[1] Fî-li-sṳ-ngìn seu-si̍p kiûn-pîn chhai Yù-thai ke Sô-kô-sàng, chún-phi siông-chhṳ̀. Kì-têu ôn-yàng chhai Sô-kô lâu Â-sî-kâ chûng-kiên ke Yî-fut-Thai-mén.
[2] Thùng-sṳ̀ Só-lò lâu Yî-set-lie̍t-ngìn chhi-si̍p, chhai Yî-lâ sân-lak ôn-yàng, chhai ke-vi chún-phi lâu Fî-li-sṳ-ngìn siông-chhṳ̀.
[3] Fî-li-sṳ-ngìn khî chhai yit-ke sân-táng, Yî-set-lie̍t-ngìn khî chhai nang-ngoi yit-ke sân-táng, tûng-ông kak-tén yit-ke sân-lak.
[4] Yû yit-ke Kâ-thi̍t-sàng ke ngìn, miàng ôn-to Kô-li-â, tui Fî-li-sṳ yàng chhut-lòi, hiong Yî-set-lie̍t-ngìn thiâu-chan. Liá-ke ngìn kô chhâ-m̀-tô sâm kûng-chhak,
[5] chok-tén yû thùng lìn-phién ke chan-kap, thai-yok ńg-sṳ̍p-chhit kûng-kîn chhûng, thèu tai thùng-khûi,
[6] kiok-pí ya yung thùng-kap pó-fu tén. Kì ke kiên-thèu pà-tén yit-kî thùng cho ke tón chhiông.
[7] Kì ke sú nâ-tén chhòng chhiông, chhiông-piang chhiong chṳt-pu-kî ke chhâ-sîm án-chhû, chhiông-thèu chhiu yû chhit kûng-kîn chhûng. Yû yit-ke pîn, nâ-tén kì ke tún-phài, chhai kì thèu-chhièn khôi-lu.
[8] Kô-li-â khî-tén, hiong Yî-set-lie̍t-ngìn ke kiûn-chhui hêm-kóng: “Ngì-têu chhai ke-vi cho-má-ke? Pài-chhṳn sióng-oi siông-chhṳ̀ he-mò? Ngài he Fî-li-sṳ-ngìn; ngì-têu he Só-lò ke nù-chhòi! Sién yit-sà ngìn chhut-lòi lâu ngài tá khon-é!
[9] Na-he kì tá-yàng, chhṳ̀-thet ngài, ngài-têu chhiu cho ngì-têu ke nù-chhòi; na-he ngài yàng lé, chhṳ̀-thet kì, ngì-têu chhiu cho ngài-têu ke nù-chhòi fu̍k-sṳ ngài-têu.”
[10] Ke Fî-li-sṳ-ngìn yu kóng: “Kîm-pû-ngit ngài hiong Yî-set-lie̍t kiûn-chhui thiâu-chan! Ngì-têu kám phai-ngìn chhut-lòi lâu ngài tá mò!”
[11] Só-lò lâu Yî-set-lie̍t kiûn-chhui thâng-tó Fî-li-sṳ-ngìn liá-têu fa chhiòn-phu chhin-kiâng.
[12] Thai-ví he Yù-thai ke Pak-li-hèn-sàng Yî-fap-thâ-ngìn Yâ-sî ke lai-é. Yâ-sî yû pat-ke lai-é. Só-lò cho vòng ke sṳ̀, Yâ-sî yí-kîn chhin-ló lé.
[13] Yâ-sî sâm-ke thai lai-é thèn Só-lò hi siông-chhṳ̀: Chui-thai ke ôn-to Yî-li-ap, thi-ngi ke ôn-to Â-pí-nâ-tha̍t, thi-sâm ke ôn-to Sâ-mâ.
[14] Thai-ví he chui-se ke lai-é. Liá sâm-ke â-kô lâu Só-lò khiung-ha ke sṳ̀,
[15] Thai-ví yû-sṳ̀ chhai Só-lò ke-vi, yû-sṳ̀ chón Pak-li-hèn thoi â-pâ chóng-yòng.
[16] Ke Fî-li-sṳ-ngìn tak chêu-sṳ̀n tak am-pû chhut-lòi hip Yî-set-lie̍t-ngìn lòi siông-chhṳ̀; án-ngiòng yû si-sṳ̍p ngit kiú.
