[1] Thai-ví to Nò-pak sàng, to chi-sṳ̂ Â-hî-mí-le̍t ke-vi. Â-hî-mí-le̍t tông kín-chông chhut-lòi kien kì, kóng: “Ngì cho-má-ke yit-sà to ngài liá-vi lòi? Ngióng-pân mò ngìn thèn ngì lòi?”
[2] Thai-ví en chi-sṳ̂ Â-hî-mí-le̍t kóng: “He vòng min-lin ngài to ngì liá-vi lòi ke. Vòng lâu ngài kóng, m̀-hó pûn ngìn tî kì phai ngài lòi liá-vi cho má-ke. Ngài ke phu-ha, ngài yí-kîn fûn-fu kì-têu to mêu-mêu só-chhai kien ngài.
[3] Liá-ha, ngì yû má-ke hó-sṳ̍t? Chhiáng pûn ngài ńg-chak piáng, ya-he phe̍t ke sṳ̍t-vu̍t.”
[4] Chi-sṳ̂ en Thai-ví kóng: “Ngài mò phû-thûng ke piáng, chṳ́-yû sṳn-piáng. Na-he ngì ke phu-ha chui-khiun mò chhîn-khiun ko fu-ngìn-kâ chhiu cho-tet nâ-hi.”
[5] Thai-ví en chi-sṳ̂ kóng: “Sṳ-sṳ̍t song, chhiu-son phìn-sòng chhut ngim-vu, ngài-têu chhiòn-phu cho-m̀-tet chhîn-khiun fu-ngìn-kâ, ke-têu heu-sâng ngìn ke sṳ̂n-thí thin-chho̍k oi pó-chhṳ̀ chhiang-li, hò-khóng kîm-pû-ngit yû thi̍t-sû ke ngim-vu, kám m̀-voi hàn-kha oi pó-chhṳ̀ chhiang-li!”
[6] Só-yî, chi-sṳ̂ chiông sṳn-piáng nâ-pûn Thai-ví; yîn-vi kì chṳ́-yû hien-pûn Song-chú ke sṳn-piáng, he tui sṳn-chok táng chang von hâ-lòi ke.
[7] (Vi Só-lò hiuk thèu-sâng ke chúng-kón, Yî-tûng-ngìn Tô-yit, ke-ngit tú-hó chhai-chhòng, yîn-vi lî-ngì song ke koân-he liù chhai Song-chú mien-chhièn.)
[8] Thai-ví tui Â-hî-mí-le̍t kóng: “Ngì liá-vi yû chhiông ya-he tô-é mò? Vòng ke min-lin tông-kip, ngài chhiu kón-kín chhut-mùn, mò sṳ̀-kiên hi-nâ ngài ke tô-é ya-he khì-thâ ke vú-hi.”
[9] Chi-sṳ̂ en-kóng: “Ngài liá-vi yû yit-kî tô-é, ngì chhai Yî-lâ sân-lak chhṳ̀-sí ke Fî-li-sṳ-ngìn Kô-li-â, kì ke-kî tô-é liá-ha piong chhai yî-fut-tet heu-poi, yung pu pâu-tén. Ngì na-oi, chhiu nâ-hi. Ke-kî tô-é he liá-vi vì-yit ke vú-hi.” Thai-ví kóng: “Chhiáng kâu-pûn ngài! Mò pí liá-kî kha-hó ke tô-é!”
[10] Só-yî, Thai-ví lì-khôi ke-vi, lòi sám-khôi Só-lò, thò-to Kâ-thi̍t-vòng Â-kit ke-vi hi.
[11] Â-kit ke kôn-yèn tui kì kóng: “Liá kám m̀-he Thai-ví, Yî-set-lie̍t-koet ke vòng mâ? Ke-têu fu-ńg thiau-vú ke sṳ̀ chhong kóng: ‘Só-lò chhṳ̀-sí chhiên-chhiên, Thai-ví chhṳ̀-sí van-van’. Kám m̀-he liá-ke Thai-ví mâ?”
[12] Thai-ví thâng-tó kì-têu kóng ke fa, chhin kiâng Kâ-thi̍t-vòng Â-kit,
[13] só-yî chhiu chhai kì-têu mien-chhièn cha-tiên. Kì chhiu chhai sàng mùn lon-siá, lon-va̍k, yù-chhai héu-lân liù-to fù-sî.
[14] Â-kit tui kì ke kôn-yèn kóng: “Khon nâ! Liá-ke ngìn he tiên-é! Cho-má-ke tai kì to ngài mien-chhièn lòi?
[15] Kám-kóng ngài liá-vi khiam tiên-é he-mò? Ngì-têu ngióng-pân tai liá-chak tiên-é lòi ngài liá-vi, chhai ngài vuk-tú tiên-tiên khòng-khòng, ngiâ ngài su-hi?”