[1] Lióng ngit-heu, Thai-ví tai kì ke phu-ha chón-to Sé-kiet-lâ. Â-mâ-li̍t-ngìn yí-kîn chhîm-fam Yù-thai nàm-phién, chin-kûng Sé-kiet-lâ. Kì-têu sêu-thet sàng-sṳ,
[2] chiông só-yû ke fu-ńg, hàn-yû sàng-tú só-yû ke ngìn, mò-lun thai-se chhiòn-phu chok-chéu, chúng-he mò chhṳ̀-thet.
[3] Thai-ví lâu kì ke phu-ha yit to, fat-hien sàng yí-kîn sêu-thet, kì-têu ke pû-ngiòng chṳ́-ńg chhiòn-phu pûn-ngìn chok-chéu,
[4] chhiu thai-sâng chhin kieu, kieu-to mò hi-li̍t.
[5] Thai-ví ke lióng-ke pû-ngiòng — Yâ-sṳ̂-lie̍t-ngìn Â-hî-nôn lâu Nâ-pa ke koá-fu Kâ-me̍t-ngìn Oi-pí-kâi, ya pûn-ngìn chok-chéu.
[6] Thai-ví ke sîm-chhìn fî-sòng chho̍k-kip, yîn-vi kì ke phu-ha vi chṳ́-ńg chhin kân-khú, chhiu kóng oi yung sa̍k-thèu tá-sí kì; chúng-he Thai-ví yí-kho Song-chú — kì ke Song-ti, sîm-kôn chhiu kông-khiòng.
[7] Thai-ví tui Â-hî-mí-le̍t ke lai-é chi-sṳ̂ Â-pí-â-thâ kóng: “Chiông yî-fut-tet tai-to liá-vi lòi!” Â-pí-â-thâ chhiu cheu kì ke fûn-fu hi-cho.
[8] Thai-ví khiù-mun Song-chú, kóng: “Ngài yin-kôi hi tûi ke-têu chhîm-fam ke ngìn mò? Ngài nèn kiuk-tó kì-têu mò?” Song-chú en-kóng: “Ngì hi tûi. Ngì yit-thin kiuk tet-tó, ya voi kiu-chón ngì ke ngìn.”
[9] Só-yî, Thai-ví lâu kì ke phu-ha liuk-pak ngìn chhut-fat hi to Pí-sô-hâi; yû yit phu-fun ngìn liù chhai ke-vi.
[10] Thai-ví tai-tén si-pak ngìn ki-siu̍k tûi-tén hi, khì-thâ lióng-pak ngìn yîn-vi tông-khioi, tông-thiám, mò fap-thu ko Pí-sô-hâi, chhiu liù chhai heu-poi.
[11] Thai-ví ke phu-ha chhai yâ-thi fat-hien yit-ke Âi-khi̍p ke se-lai-é, chhiu tai kì hi kien Thai-ví. Kì-têu pûn kì sṳ̍t-vu̍t lâu súi,
[12] ya pûn kì yit-si̍t-é vù-fâ-kó piáng lâu lióng-te phù-thò-piáng. Kì sṳ̍t-thet yî-heu, chhiu fî-fu̍k ngièn-hi; yîn-vi kì yí-kîn sâm-ngit sâm-ya mò-sṳ̍t, mò-lîm.
[13] Thai-ví mun kì: “Ngì ke chú-ngìn he má-ngìn? Ngì tui nai-vi lòi?” Kì en-kóng: “Ngài he Âi-khi̍p-ngìn, he Â-mâ-li̍t-ngìn ke nù-chhòi. Yîn-vi ngài sâm-ngit chhièn pot phiang-é, chú-ngìn chhiu chiông ngài vok chhai liá-vi.
[14] Ngài-têu chhîm-fam Yù-thai nàm-phu Kî-li-thì ke thú-thi lâu Kâ-le̍t-chhu̍k ke thú-thi; ngài-têu ya chiông Sé-kiet-lâ-sàng sêu-thet.”
[15] Thai-ví mun kì: “Ngì ngien-yi tai ngài hi kiuk ke-têu chhîm-lio̍k ke Â-mâ-li̍t-ngìn mò?” Kì kóng: “Na-he ngì chṳ́-tén Song-ti ke miàng tap-yin m̀ chhṳ̀ ngài, ya m̀ chiông ngài kâu-pûn ngài ke chú-ngìn, ngài ngien-yi tai ngì hi.”
