng kûi-ya, lòi-to Pak-Sân. Kì-têu tui sàng-chhiòng táng chiông Só-lò lâu kì ke-têu lai-é ke sṳ̂-thí nâ hâ-lòi, tai-chón Ngâ-pí, chhai ke-vi sêu-thet.
[13] Kì-têu chiông hài-kut chong chhai sàng-tú ke liû-su hâ, yèn-heu kim-sṳ̍t chhit-ngit.