[1] Yû-têu ngìn tui Sî-fut to Kî-pí-â lòi kien Só-lò, hiong kì po-ko, Thai-ví khong chhai Yù-thai khóng-yâ sùn-thèu ke Ha̍p-kî-lâ sân-táng.
[2] Só-lò ngiàm-sṳ̀ tai Yî-set-lie̍t ke sâm-chhiên chîn-pîn to Sî-fut ke khóng-yâ chhìm Thai-ví.
[3] Kì-têu chhai Ha̍p-kî-lâ-sân lu-sùn ôn-yàng. Thai-ví hàn chhai khóng-yâ, tông kì thâng-tó Só-lò yí-kîn tai-liâng kiûn-chhui lòi-to ke sṳ̀,
[4] kì phai tham-é chhut-hi tá-tham, tî-tet Só-lò ton-chṳ̂n to-lòi.
[5] Thai-ví ngiàm-sṳ̀ hí-sṳ̂n, chhìm-tó Só-lò lâu kì ke ngièn-soi — Nì-ngí ke lai-é Ap-nì-ngí soi-muk ke só-chhai. Só-lò soi chhai pîn-yàng tú; kì ke kiûn-chhui chhai kì ke chû-vì ôn-yàng.
[6] Thai-ví mun Het-ngìn Â-hî-mí-le̍t lâu Sé-lu-ngâ ke lai-é Yok-ap ke hiûng-thi Â-pí-chhî kóng: “Ngì-têu lióng-sà má-ngìn ngien-yi lâu ngài to Só-lò ke yàng-tú hi?” Â-pí-chhî kóng: “Ngài ngien-yi!”
[7] Ke am-pû, Thai-ví lâu Â-pí-chhî ngi̍p-hi Só-lò ke yàng-tú, fat-hien Só-lò soi chhai pîn-yàng ke tûng-ông, kì ke chhiông chhap chhai thèu-nà sùn ke thi-song; Ap-nì-ngí lâu kiûn-chhui vì-tén kì soi.
[8] Â-pí-chhî tui Thai-ví kóng: “Kîm-am-pû, Song-ti chiông ngì ke thi̍t-ngìn kâu chhai ngì sú-chûng. Liá-ha pûn ngài yung kì chhṳ-kâ ke chhiông chhiuk-chhôn kì, chhiuk yit-ha chhiu cho-tet chiông kì tâng chhai thi-song, m̀-sṳ́ chhiuk lióng-ha!”
[9] Chúng-he Thai-ví en-kóng: “Ngì cho-m̀-tet sông-hoi kì! Má-ngìn sông-hoi Song-chú kò-yù li̍p ke vòng, Song-chú yit-thin voi chit-fa̍t kì.”
[10] Thai-ví yu kóng: “Ngài chṳ́-tén yún-sên Song-chú fat-sṳ, ngài tî Song-chú voi chhṳ̀ Só-lò, khó-nèn ngit-è chhiu to lé, chhṳ-kâ sí-thet, ya-he sí chhai chan-chhòng.
[11] Song-chú m̀-chún ngài sông-hoi Kì kò-yù li̍p ke vòng! Ngài-têu lòi nâ kì thèu-nà sùn ke chhiông lâu súi-kon-é chéu!”
[12] Só-yî Thai-ví tui Só-lò ke thèu-nà sùn nâ-chéu kì ke chhiông lâu súi-kon-é, yèn-heu lâu Â-pí-chhî lì-khôi. Mò ngìn khon-tó, ya mò ngìn tî fat-sên má-ke sṳ, lièn yit-ke me mò siáng ko-lòi; kì-têu chhiòn-phu tông hó-soi, yîn-vi Song-chú sṳ́ kì-têu m̀-tî siáng.
[13] Thai-ví ko-hi sân-lak ke-phién, khî chhai sân-táng, lâu kì-têu lì chhin-yén,
[14] yèn-heu thai-sâng hiong Só-lò ke kiûn-chhui lâu Nì-ngí ke lai-é Ap-nì-ngí hêm-kóng: “Ap-nì-ngí! Ngì yû thâng-tó ngài hêm mò?” Ap-nì-ngí mun: “Má-ngìn chhai ke-vi hêm vòng?”
