[1] Mò kí-kiú, Fî-li-sṳ-ngìn seu-si̍p kiûn-chhui kûng-tá Yî-set-lie̍t-ngìn. Â-kit tui Thai-ví kóng: “Ngì yin-kôi tî, ngì lâu ngì ke phu-ha oi thèn ngài khiung-ha hi siông-chhṳ̀.”
[2] Thai-ví kóng: “Tông-yèn, ngài he ngì ke phu̍k-ngìn. Ngì chhṳ-kâ tî ngài nèn cho-má-ke.” Â-kit tui Thai-ví kóng: “Án-ngiòng, ngài oi ngì yit-sên-ngìn cho ngài ke sṳ-ví.”
[3] Sat-mû-ngí yí-kîn ko-sṳ̂n; Yî-set-lie̍t-ngìn chhiòn-phu vi kì ôi-sông, chiông kì chong chhai kì ke ku-hiông Lâ-mâ. Só-lò thèu-pái sṳt khiòng-pet só-yû siên-kû lâu hàng sià-su̍t ke lì-khôi Yî-set-lie̍t.
[4] Fî-li-sṳ-ngìn ke kiûn-chhui chhi-si̍p chhai Sû-ngiam-sàng fu-khiun ôn-yàng; Só-lò seu-si̍p Yî-set-lie̍t-ngìn chhai Kî-li-pô-sân ôn-yàng.
[5] Só-lò khon-tó Fî-li-sṳ-ngìn ke kiûn-chhui, sîm-kôn kiâng-to pi̍t-pi̍t-chhat,
[6] chhiu khiù-mun Song-chú yin-kôi ngióng-pân cho. Chúng-he Song-chú mò yung thok-mung, yu mò thûng-ko vû-lìn, me mò thûng-ko siên-tî fì-tap kì.
[7] Só-yî Só-lò min-lin kì ke kôn-yèn kóng: “Thoi ngài chhìm yit-ke siên-kû, ngài oi hi mun kì.” Ke-têu kôn-yèn en-kóng: “Chhai Yún-Tô-ngí yû yit-ke.”
[8] Só-yî Só-lò kói-pien kì ke mien-mau, chok phe̍t-yong ke sâm, chhai ngit-thèu lo̍k-sân heu lâu lióng-ke phu-ha hi kien ke fu-ngìn-kâ. Só-lò tui kì kóng: “Chhiáng vi ngài chok-fap, ngài chṳ́-thin yit-ke sí-ngìn, ngì chiông kì ke fùn chêu sông-lòi.”
[9] Ke fu-ngìn-kâ tui kì kóng: “Ngì yin-kôi tî Só-lò só cho-ko ke sṳ, kì khiòng-pet siên-kû lâu hàng sià-su̍t ke chhiòn-phu lì-khôi Yî-set-lie̍t. Ngì cho-má-ke oi ham-hoi ngài, hoi ngài mò-miang nè?”
[10] Só-lò tui kì fat-sṳ kóng: “Ngài chṳ́-tén yún-sên Song-chú tap-yin ngì: Ngì cho liá-sṳ, yit-thin m̀-voi su chit-fa̍t.”
[11] Ke fu-ngìn-kâ mun: “Ngì oi ngài chêu má-ngìn sông-lòi?” Só-lò kóng: “Chêu Sat-mû-ngí sông-lòi.”
[12] Tông fu-ngìn-kâ khon-tó Sat-mû-ngí ke sṳ̀, kì kiâng-to hêm hí-lòi, tui Só-lò kóng: “Ngì cho-má-ke màn-phien ngài? Ngì chhiu-he Só-lò â!”
[13] Vòng tui kì kóng: “M̀-sṳ́ kiâng! Ngì khon-tó má-ke?” Fu-ngìn-kâ en Só-lò kóng: “Ngài khon-tó yit-ke chhiong sṳ̀n-mìn ke ngìn tui thi tái-hâ sông-lòi.”
