[1] Só-lò sí-heu, Thai-ví tá-yàng Â-mâ-li̍t-ngìn chón-lòi, chhai Sé-kiet-lâ he̍t lióng-ngit.
[2] Thi-sâm ngit, yû yit-ke heu-sâng ngìn tui Só-lò kiûn-yàng lòi, kì chhá-lan sâm, ve-fôi chhai chhṳ-kâ thèu-nà táng. Kì lòi-to Thai-ví mien-chhièn, kiûng-kin phu̍k chhai thi-song.
[3] Thai-ví mun kì: “Ngì tui nai-vi lòi?” Kì kóng: “Ngài he tui Yî-set-lie̍t kiûn-yàng thò-miang chhut-lòi ke.”
[4] Thai-ví mun: “Lâu ngài kóng, ke-phién ke chhìn-khóng ngióng-pân?” Ke heu-sâng ngìn kóng: “Ngài-têu ke kiûn-chhui tui chan-chhòng tá-sû thò-chéu, chhin-tô ngìn chan-sí. Só-lò lâu kiâ lai-é Yok-nâ-tân me sí-thet lé!”
[5] Thai-ví mun: “Ngì ngióng-pân tî Só-lò lâu Yok-nâ-tân sí-thet lé nè?”
[6] Heu-sâng ngìn en-kóng: “Ngài tú-hó chhai Kî-li-pô-sân, khon-tó Só-lò pen-tén kì ke chhiông, thi̍t-ngìn ke chan-chhâ lâu khì-pîn chhin-kiak chhiu voi kiuk-tó kì lé.
[7] Kì chón-sṳ̂n khon-tó ngài, chhiu hêm ngài. Ngài kóng: ‘Ngài chhai liá-vi!’
[8] Kì mun ngài he má-ngìn; ngài lâu kì kóng ngài he Â-mâ-li̍t-ngìn.
[9] Kì kóng: ‘Khî to ngài sṳ̂n-piên lòi, chiông ngài chhiuk-sí! Ngài su chhûng-sông, voi sí lé, chúng-he hàn-màng thôn-hi.’
[10] Ngài chhiu ko-hi chhṳ̀-sí kì, yîn-vi ngài tî kì yí-kîn vang-thet kiu m̀ sâng lé. Ngài nâ-hâ kì thèu-nà táng ke vòng-kon lâu sú-pí hong ke sú-ak, tai-lòi liá-vi hien-pûn ngài chú-ngìn.”
[11] Thai-ví pî-sông to chhá-lan sâm; kì ke phu-ha ya chhiòn-phu chhá-lan sâm.
[12] Kì-têu sông-sîm thai-kieu, kim-sṳ̍t to ke am-pû, yîn-vi Só-lò, kiâ lai-é Yok-nâ-tân lâu Song-chú ke chṳ́-mìn Yî-set-lie̍t thùng-pâu chhai chan-chhòng sí-thet.
[13] Thai-ví mun ke po sêu-sit pûn kì ke heu-sâng ngìn: “Ngì he nai-vi ngìn?” Kì en-kóng: “Ngài he Â-mâ-li̍t-ngìn, he he̍t chhai ngì-têu koet-nui ke ngoi-chhu̍k ngìn.”
[14] Thai-ví kóng: “Ngì ngióng-pân kám chhṳ̀ Song-chú kò-yù li̍p ke vòng nè?”
[15] Só-yî, Thai-ví tui yit-ke phu-ha kóng: “Chhṳ̀-thet kì!” Ke phu-ha chhiu chiông ke Â-mâ-li̍t-ngìn chhṳ̀-sí.
[16] Thai-ví thùng-sṳ̀ tui ke Â-mâ-li̍t-ngìn kóng: “Ngì chhui yû yin-tet! Ngì sṳ̀n-ngin chhṳ̀-sí Song-chú kò-yù li̍p ke vòng, án-ngiòng chhiu-he thin chhṳ-kâ ke sí-chhui.”
[17] Thai-ví vi Só-lò lâu kiâ lai-é Yok-nâ-tân cho yit-sú ôi-kô tiau-ví,
[18] ha-lin chiông liá-sú kô kâu Yù-thai ke ngìn-mìn. Liá-sú kô ôn-to “Kiûng Kô”, ki-liu̍k chhai Ngâ-sat-ngí Sû.
[19] Chhai Yî-set-lie̍t ke sân-táng, ngài-têu ke liâng-chhiu sí-thet! Ngài-têu ke yîn-hiùng ngióng-voi vang lo̍k-hi!
[20] M̀-hó chhai Kâ-thi̍t po-sin; m̀-hó chhai Â-sṳ̍t-kî-lùn kiê-lu chhòn-khôi. M̀-hó pûn Fî-li-sṳ ke fu-ńg fôn-hí; m̀-hó sṳ́ ngoi-pâng ke se-moi-é khoai-lo̍k.
[21] Ngien Kî-li-pô ke-têu sân yún-yén mò kong yí-lu; ngien kì ke thièn-thi yún-yén fông-liòng. Yîn-vi yîn-hiùng ke tún-phài chhai ke-vi ngiam-tó hiet; Só-lò ke tún-phài mò-chai yung yù chhu̍t-kîm.
[22] Mò khon-tó thi̍t-ngìn ke hiet, Yok-nâ-tân ke kiûng mò piong hâ-lòi; mò sê-tó yúng-sṳ ke yù, Só-lò ke kiam ya mò sû-fì.
[23] Só-lò lâu Yok-nâ-tân su-ngìn chûn-kin tet-ngìn fôn-hí! Kì-têu sên-chhièn siông-oi siông-siak, lìm-sí me mò fûn-khôi; kì-têu pí ên-tiâu hàn-kha kiak, pí kûng-sṳ̂ hàn-kha khiòng.
[24] Yî-set-lie̍t ke fu-ńg â, oi vi Só-lò sông-sîm liù muk-chṳp! Kì sṳ́ ngì-têu chok fùng-set ke chiâng-sâm, sṳ́ ngì-têu yû-hó tai kîm-ngiùn chû-pó.
[25] Yîn-hiùng ngióng-voi vang lo̍k-hi, sí chhai chan-chhòng! Yok-nâ-tân ya chan-sí chhai sân-táng!
[26] Ngâ-kô Yok-nâ-tân nâ, ngài vi ngì ôi-sông! Ngì tui ngài fî-sòng chhîn-oi! Ngì ke chhṳ̂m-chhìn ngióng-pân mî-hó, yén-yén yàng-ko fu-ńg ke oi-chhìn.
[27] Yîn-hiùng ngióng-voi vang lo̍k-hi; kì-têu ke vú-hi ya fi-thet.