[17] Yû yit-ngit, Yâ-sî tui kiâ lai-é Thai-ví kóng: “Tai sṳ̍p kûng-kîn phoi-hó ke ma̍k-chhon lâu sṳ̍p-chak piáng, hi kiûn-yàng khon ngiâ sâm-ke â-kô!
[18] Ngì chiông liá sṳ̍p-te ngiù-nen-piáng sung-pûn chṳ́-fî-kôn. Hi khon ngì ke-têu â-kô ke chhìn-khóng, yu oi tai yit-yong tûng-sî chón-lòi, chṳn-mìn ngì yû khon-tó kì-têu, kì-têu yit-chhiet phìn-ôn.
[19] Só-lò, ngì sâm-ke â-kô lâu só-yû Yî-set-lie̍t ke kiûn-chhui, chhiòn-phu chhai Yî-lâ sân-lak lâu Fî-li-sṳ-ngìn siông-chhṳ̀.”
[20] Thi-ngi ngit, Thai-ví tá-chó hong-hí-lòi, chiông yòng-khiùn kâu-pûn phe̍t-ngìn chóng, yèn-heu cheu Yâ-sî ke fûn-fu tai-tén sṳ̍t-vu̍t chhut-fat. Kì to kiûn-yàng ke sṳ̀, Yî-set-lie̍t-ngìn tú-hó chhut-hi chan-chhòng, thai-sâng hêm, chún-phi chok-chan;
[21] Fî-li-sṳ-ngìn lâu Yî-set-lie̍t-ngìn ke kiûn-chhui mien-tui-mien pài-chhṳn hó-se.
[22] Thai-ví chiông sṳ̍t-vu̍t liù chhai pú-kip kôn ke-vi, chéu-to kiûn-chhui thèu-chhièn chhìm kiâ-kô, mun kì-têu ke chhìn-hìn ngióng-pân.
[23] Kì lâu kiâ-kô tông kóng-tén fa ke sṳ̀, Kâ-thi̍t-sàng ke Fî-li-sṳ-ngìn Kô-li-â chéu ko-lòi, chhiong yî-chhièn án-ngiòng hip Yî-set-lie̍t-ngìn lòi siông-chhṳ̀; Thai-ví chhiòn-phu yû thâng-tó.
[24] Yî-set-lie̍t-ngìn yit khon-tó Kô-li-â, chhiu kiâng-to kiak-kiak chéu-khôi.
[25] Ko-hi, kì-têu chhòn-fa kóng: “Ngì khon ke-chak ngìn! Ngì thâng, kì chhai ke chhin ma Yî-set-lie̍t-ngìn! Vòng kóng, chhṳ̀-sí Kô-li-â ke ngìn voi tet-tó chhin-tô chhòi-sán cho chióng-sóng, vòng ke moi-é ya oi ka-pûn kì, kiâ-pâ ke kâ-chhu̍k ya m̀-sṳ́ na̍p-soi.”
[26] Thai-ví mun kì sùn-thèu ke ngìn kóng: “Na yû ngìn chhṳ̀-sí ke Fî-li-sṳ-ngìn, chhù-thet Yî-set-lie̍t ke siû-yu̍k, kì voi tet-tó má-ke chióng-sóng? To-tái ke mò su kot-lî ke Fî-li-sṳ-ngìn he má-ngìn? Ngióng-kám méu-sṳ yún-sên Song-ti ke kiûn-chhui!”
[27] Kì-têu chhiu cheu siên-chhièn ke fa lâu Thai-ví kóng, chhṳ̀-sí Kô-li-â ke ngìn voi tet-tó má-ke chióng-sóng.
[28] Thai-ví ke thai-kô Yî-li-ap thâng-tó Thai-ví lâu ke-têu ngìn kóng-fa, chhiu tông mò fôn-hí, tui Thai-ví kóng: “Ngì lòi liá-vi cho-má-ke? Má-ngìn thoi ngì chhai yâ-thi chóng ke kí-chak yòng? Ngì liá-ke kúi-lìn-chîn! Án kiêu-ngau, chhùn-sîm put-liòng! Ngì chéu-lòi liá khon ngìn siông-chhṳ̀ he-mò!”
[29] Thai-ví kóng: “Ngài cho m̀-chho̍k má-ke nè? Kám-kóng ngài mun khon-é ya cho-m̀-tet?”
