[1] Sat-mû-ngí tui Só-lò kóng: “Song-chú phai ngài yung yù kò ngì, li̍p ngì cho Kì chṳ́-mìn Yî-set-lie̍t ke vòng. Só-yî, ngì oi thâng Song-chú ke fa.
[2] Song-chú — Van-kiûn ke Ngièn-soi oi chit-fa̍t Â-mâ-li̍t-ngìn, yîn-vi Yî-set-lie̍t-ngìn tui Âi-khi̍p chhut-lòi ke sṳ̀, Â-mâ-li̍t-ngìn ke chú-siên ngióng-pân tui-thai kì-têu, ngióng-pân chú-tóng kì-têu.
[3] Liá-ha ngì oi hi kûng-tá Â-mâ-li̍t-ngìn, fí-me̍t kì-têu só-yû ke yit-chhiet, m̀-hó liù-hâ yit-hong tûng-sî; oi chiông kì-têu ke nàm-ngìn, fu-ngìn-kâ, se-ngìn-è, ô-nga-é, ngiù-yòng, lo̍k-thò lâu lì-è chhṳ̀ chhiang-chhiang.”
[4] Só-lò chhiu chhai Thì-lien seu-si̍p pin tiám-son kì ke kiûn-chhui: Tui Yî-set-lie̍t lòi ke yû ngi-sṳ̍p van phu-pîn, tui Yù-thai lòi ke yû yit-van ngìn.
[5] Só-lò tai-liâng kì ke kiûn-chhui to Â-mâ-li̍t-sàng, chhai sân-lak tú mài-fu̍k.
[6] Só-lò phai-ngìn kín-ko Kî-nì-ngìn kóng: “Ngì-têu lì-khôi Â-mâ-li̍t-ngìn to phe̍t-vi hi, miên-tet ngài lièn ngì-têu khiung-ha chhṳ̀-thet; yîn-vi Yî-set-lie̍t-ngìn tui Âi-khi̍p chhut-lòi ke sṳ̀, ngì-têu ke chú-siên sṳt hó khoán-thai kì-têu.” Só-yî Kî-nì-ngìn chhiu lì-khôi Â-mâ-li̍t-ngìn.
[7] Só-lò tá-yàng Â-mâ-li̍t-ngìn, tui Ha̍p-fî-lâ yit-chhṳ̍t tá-to Âi-khi̍p tûng-phién ke Sû-ngí,
[8] sâng-sâng chok-tó Â-mâ-li̍t-vòng Â-kap, chhṳ̀-thet só-yû ke ngìn-mìn.
[9] Chúng-he Só-lò lâu kì ke kiûn-chhui liù-hâ Â-kap ke sin-miang, me mò chhṳ̀-thet ke-têu chui-hó ke ngiù-khiùn, yòng-khiùn, se-ngiù-è lâu se yòng-è, khì-thâ hó ke tûng-sî ya chhiòn-phu liù-tén, m̀-hén me̍t-thet. Kì-têu tân-chhiang fí-me̍t thet ke-têu mò yung ke lâu mò ka-chhṳ̍t ke tûng-sî.
[10] Song-chú tui Sat-mû-ngí kóng:
[11] “Ngài heu-fí li̍p Só-lò cho vòng; kì yí-kîn lì-khôi Ngài, mò chûn-sú Ngài ke min-lin.” Sat-mû-ngí chhiu chhin nàn-ko, kûi am-pû hiong Song-chú ôi-khiù.
[12] Thi-ngi ngit tá-chó, Sat-mû-ngí hi chhìm Só-lò. Kì thâng-kóng Só-lò yí-kîn to Kâ-me̍t, chhai ke-vi vi chhṳ-kâ hí yit-chho ki-ngiam-pî, yu hiong Kit-kap hi lé.
[13] Sat-mû-ngí chhiu hi kien Só-lò. Só-lò hiong kì mun-ôn kóng: “Ngien Song-chú su-fuk pûn ngì! Song-chú ke min-lin ngài yí-kîn chûn-sú lé.”
[14] Sat-mû-ngí kóng: “Án-ngiòng, ngài cho-má-ke hàn thâng-tó ngiù-yòng ke kieu-sâng?”
[15] Só-lò en-kóng: “Liá he ngài ke kiûn-chhui tui Â-mâ-li̍t-ngìn ke-vi chok-lòi ke. Kì-têu liù-hâ chui-hó ke ngiù-yòng, oi hien-pûn Song-chú — ngì ke Song-ti. Khì-thâ ke, ngài-têu chhiòn-phu me̍t chhiang-chhiang lé.”
[16] Sat-mû-ngí tui Só-lò kóng: “Tiâm-tiâm! Ngài oi lâu ngì kóng Song-chú chhô-am-pû tui ngài kóng ke fa.” Só-lò kóng: “Chhiáng kóng!”
[17] Sat-mû-ngí kóng: “Sûi-yèn ngì láu-tó chhṳ-kâ mò chhung-yeu, chúng-he ngì he Yî-set-lie̍t kok kî-chhu̍k ke liâng-chhiu! Song-chú kò-yù li̍p ngì cho Yî-set-lie̍t ke vòng;
[18] Song-chú phai ngì hi, min-lin ngì sêu-me̍t ke-têu sià-ok ke Â-mâ-li̍t-ngìn, chiông kì-têu chhiòn-phu chhṳ̀ chhiang-chhiang.
