[1] Yû yit-ngit, Yok-nâ-tân tui thoi kì nâ vú-hi ke heu-sâng sṳ-ví kóng: “Ngài-têu thêu-thêu ko-hi ke-phién, ngi̍p-hi Fî-li-sṳ-ngìn ke chu-fòng yàng!” Chúng-he kì mò lâu kiâ-pâ Só-lò kóng.
[2] Liá-sṳ̀ Só-lò tú-hó chhai Kî-pí-â sàng-ngoi, thìn-liù chhai Mí-kî-lùn ke yit-thèu sa̍k-liù-su hâ. Thèn kì ke thai-yok yû liuk-pak ngìn.
[3] Chhai kì-têu chûng-kiên yû chi-sṳ̂ Â-hî-â, chok-tén yî-fut-tet. (Kì he Yî-kâ-pok ke hiûng-thi Â-hî-thut ke lai-é. Â-hî-thut he Fî-nì-ha̍p ke lai-é, he chhai Sṳ-lò cho Song-chú ke chi-sṳ̂ Yî-li ke sûn-é.) Mò ngìn tî Yok-nâ-tân lì-khôi yàng-thi.
[4] Yok-nâ-tân oi thêu-thêu ngi̍p-hi Fî-li-sṳ-ngìn ke chu-fòng yàng, yit-thin oi kîn-ko Me̍t-mat chhut-ngi̍p ke lu-héu. Lu-héu lióng-phién yû lióng-chho ki-é hìn ke thai ngàm-sa̍k, yit-chho ham-cho Pô-siet, yit-chho ham-cho Sî-nì;
[5] yit-chho chhai lu-héu pet-phién hiong Me̍t-mat, yit-chho chhai lu-héu nàm-phién hiong Kâ-pâ.
[6] Yok-nâ-tân tui kì ke heu-sâng sṳ-ví kóng: “Lòi â, ngài-têu thêu-thêu ngi̍p-hi ke-têu mò su kot-lî ke ngìn ke chu-fòng yàng! Khó-nèn Song-chú voi pông-chhu ngài-têu. Na-he Kì pông-chhu ngài-têu, má-ngìn nèn tí-tóng ngài-têu nè? Put-kón ngài-têu ngìn-su kí-tô, Kì yit-thin voi sṳ́ ngài-têu tá-yàng.”
[7] Ke sṳ-ví en-kóng: “Mò-lun ngì sióng cho-má-ke, ngài thin-chho̍k voi thèn-tén ngì hi!”
[8] Yok-nâ-tân kóng: “Hó! Ngài-têu ko-hi, ku-yi pûn Fî-li-sṳ-ngìn khon-tó ngài-têu.
[9] Na-he kì-têu hêm ngài-têu liù chhai liá-vi tén kì-têu ko-lòi, ngài-têu chhiu chhai liá-vi tén.
[10] Na-he kì-têu hêm ngài-têu ko-hi, ngài-têu chhiu hi; ke chhiu-he Song-chú oi-pûn ngài-têu tá-yàng ke ki-ho lé.”
[11] Só-yî, kì lióng-sà ku-yi pûn Fî-li-sṳ ke chu-fòng pîn khon-tó. Fî-li-sṳ-ngìn kóng: “Ngì khon, yû Hî-pak-lòi-ngìn tui kì-têu khong ke khûng-tú chhut-lòi lé!”
[12] Kì-têu chhiu tui Yok-nâ-tân lâu ke sṳ-ví hêm-kóng: “Ngì-têu ko-lòi â, ngài-têu yû sṳ lâu ngì-têu kóng ô!” Yok-nâ-tân tui kì ke sṳ-ví kóng: “Thèn-tén ngài sông-hi! Song-chú yí-kîn chiông kì-têu kâu-pûn Yî-set-lie̍t-ngìn lé.”
[13] Yok-nâ-tân phà-sông chhut-ngi̍p ke lu-héu; kì ke sṳ-ví thèn-tén kì. Yok-nâ-tân chiông Fî-li-sṳ-ngìn tá-to vang-kòng vang-thoi; sṳ-ví chhiu thèn-tén lòi chiông kì-têu chhṳ̀-thet.