[30] Thai-ví yu hi mun nang-ngoi yit-sà khiung-yong ke mun-thì. Kì tak-pái mun, tet-tó ke fì-tap lûng-chúng khiung-yong.
[31] Yû ngìn thâng-tó Thai-ví mun ke fa, chhiu hi lâu Só-lò kóng; Só-lò chhiu ham Thai-ví lòi.
[32] Thai-ví tui Só-lò kóng: “Ngài-têu thai-kâ m̀-sṳ́ kiâng ke Fî-li-sṳ-ngìn! Ngiâ phu̍k-ngìn chhiu voi hi lâu kì piang!”
[33] Só-lò en-kóng: “Cho-m̀-tet, ngì ngióng-pân voi tá-tet kì yàng nè? Ngì he yit-ke se-ngìn-è, kì he yit-ke tui se chhiu siông-chhṳ̀ to-thai ke kiûn-ngìn!”
[34] Thai-ví tui Só-lò kóng: “Ngiâ phu̍k-ngìn he vi â-pâ chóng-yòng ke. Yû-sṳ̀ sṳ̂-é ya-he yùng voi lòi, chok-chéu se yòng-è,
[35] ngài chhiu kiuk kì, tá kì, kiu-chón ke-chak se-yòng. Na-he kì kûng-kit ngài, ngài chhiu khiú kì ke sî, chiông kì tá-sí.
[36] Ngiâ phu̍k-ngìn sṳt tá-sí sṳ̂-é lâu yùng, ngài khiung-yong yû phan-fap chhṳ̀-sí ke mò su kot-lî, méu-sṳ yún-sên Song-ti kiûn-chhui ke Fî-li-sṳ-ngìn.
[37] Song-chú sṳt kiu ngài thot-lì sṳ̂-é lâu yùng ke cháu, Kì ya voi kiu ngài thot-lì ke Fî-li-sṳ-ngìn ke sú.” Só-lò tui Thai-ví kóng: “Hó! Ngì hi â! Ngien Song-chú lâu ngì khiung-ha.”
[38] Só-lò chhiu chiông kì chhṳ-kâ ke chan-kap pûn Thai-ví chok — yû yit-táng thùng-khûi lâu yit-liâng yû lìn-phién ke chan-kap. Kì chiông thùng-khûi tai chhai Thai-ví thèu-nà táng.
[39] Thai-ví chiông Só-lò ke tô-é kiê chhai chan-kap piên, sióng-oi hàng, chúng-he mò phan-fap hàng, yîn-vi kì mò si̍p-koan chok liá-têu. Kì tui Só-lò kóng: “Ngài mò phan-fap chok liá-têu tûng-sî hi siông-chhṳ̀, ngài chok m̀-koan.” Kì chhiu chiông chan-kap chhiòn-phu thot-thet.
[40] Thai-ví nâ-tén kì chóng-yòng ke koái-kun-é, yu tui hò-pa sùn ngiâm ńg-lia̍p kông-va̍t ke sa̍k-é piong chhai chóng-yòng ngìn yung ke thoi-é tú, yèn-heu nâ fin sa̍k-é ke sok-è chhut-hi mien-tui ke Fî-li-sṳ-ngìn.
[41] Ke Fî-li-sṳ-ngìn khôi-sṳ́ hiong Thai-ví hàng-tén ko-lòi, thoi kì nâ tún-phài ke ngìn hàng chhai kì thèu-chhièn.
[42] Fî-li-sṳ-ngìn khon chhîn-chhú Thai-ví ke sṳ̀, chhiu méu-sṳ kì, yîn-vi Thai-ví he yit-ke mien-set fùng-yun, sṳ̂-vùn ke se-ngìn-è thin-thin.
[43] Kì mun Thai-ví: “Ke-kî koái-kun-é he cho-má-ke yung ke? Ngì chiông ngài khon-cho yit-chak kiéu-è he-mò?” Só-yî kì chṳ́ chhṳ-kâ ke sṳ̀n-mìn chu-chú Thai-ví, vú-yu̍k Thai-ví, kóng:
[44] “Lòi â! Ngài oi chiông ngì ke sṳ̂-thí vok-pûn fî-niâu lâu yâ-chhu sṳ̍t!”