[19] Ngì cho-má-ke m̀-thâng Song-chú ke min-lin, án-kiak hi-chhióng chan-li-phín, hàng Song-chú khon-cho sià-ok ke sṳ?”
[20] Só-lò kóng: “Chúng-he ngài yû thâng-chhiùng Song-chú ke fa! Ngài cheu Song-chú ke fûn-fu hi siông-chhṳ̀, chok-tó Â-mâ-li̍t-vòng Â-kap, yu chiông só-yû ke Â-mâ-li̍t-ngìn chhṳ̀ chhiang-chhiang.
[21] Ngài ke kiûn-chhui mò chiông chok-lòi ke-têu chui-hó ke ngiù-yòng chhṳ̀-thet, fán-chón oi chhai Kit-kap hien-pûn Song-chú — ngì ke Song-ti.”
[22] Sat-mû-ngí kóng: “Song-chú fôn-hí sêu-fa-chi lâu phìn-ôn-chi, ya-he kha fôn-hí ngìn thâng-chhiùng Kì ke fa? Thâng-chhiùng min-lin pí hien-chi kha hó; sun-chhiùng yàng-ko yòng-kú ke chṳ́-yù.
[23] Phoi-ngia̍k Kì lâu hàng sià-su̍t khiung-yong fái; ngau-man lâu pai ngiéu-siong khiung-yong yû chhui. Yîn-vi ngì vì-poi Song-chú ke min-lin, Kì vok-thet ngì, mò-oi ngì cho vòng lé.”
[24] Só-lò tui Sat-mû-ngí kóng: “Ngài yû chhui lé; ngài vì-poi Song-chú ke min-lin lâu ngì ke chṳ́-sṳ. Yîn-vi ngài kiâng ngìn-mìn, só-yî thâng-chhiùng kì-têu ke fa hi-cho.
[25] Liá-ha, ngài khién-khiù ngì sa-miên ngài ke chhui, lâu ngài khiung-ha chón-hi, ngài chang hó kin-pai Song-chú.”
[26] Sat-mû-ngí en-kóng: “Ngài m̀ lâu ngì khiung-ha chón-hi. Yîn-vi ngì vì-poi Song-chú ke min-lin, Kì ya vok-thet ngì, mò-oi ngì cho Yî-set-lie̍t ke vòng lé.”
[27] Sat-mû-ngí chón-sṳ̂n oi chéu, Só-lò pâng-tén kì ngoi-sâm ke sâm-mî, chiông sâm-mî pâng thôn-thet.
[28] Sat-mû-ngí tui kì kóng: “Chhiong án-ngiòng, kîm-pû-ngit Song-chú yí-kîn sṳ́ Yî-set-lie̍t-koet lâu ngì thôn-chhie̍t, chhióng chón-lòi, su-pûn yit-ke pí ngì kha-hó ke ngìn.
[29] Yî-set-lie̍t ke Yùng-yeu chá — Song-ti m̀-voi kóng fâ-liâu, ya m̀-voi kói-pien chú-yi; Kì m̀-he sṳ-kiên ngìn, Kì m̀-voi kói-pien chú-yi.”
[30] Só-lò kóng: “Ngài yû chhui lé. Chúng-he, chhiáng ngì chṳ-séu chhai ngìn-mìn ke-têu chóng-ló lâu só-yû Yî-set-lie̍t-ngìn mien-chhièn pûn ngài tô-séu mien-chṳ́, chhiáng lâu ngài khiung-ha chón-hi, ngài chang hó kin-pai Song-chú — ngì ke Song-ti.”
[31] Só-yî, Sat-mû-ngí lâu kì khiung-ha chón-hi. Só-lò chhiu kin-pai Song-chú.
[32] Sat-mû-ngí kóng: “Chiông Â-mâ-li̍t-vòng Â-kap tai-to ngài liá-vi lòi!” Â-kap fôn-fôn hí-hí lòi-to Sat-mû-ngí mien-chhièn, sîm-tú sióng: “Sí ke khú-nan yit-thin ko-hi lé!”
[33] Sat-mû-ngí kóng: “Ngì ke tô sṳt sṳ́ chhin tô â-mê sóng-sṳt chṳ́-ńg, liá-ha ngiâ-mê ya yit-thin voi sṳt-thet lai-é.” Sat-mû-ngí chhiu chhai Kit-kap chi-thàn, Song-chú ke mien-chhièn chiông Â-kap chám-sí.
[34] Heu-lòi, Sat-mû-ngí chón Lâ-mâ hi; Só-lò ya chón Kî-pí-â ke vuk-hâ hi.
[35] Tui ke-sṳ̀ hí, Sat-mû-ngí yit-chhṳ̍t to sí mò-chai hi khon Só-lò, chúng-he kì vi Só-lò pî-sông. Song-chú heu-fí li̍p Só-lò cho Yî-set-lie̍t ke vòng.