[14] Liá thi-yit pái ke kûng-kit, Yok-nâ-tân lâu kì ke sṳ-ví chhiu chhai si-fûn chṳ̂-yit kûng-khién fat ke só-chhai, chhṳ̀-thet ngi-sṳ̍p sà chó-yu.
[15] Só-yû chhai yàng-thi pin thièn-yâ ke Fî-li-sṳ-ngìn chhiòn-phu fî-sòng chho̍k-kiâng; chu-fòng pîn lâu kûng-kit ke kiûn-chhui ya chhiòn-phu pi̍t-pi̍t-chhat; thi ya chṳ́n-thung, kì-têu kiâng-to mò-kat mò-sat!
[16] Só-lò ke sú-mong pîn chhai Phien-ngâ-mén thi-khî ke Kî-pí-â khon-tó Fî-li-sṳ-ngìn kiâng-to siông-châng thò-chéu.
[17] Só-lò chhiu tui thèn kì ke ngìn kóng: “Hi tiám-son kiûn-chhui, khon má-ngìn mò-chhôi!” Kì-têu chhà-chhut Yok-nâ-tân lâu kì ke sṳ-ví mò-chhôi.
[18] Só-lò tui chi-sṳ̂ Â-hî-â kóng: “Chiông Song-ti ke yok-khui kông ko-lòi!” (Ke-sṳ̀, Song-ti ke yok-khui chhai Yî-set-lie̍t-ngìn chûng-kiên.)
[19] Só-lò tông tui chi-sṳ̂ kóng-fa ke sṳ̀, Fî-li-sṳ kiûn-yàng ye̍t-lòi ye̍t-lon; Só-lò tui chi-sṳ̂ kóng: “Ngài-têu lòi m̀-chhat khiù-mun Song-chú lé!”
[20] Só-yî Só-lò tai-liâng phu-chhui lòi-to chan-chhòng; kì-têu chhiu khon-tó Fî-li-sṳ-ngìn lon-to nùng kâu-kâu, fu-siông chhàn-sat.
[21] Thèu-pái thèu-kho Fî-li-sṳ-ngìn ke Hî-pak-lòi-ngìn, chhiu-he yit-chhṳ̍t chhai kì-têu yàng-tú ke Hî-pak-lòi-ngìn, liá-ha chón ko-lòi chhâm-kâ Só-lò lâu Yok-nâ-tân ke Yî-set-lie̍t kiûn-chhui.
[22] Ke-têu khong chhai Yî-fap-lièn sân-khî ke Yî-set-lie̍t-ngìn thâng-tó Fî-li-sṳ-ngìn thò-chéu lé, ya chhiòn-phu chhut-lòi tûi-sat kì-têu,
[23] yit-chhṳ̍t tá-to Pak-Â-vùn ke-phién. Án-ngiòng, ke-ngit Song-chú chhiu kiu-tó Yî-set-lie̍t-ngìn.
[24] Ke-ngit, Yî-set-lie̍t-ngìn yu khioi yu tú-kî, yîn-vi Só-lò sṳt chhai ngìn-mìn mien-chhièn fat-sṳ kóng: “Kîm-pû-ngit, chhai ngài hiong thi̍t-ngìn po-sù yî-chhièn má-ngìn sṳ̍t tûng-sî, má-ngìn chhiu su chu-chú.” Só-yî, kûi-ngit mò ngìn kám sṳ̍t tûng-sî.
[25] Ke-yông-sṳ̀, su-lìm tú lièn thi-nài ya yû phûng-thòng.
[26] Ngìn-mìn chin-ngi̍p su-lìm, khon-tó phûng-thòng liù hâ-lòi, chúng-he mò ngìn kám chhûn-sú nâ-lòi sṳ̍t, yîn-vi thai-kâ kiâng Só-lò só-fat ke sṳ.
[27] Chúng-he Yok-nâ-tân mò thâng-tó kiâ-pâ chhai ngìn-mìn mien-chhièn só-fat ke sṳ, só-yî chhûn-chhut koái-kun-é, chhap-ngi̍p yit-chak phûng-teu tú, vun phûng-thòng lòi-sṳ̍t. Kì ngiàm-sṳ̀ kám-kok kâ chhin yû chîn-sṳ̀n.
