[1] Só-yî Kî-lie̍t-Yâ-lìm-sàng ke ngìn chiông Song-chú ke yok-khui chiap ko-lòi, kông-tó yit-ke se sân-táng, piong chhai Â-pí-nâ-tha̍t ke vuk-hâ. Kì-têu thi̍t-phe̍t sat-li̍p Â-pí-nâ-tha̍t ke lai-é Yî-li-â-sat khon-sú Song-chú ke yok-khui.
[2] Yok-khui liù chhai Kî-lie̍t-Yâ-lìm-sàng tông-kiú, thai-yok yû ngi-sṳ̍p ngièn, yèn-heu Yî-set-lie̍t-ngìn chhiòn-phu chhìm-khiù Song-chú ke pông-chhu.
[3] Sat-mû-ngí tui Yî-set-lie̍t ngìn-mìn kóng: “Na-he ngì-têu chôn-sîm kûi hiong Song-chú, chhiu yit-thin oi chhù-thet ngì-têu tông-chûng só-yû ngoi-chhu̍k ke sṳ̀n-mìn lâu Â-sṳ̂-thâ-liu̍k ńg-sṳ̀n ke sṳ̀n-siong. Ngì-têu oi chiông chhṳ-kâ vàn-chhiòn hien-pûn Song-chú, tân-tân sṳ-fung Kì. Án-ngiòng, Kì chhiu voi kiu ngì-têu lì-khôi Fî-li-sṳ-ngìn ke sú.”
[4] Só-yî Yî-set-lie̍t-ngìn chhù-thet ke-têu Pâ-li̍t lâu Â-sṳ̂-thâ-liu̍k ngiéu-siong, tân-tân sṳ-fung Song-chú.
[5] Sat-mû-ngí kóng: “Oi seu-si̍p só-yû Yî-set-lie̍t-ngìn to Mí-sṳ̂-pâ, ngài oi chhai ke-vi vi ngì-têu hiong Song-chú khì-tó.”
[6] Só-yî kì-têu chhiòn-phu chhi-si̍p to Mí-sṳ̂-pâ. Kì-têu tá-súi, tó chhai Song-chú mien-chhièn, cho hien-pûn Song-chú ke chi-vu̍t, yu kim-sṳ̍t kûi-ngit. Kì-têu kóng: “Ngài-têu tet-chhui Song-chú lé.” (Mí-sṳ̂-pâ he Sat-mû-ngí vi Yî-set-lie̍t-ngìn chhú-lî kiu-fun ke só-chhai.)
[7] Fî-li-sṳ-ngìn thâng-tó Yî-set-lie̍t-ngìn chhi-si̍p chhai Mí-sṳ̂-pâ, ke ńg-ke Fî-li-sṳ liâng-chhiu chhiu tai-liâng kiûn-chhui oi chhut-lòi kûng-kit kì-têu. Yî-set-lie̍t-ngìn thâng-tó liá sêu-sit tông-kiâng,
[8] chhiu tui Sat-mû-ngí kóng: “Chhiáng ki-siu̍k vi ngài-têu hiong Song-chú — ngài-têu ke Song-ti khì-tó, m̀-hó thìn, khiù Kì kiu ngài-têu thot-lì Fî-li-sṳ-ngìn ke sú.”
[9] Sat-mû-ngí chhṳ̀ yit-chak hàn sṳ̍t-nen ke se yòng-è cho chhiòn-sên ke sêu-fa-chi hien-pûn Song-chú. Kì khì-khiù Song-chú pông-chhu Yî-set-lie̍t; Song-chú chhiu thâng kì ke khì-tó.
[10] Sat-mû-ngí chang hien sêu-fa-chi ke sṳ̀, Fî-li-sṳ-ngìn lòi kûng-kit Yî-set-lie̍t. Chhai ke-sṳ̀, Song-chú tui thiên-táng yung lùi-kûng tá Fî-li-sṳ-ngìn, sṳ́ kì-têu lon chhiang-chhiang, chhai Yî-set-lie̍t-ngìn mien-chhièn thò-chéu.
[11] Yî-set-lie̍t-ngìn tui Mí-sṳ̂-pâ chhut-lòi, yit-chhṳ̍t tûi Fî-li-sṳ-ngìn to Pak-Kap fu-khiun, theu-lu chhṳ̀ kì-têu.
[12] Heu-lòi, Sat-mû-ngí chhai Mí-sṳ̂-pâ lâu San ke chûng-kiên tun yit-te sa̍k-thèu, kóng: “Song-chú to liá-ha yit-chhṳ̍t pông-chhu ngài-têu.” Só-yî, kì chiông liá-te sa̍k-thèu ôn-to “Yî-phien-yî-chhia”.
[13] Án-ngiòng, Fî-li-sṳ-ngìn pûn Yî-set-lie̍t-ngìn tá-sû lé. Sat-mû-ngí hàn-sâng ke sṳ̀, Song-chú mò pûn Fî-li-sṳ-ngìn chai chhîm-fam Yî-set-lie̍t ke liâng-thú.
[14] Tui Yî-kiet-lùn to Kâ-thi̍t, só-yû pûn Fî-li-sṳ-ngìn chhióng-chéu ke sàng-chṳ́n chhiòn-phu vàn Yî-set-lie̍t. Yî-set-lie̍t sû-fu̍k chhiòn-phu liâng-thú. Ke-sṳ̀, Yî-set-lie̍t-ngìn lâu Â-mô-li-ngìn fò-phìn siông-chhu.
[15] Sat-mû-ngí yit-sên cho sṳ-sṳ̂ liâng-thô Yî-set-lie̍t.
[16] Kì tak-ngièn chhut-hi sùn-chhà Pak-thi̍t-li, Kit-kap lâu Mí-sṳ̂-pâ, chhai liá-têu só-chhai chhú-lî Yî-set-lie̍t-ngìn ke kiu-fun.
[17] Chhut-sùn yî-heu, kì chhiu chón-to kâ-hiông Lâ-mâ, chhai ke-vi cho Yî-set-lie̍t ke sṳ-sṳ̂. Kì chhai Lâ-mâ vi Song-chú hí yit-chho chi-thàn.