[45] Thai-ví en-kóng: “Ngì lòi chhṳ̀ ngài, he yung tô-é, chhòng chhiông lâu tón chhiông, chúng-he ngài chhṳ̀ ngì he fung Song-chú — Van-kiûn Ngièn-soi ke miàng; Kì chhiu-he ngì só méu-sṳ ke Yî-set-lie̍t kiûn-chhui ke Song-ti.
[46] Kîm-pû-ngit, Song-chú oi chiông ngì kâu chhai ngài sú-chûng. Ngài oi tá-yàng ngì, to̍k-hâ ngì ke thèu-nà. Ngài oi chiông Fî-li-sṳ kiûn-chhui ke sṳ̂-thí vok-pûn fî-niâu lâu yâ-chhu sṳ̍t. Án-ngiòng, phû-thiên-ha chhiu voi tî Yî-set-lie̍t yû yit-vi Song-ti;
[47] chhai liá-vi tak-ke ngìn ya chhiòn-phu voi tî Song-chú mò sî-yeu yung tô-é ya-he chhiông lòi chṳ́n-kiu Kì ke chṳ́-mìn. Yîn-vi chan-chên ke sû-yàng chhiòn khon Song-chú; Kì oi chiông ngì-têu kâu chhai ngài-têu ke sú-chûng.”
[48] Kô-li-â kín-hàng kín-khiûn Thai-ví; Thai-ví kiak-kiak hiong Fî-li-sṳ-ngìn chhṳn chhièn chéu-tén hi.
[49] Kì chhûn-sú tui thoi-tú nâ-chhut yit-lia̍p sa̍k-é, yung sok-è chiông sa̍k-é hiong Kô-li-â fin ko-hi. Sa̍k-é tá-tó Kô-li-â ke ngiak-thèu, tá-lan kì ke thèu-nà hok, Kô-li-â chhiu vang hâ-hi phu̍k-tén.
[50] Án-ngiòng, Thai-ví mò yung tô-é, chṳ́ yung fin sa̍k-é ke sok-è lâu yit-lia̍p sa̍k-é chhiu chiông Kô-li-â tá-vang.
[51] Thai-ví chéu ko-hi, tha̍p chhai Kô-li-â sṳ̂n-song, chiông Kô-li-â ke tô-é tui tô-seu tú pâng-chhut lòi, chhṳ̀-sí kì, to̍k-hâ kì ke thèu-nà. Fî-li-sṳ-ngìn khon-tó kì-têu ke yîn-hiùng sí-thet, chhiu chhiòn-phu thò-chéu.
[52] Yî-set-lie̍t lâu Yù-thai ke kiûn-chhui chhai heu-poi thai-sâng chhin hêm, chhin chhṳ̀, yit-chhṳ̍t tûi-tó Kâ-thi̍t lâu Yî-kiet-lùn ke sàng-mùn. Chhai Sâ-lâ-yîm ke-thiàu lu-song, sí-sông ke Fî-li-sṳ-ngìn mân-phien he, chhṳ̍t-to Kâ-thi̍t lâu Yî-kiet-lùn.
[53] Yî-set-lie̍t-ngìn tûi-sat Fî-li-sṳ-ngìn chón-lòi yî-heu, chhiu chhióng Fî-li-sṳ-ngìn ke yàng-thi.
[54] Thai-ví tai-tén Kô-li-â ke thèu-nà to Yâ-lu-sat-lâng, chiông Kô-li-â ke vú-hi liù chhai kì chhṳ-kâ ke chong-phùng tú.
[55] Só-lò khon Thai-ví hi tá Kô-li-â, chhiu mun kì ke ngièn-soi Ap-nì-ngí kóng: “Ap-nì-ngí, ke heu-sâng ngìn he má-ngìn ke lai-é?” Ap-nì-ngí en kì: “Koet-vòng, ngài fat-sṳ kóng, ngài m̀-tî.”
[56] Vòng kóng: “Ngì hi chhà khon-é ke heu-sâng ngìn he má-ngìn ke lai-é!”
[57] Thai-ví chhṳ̀-thet Kô-li-â chón-to kiûn-yàng yî-heu, Ap-nì-ngí tai kì hi kien Só-lò, Thai-ví hàn nâ-tén Kô-li-â ke thèu-nà.
[58] Só-lò mun kì: “Heu-sâng ngìn, ngì he má-ngìn ke lai-é?” Thai-ví en-kóng: “Ngài he ngiâ phu̍k-ngìn Pak-li-hèn-ngìn Yâ-sî ke lai-é.”