[28] Yû ngìn lâu kì kóng: “Ngài-têu yu khioi yu tú-kî, chúng-he ngiâ-pâ kín-ko ngài-têu kóng: ‘Kîm-pû-ngit má-ngìn sṳ̍t tûng-sî, má-ngìn chhiu su chu-chú.’ ”
[29] Yok-nâ-tân kóng: “Ngâ-pâ só-fat ke sṳ chhin mò-lî, hoi-tó thai-kâ! Ngì khon, ngài sṳ̍t liá yit-si̍t-é phûng-thòng, kám-kok kâ chhin yû chîn-sṳ̀n!
[30] Tá-yàng thi̍t-ngìn heu, sṳ̍t chhióng-lòi ke sṳ̍t-vu̍t, chang voi chîn-sṳ̀n pak-phi, chhṳ̀-sí kien-tô ke Fî-li-sṳ-ngìn â!”
[31] Ke-ngit, Yî-set-lie̍t-ngìn tá-yàng Fî-li-sṳ-ngìn, tui Me̍t-mat yit-chhṳ̍t tá-tó Â-ngâ-lùn. Liá-sṳ̀, Yî-set-lie̍t-ngìn chhiòn-phu thiám-to sú-ngiôn kiok-lài;
[32] kì-têu ngiàm-sṳ̀ tui chan-li-phín tông-chûng khiên-chhut ngiù-yòng lâu se-ngiù-è, tông-chhòng chhiu chhṳ̀, ngiuk hàn tai-hiet chhiu nâ-lòi sṳ̍t.
[33] Yû ngìn hiong Só-lò po-ko kóng: “Khon nâ, ngìn-mìn sṳ̍t tai-hiet ke ngiuk, tet-chhui Song-chú lé!” Só-lò kóng: “Ngì-têu yû-chhui lé! Kiak-kiak chan yit-chak thai sa̍k-thèu to ngài liá-vi lòi!”
[34] Só-lò yu ha-lin kóng: “To ngìn-mìn ke-vi lâu kì-têu kóng, tak-sà oi chiông kì-têu ke ngiù-yòng kiuk ko-lòi, chhai liá-vi chhṳ̀ lòi sṳ̍t; chúng-he cho-m̀-tet sṳ̍t tai-hiet ke ngiuk tet-chhui Song-chú.” Só-yî, ke am-pû, ngìn-mìn chiông kì-têu ke ngiù-yòng kiuk ko-lòi, chhai ke-vi chhṳ̀.
[35] Só-lò vi Song-chú hí yit-chho chi-thàn; liá he kì só-hí ke thi-yit chho thàn.
[36] Só-lò tui kì ke phu-ha kóng: “Ngài-têu kîm-am-pû hâ-hi kûng-tá Fî-li-sṳ-ngìn, chhióng kì-têu ke tûng-sî, chhṳ̍t-to thiên-kông, chiông kì-têu chhṳ̀ chhiang-chhiang!” Kì-têu en-kóng: “Ngì ngin-vì thó-tong, chhiu án-ngiòng hi-cho!” Chúng-he chi-sṳ̂ kóng: “Ngài-têu yin-tông siên khiù-mun Song-ti!”
[37] Só-yî Só-lò khiù-mun Song-ti: “Ngài yin-kôi hâ-hi kûng-tá Fî-li-sṳ-ngìn mò? Ngì voi chiông kì-têu kâu chhai Yî-set-lie̍t-ngìn sú-chûng mò?” Chúng-he ke-ngit Song-ti mò en kì.
[38] Só-lò chhiu tui ngìn-mìn ke-têu liâng-chhiu kóng: “To liá-vi lòi, thiàu-chhà kîm-pû-ngit ngài-têu fam má-ke chhui.
[39] Ngài chṳ́-tén yún-sên Song-chú — Yî-set-lie̍t ke kiu-chú fat-sṳ: Fam-chhui ke ngìn yit-thin oi chhú-sí; chhiu-son he ngài ke lai-é Yok-nâ-tân ya khiung-yong oi sí.” Chúng-he mò yit-sà kám chhut-sâng.
[40] Só-yî Só-lò tui Yî-set-lie̍t ngìn-mìn kóng: “Ngì-têu khî chhai ke-vi; ngài lâu ngâ lai-é Yok-nâ-tân khî chhai liá-vi.” Ngìn-mìn tui Só-lò kóng: “Ngì ngin-vì thó-tong, chhiu án-ngiòng hi-cho!”