[15] Thai-ví en-kóng: “Ap-nì-ngí, ngì kám m̀-he Yî-set-lie̍t tông-chûng chui khiòng-chong ke yúng-sṳ? Ngì ngióng-pân mò hó-hó pó-fu koet-vòng — ngì ke chú-ngìn? Thèu-ha yû ngìn ngi̍p-to yàng-tú hi, oi chhṳ̀ koet-vòng — ngì ke chú-ngìn!
[16] Ap-nì-ngí! Ngì mò chhin chit-ngim. Ngài chṳ́-tén yún-sên ke Song-chú fat-sṳ, ngì-têu chhiòn-phu kôi-sí! Yîn-vi ngì-têu mò pó-fu hó chú-ngìn, chhiu-he Song-chú só kò-yù li̍p ke vòng. Liá-ha ngì hi khon, vòng thèu-nà sùn ke chhiông lâu súi-kon-é chhai nai-vi?”
[17] Só-lò ngin-chhut he Thai-ví ke sâng-yîm, chhiu mun: “Thai-ví, ngâ lai-é â! He ngì mò?” Thai-ví en-kóng: “Ngâ chú ngâ vòng, he ngài!”
[18] Yèn-heu yu kóng: “Chú-ngìn â, ngì cho-má-ke tûi ngì ke phu̍k-ngìn? Ngài cho m̀-chho̍k má-ke? Fam má-ke chhui?
[19] Ngâ chú ngâ vòng, chhiáng thâng phu̍k-ngìn kóng. Na-he Song-chú sṳ́ ngì cho ngài ke tui-thi̍t, ngài ngien hien-chi pûn Kì, hó kói-pien Kì ke sîm-yi; na-he chhut chhai ngìn ke yîm-mèu, ngien Song-ti chu-chú kì-têu. Yîn-vi kì-têu chiông ngài kiuk-chhut Song-chú su-pûn Kì chṳ́-mìn ke thú-thi, oi sṳ́ ngài liù-long koet-ngoi, pai ke-vi ke sṳ̀n-mìn.
[20] Khiù ngì m̀-hó pûn ngài sí chhai ngoi-koet ke thú-thi song, yén-lì Song-chú. Yî-set-lie̍t ke vòng cho-má-ke oi chhut-lòi chok ngài, chhiong chok yit-chak thiau-cháu? Cho-má-ke oi sa ngài, chhiong sa yit-chak cha-kû nè?”
[21] Só-lò kóng: “Ngài m̀-chho̍k lé! Ngài ke lai-é Thai-ví, chón-lòi â! Ngài m̀-voi chai sông-hoi ngì, yîn-vi ngì kîm-am-pû liù ngài ke sin-miang. Ngài he fù-thù ngìn; ton-chṳ̂n chhin chhâ!”
[22] Thai-ví kóng: “Koet-vòng, liá he ngì ke chhiông! Chhiáng fûn-fu ngì yit-ke phu-ha ko-lòi nâ.
[23] Song-chú voi cheu tak-sà ke sin-sṳ̍t lâu chṳn-ngi lòi chióng-sóng kì. Kîm-pû-ngit Song-chú chiông ngì kâu chhai ngài sú-chûng, chúng-he ngài mò sông-hoi Song-chú só kò-yù li̍p ke vòng.
[24] Kîm-pû-ngit ngài pó-liù ngì ke sin-miang, ngien Song-chú ya án-ngiòng pó-liù ngài ke sin-miang, kiu ngài thot-lì só-yû ke châi-nan.”
[25] Só-lò en-kóng: “Ngài ke lai-é Thai-ví â, ngien Song-ti su-fuk pûn ngì! Ngì thin-chho̍k voi cho thai-sṳ, ya yit-thin voi tet-sṳn!” Só-yî Thai-ví lì-khôi ke-vi; Só-lò chhiu chón vuk-hâ hi lé.