[1] Fî-li-sṳ-ngìn si̍p-ha̍p kì-têu só-yû ke kiûn-chhui chhai Â-fut; Yî-set-lie̍t-ngìn chhai Yâ-sṳ̂-lie̍t sân-lak ke chhièn-súi sùn ôn-yàng.
[2] Ńg-ke Fî-li-sṳ-ngìn ke liâng-chhiu tai-tén kì-têu ke kiûn-chhui pak-ngìn yit-chhui lâu chhiên-ngìn yit-chhui cheu sun-si chhièn-chin; Thai-ví lâu kì ke kiûn-chhui thèn Â-kit hàng chhai heu-poi.
[3] Fî-li-sṳ ke-têu liâng-chhiu khon-tó kì-têu, chhiu mun: “Liá-têu Hî-pak-lòi-ngìn chhai liá-vi cho-má-ke?” Â-kit en-kóng: “Liá he Thai-ví, Yî-set-lie̍t-vòng Só-lò ke phu-ha. Kì thèn ngài yí-kîn yû kí-ngièn ke sṳ̀-kiên. Chhṳ-chhiùng kì thèu-kho ngài to liá-ha, ngài chhìm m̀-tó kì yû má-ke m̀-chho̍k.”
[4] Chúng-he, Fî-li-sṳ ke-têu liâng-chhiu tông mò fôn-hí, chhiu tui Â-kit kóng: “Ham liá-ke ngìn chón ngì só pûn kì ke sàng hi! Cho-m̀-tet pûn kì lâu ngài-têu khiung-ha hi chok-chan; kì khó-nèn chhai siông-chhṳ̀ ke sṳ̀ chón ko-lòi kûng-tá ngài-têu. Cho-má-ke hî-sên ngài-têu chhṳ-kâ ngìn ke sâng-miang, pûn kì chhùng-sîn tet-tó kì chú-ngìn ke sin-ngim nè?
[5] Liá kám m̀-he Thai-ví mâ? Ke-têu fu-ńg thiau-vú ke sṳ̀ chhong kóng: ‘Só-lò chhṳ̀-sí chhiên-chhiên, Thai-ví chhṳ̀-sí van-van’. Kám m̀-he liá-ke Thai-ví mâ?”
[6] Só-yî, Â-kit ham Thai-ví lòi, tui kì kóng: “Ngài chṳ́-tén yún-sên ke Song-chú fat-sṳ: Ngì tui ngài yit-chhṳ̍t chûng-sîm; ngài chhin oi ngì lâu ngài khiung-ha hi chok-chan. Tui ngì thèu-kho ngài to liá-ha, ngài chhìm m̀-tó ngì yû má-ke m̀-chho̍k, chúng-he khì-thâ ke liâng-chhiu fán-tui ngì.
[7] Só-yî, ngì phìn-ôn chón-hi, miên-tet ngiâ kì-têu fat-khién.”
[8] Thai-ví en-kóng: “Ngài fam-liáu má-ke m̀-chho̍k? Na-he cheu ngì só-kóng, tui ngài lòi thèu-kho ngì ke-ngit hí, ngì chhìm m̀-chhut phu̍k-ngìn yû má-ke m̀-chho̍k; án-ngiòng, cho-má-ke m̀-chún ngài hi kûng-tá ngâ chú ngâ vòng ke thi̍t-ngìn nè?”
[9] Â-kit en Thai-ví kóng: “Ngài tî ngì chhai ngài mien-chhièn chhiong Song-ti ke thiên-sṳ́ khiung-yong án chûng-sîm; chúng-he Fî-li-sṳ-ngìn khì-thâ ke liâng-chhiu mò-oi ngì lâu ngài-têu khiung-ha hi siông-chhṳ̀.
[10] Só-yî, thiên-kông chêu-sṳ̀n tá-chó, ke-têu lì-khôi Só-lò, ya chhiu-he lâu ngì khiung-ha lòi thèu-kho ngài ke ngìn, ngì oi tai-liâng kì-têu to-chón hi.”
[11] Só-yî, Thai-ví lâu kì ke phu-ha thi-ngi ngit tá-chó chhiu hí-sṳ̂n, chón Fî-li-sṳ hi. Fî-li-sṳ-ngìn ki-siu̍k hiong Yâ-sṳ̂-lie̍t chin-kiûn.