[16] Chhiu án-ngiòng, kì tai-tén Thai-ví hi kiuk kì-têu. Ke-têu chhîm-lio̍k ke Â-mâ-li̍t-ngìn fûn-san to mân-phien he, yu sṳ̍t yu lîm, tông fôn-hí khin-chuk, yîn-vi kì-têu tui Fî-li-sṳ lâu Yù-thai chhióng-lòi ke chhòi-vu̍t tông-tô.
[17] Thi-ngi ngit tá-chó, Thai-ví kûng-tá kì-têu, yit-chhṳ̍t tá-to lìm-am-é; thi̍t-ngìn chhù-liáu si-pak ke khì lo̍k-thò ke heu-sâng ngìn yî-ngoi, mò yit-ke chéu-thet.
[18] Thai-ví kiu-chón Â-mâ-li̍t-ngìn chhióng-chéu ke ngìn lâu chhòi-vu̍t: Kì kiu-tó kì lióng-ke pû-ngiòng,
[19] kiu-tó só-yû phu-ha ke chṳ́-ńg, chhióng-chón só-yû pûn Â-mâ-li̍t-ngìn chhióng-chéu ke chhòi-vu̍t, mò yit-hong tûng-sî sṳt-thet.
[20] Thai-ví ya chhióng-chón só-yû ke yòng-khiùn lâu ngiù-khiùn; kì ke phu-ha kiuk-tén thèu-sâng hàng chhai thèu-chhièn, kóng: “Liá-têu chhiòn-phu he Thai-ví ke!”
[21] Mò kí-kiú, Thai-ví chón-to lióng-pak ngìn thìn-liù ke só-chhai; liá-têu ngìn tông-thiám mò fap-thu thèn kì khiung-ha hi, liù chhai Pí-sô-hâi. Kì-têu chhut-lòi ngiàng-chiap Thai-ví lâu kì ke phu-ha; Thai-ví ya chhîn-chhiet lâu kì-têu chhiáng-ôn.
[22] Chúng-he yû-têu lâu Thai-ví khiung-ha hi ke he lù-màn-é lâu fái-sîm ke ngìn; kì-têu kóng: “Liá-têu ngìn mò lâu ngài-têu khiung-ha hi, ngài-têu m̀-hó chiông chhióng chón-lòi ke chan-li-phín pûn-pûn kì-têu. Tân-tân chiông kì-têu ke pû-ngiòng, chṳ́-ńg vàn kì-têu thu chón-hi chhiu hó lé!”
[23] Chúng-he Thai-ví kóng: “Thi-hiûng â, ngài-têu cho-m̀-tet án-ngiòng chhú-lî Song-chú só su-pûn ngài-têu ke; yîn-vi Kì pó-fu ngài-têu phìn-ôn, yu sṳ́ ngài-têu tá-yàng ke-têu chhîm-lio̍k-chá.
[24] Mò ngìn voi thùng-yi ngì-têu ke fa! Só-yû ke tûng-sî tak-sà yû-fun: Liù chhai heu-fông khon-sú vú-hi ke lâu chhut-chan ke yin-kôi phiàng-fûn chan-li-phín.”
[25] Thai-ví chiông liá-ke kûi-kí thin-cho thiàu-li; liá thiàu-li Yî-set-lie̍t-ngìn tui ke-ngit yit-chhṳ̍t chûn-sú hâ-hi.
[26] Thai-ví chón-to Sé-kiet-lâ yî-heu, chiông chhióng chón-lòi ke chhòi-vu̍t nâ yit phu-fun sung-pûn kì ke phèn-yû, chhiu-he Yù-thai ke-têu liâng-chhiu, kóng: “Liá-têu lî-vu̍t he ngài-têu tui Song-chú ke thi̍t-ngìn ke-vi chhióng chón-lòi ke.”
[27] Thai-ví sung lî-vu̍t pûn Pak-thi̍t-li ke ngìn, Yù-thai nàm-phu Lâ-ma̍t ke ngìn, yu pûn Ngâ-thì-ngí,
[28] Â-lò-ngí, Sit-ma̍t, Yî-sṳ̍t-thì-mo̍k,
[29] Lâ-ha̍p-le̍t liá-têu sàng-sṳ ke ngìn, ya pûn Yâ-lâ-me̍t-chhu̍k lâu Kî-nì-chhu̍k liá-têu sàng-sṳ ke ngìn,
[30] yu pûn he̍t chhai Hò-ngí-mâ, Kô-lâ-sân, Â-tha̍t
[31] lâu Hî-pak-lùn liá-têu sàng-sṳ ke ngìn. Thai-ví lâu kì phu-ha hi-ko ke só-chhai, kì chhiòn-phu sung lî-vu̍t pûn kì-têu.