[41] Só-lò hiong Song-chú — Yî-set-lie̍t ke Song-ti kóng: “Kîm-pû-ngit Ngì ngióng m̀ en Ngì ke phu̍k-ngìn nè? Song-chú — Yî-set-lie̍t ke Song-ti â, na-he chhui chhai ngài ya-he ngâ lai-é Yok-nâ-tân, chhiáng yung vû-lìn en ngài; na-he chhui chhai Ngì ke chṳ́-mìn Yî-set-lie̍t-ngìn, chhiáng yung thú-mìn en ngài.” Kiet-kó chhû chhut-lòi ke he Yok-nâ-tân lâu Só-lò; ngìn-mìn chhiòn-phu mò sṳ.
[42] Só-lò kóng: “Chai chhû-chhiâm, khon he ngài, ya-he ngâ lai-é Yok-nâ-tân?” Kiet-kó chhû-chhut Yok-nâ-tân.
[43] Só-yî Só-lò mun kì: “Ngì cho má-ke sṳ â?” Yok-nâ-tân en-kóng: “Ngài yung koái-kun-é vun yit-si̍t-é phûng-thòng sṳ̍t. Ngài chhai liá-vi, ngài kâm-ngien sí!”
[44] Só-lò kóng: “Yok-nâ-tân nâ, na-he ngì mò sí, ngien Song-ti chhṳ̀-thet ngài!”
[45] Chúng-he ngìn-mìn tui Só-lò kóng: “Yok-nâ-tân vi Yî-set-lie̍t yàng-tó ví-thai ke sṳn-li, kám hó pûn kì sí? Cho-m̀-tet! Ngài-têu chṳ́-tén yún-sên Song-chú fat-sṳ: Thûng kì yit-thiàu thèu-nà-mô ya cho-m̀-tet. Kì kîm-pû-ngit só-cho ke he kho Song-ti ke pông-chhu.” Án-ngiòng, ngìn-mìn kiu-tó Yok-nâ-tân, pûn kì m̀-sṳ́ sí.
[46] Só-lò mò chai tûi-sat Fî-li-sṳ-ngìn; Fî-li-sṳ-ngìn chhiu chón chhṳ-kâ ke só-chhai hi lé.
[47] Só-lò kiên-ku Yî-set-lie̍t ke vòng-vi yî-heu, sòng-sòng hi kûng-tá si chû-vì ke sù-thi̍t: Kì lâu Mô-ap-ngìn, Â-mùn-ngìn, Yî-tûng-ngìn, Só-pâ ke-têu vòng, yî-khi̍p Fî-li-sṳ-ngìn siông-chhṳ̀. Mò-lun kì hi-to nai-vi chhiòn-phu tá-yàng.
[48] Só-lò siông-chhṳ̀ fî-sòng yúng-kám, sṳm-chṳ tá-yàng Â-mâ-li̍t-ngìn. Kì kiu Yî-set-lie̍t-ngìn thot-lì só-yû khî-fu kì-têu ke ngoi-chhu̍k ngìn.
[49] Só-lò ke lai-é yû Yok-nâ-tân, Yit-sṳ̂-ví, Ma̍k-kî-Sû-â. Kì ke chóng-ńg ôn-to Mí-lâ, thi-ngi ke moi-é ôn-to Mí-kap.
[50] Só-lò ke pû-ngiòng ôn-to Â-hî-nôn, he Â-hî-mâ-sṳ̂ ke moi-é. Kì kiûn-chhui ke ngièn-soi he kiâ-suk Nì-ngí ke lai-é Ap-nì-ngí.
[51] Só-lò ke â-pâ Kî-sṳ lâu Ap-nì-ngí ke â-pâ Nì-ngí chhiòn-phu he Â-phe̍t ke lai-é.
[52] Só-lò yit-sên-ngìn lâu Fî-li-sṳ-ngìn sòng-sòng yû kit-lie̍t ke chan-chên, só-yî kì yit fat-hien yû yúng-kám khiòng-chong ke ngìn, chhiu ham kì-têu lòi thèn kì.