[14] Só-lò mun: “Kì he má-ke yong-é?” Fu-ngìn-kâ en-kóng: “He yit-ke ló-ngìn-kâ sông-lòi; kì chok chhòng-sâm.” Só-lò tî ke he Sat-mû-ngí, chhiu kiûng-kiûng kin-kin phu̍k chhai thi-song.
[15] Sat-mû-ngí mun Só-lò: “Ngì cho-má-ke chhàu ngài? Cho-má-ke chêu ngài sông-lòi?” Só-lò kóng: “Ngài yû thai châi-fo lé! Fî-li-sṳ-ngìn oi lâu ngài siông-chhṳ̀, Song-ti yu yí-kîn lì-khôi ngài. Kì m̀-hén chai thûng-ko siên-tî ya-he mung lòi en ngài. Só-yî ngài chang chhiáng ngì sông-lòi, khiù ngì chṳ́-sṳ ngài yin-kôi ngióng-pân cho.”
[16] Sat-mû-ngí kóng: “Ki-yèn Song-chú lì-khôi ngì, cho ngì ke tui-thi̍t, ngì cho-má-ke hàn-oi khiù-mun ngài?
[17] Song-chú hiong ngì só cho ke, Kì yí-kîn thûng-ko ngài ke choi lâu ngì kóng-ko lé; Song-chú yí-kîn chiông ngì ke vòng-koet chhióng chón-lòi, su-pûn phe̍t-ngìn — chhiu-he Thai-ví;
[18] yîn-vi ngì vì-poi Song-chú ke min-lin, mò chṳp-hàng Kì tui Â-mâ-li̍t-ngìn ke fun-nu, chiông kì-têu lâu kì-têu só-yû ke yit-chhiet chhiòn-phu sêu-me̍t; só-yî, kîm-pû-ngit Song-chú chang án-ngiòng tui-thai ngì.
[19] Song-chú yit-thin voi chiông ngì lâu Yî-set-lie̍t-ngìn kâu-pûn Fî-li-sṳ-ngìn. Thiên-kông-ngit, ngì lâu ngì ke-têu lai-é voi lòi lâu ngài khiung-ha; Song-chú yit-thin voi chiông Yî-set-lie̍t ke kiûn-chhui kâu-pûn Fî-li-sṳ-ngìn.”
[20] Só-lò pûn Sat-mû-ngí ke fa hak-tó, ngiàm-sṳ̀ vang hâ-lòi, chhiòn-sṳ̂n chhṳ̍t-chhṳ̍t chhai thi-song; yîn-vi kì yit-ngit yit-ya mò sṳ̍t tûng-sî, chhiu mò pan-ti̍t hi-li̍t.
[21] Ke fu-ngìn-kâ to Só-lò thèu-chhièn, khon-tó kì hak-to pan-sí, chhiu tui kì kóng: “Ngì khon! Ngì ke sṳ́-ńg thâng ngì ke fa, mo sâng-miang ke ngùi-hiám cho ngì só yêu-khiù ke sṳ.
[22] Liá-ha chhiáng ngì ya cheu sṳ́-ńg só yêu-khiù ke cho. Ngài vi ngì chú-têu tûng-sî sṳ̍t, ngì yit-thin oi sṳ̍t chang yû hi-li̍t hiong-chhièn hàng!”
[23] Só-lò m̀-hén; kì kóng kì mò-oi sṳ̍t tûng-sî. Chúng-he kì ke phu-ha lâu ke fu-ngìn-kâ chai-sâm khien kì sṳ̍t. Chui-heu, kì thâng kì-têu ke fa, tui thi-song hong-hí-lòi, chhô chhai mìn-chhòng táng.
[24] Ke fu-ngìn-kâ kón-kín chiông vuk-hâ ke yit-chak phì-phì ke se-ngiù-è chhṳ̀-thet, yu kiâu mien-fún, phoi têu-é vù-kau-piáng.
[25] Kì chiông sṳ̍t-vu̍t têu-to Só-lò lâu kì phu-ha mien-chhièn, kì-têu chhiu sṳ̍t. Ke am-pû kì-têu chhiu lì-khôi.