[1] Yû ngìn lâu Thai-ví kóng: “Fî-li-sṳ-ngìn liá-ha kûng-tá Kî-yî-lâ-sàng, kín chhióng chang sû-sṳ̀n ke ńg-kuk.”
[2] Thai-ví chhiu khiù-mun Song-chú: “Ngài yin-kôi hi kûng-tá ke-têu Fî-li-sṳ-ngìn mò?” Song-chú en-kóng: “Ngì hi kûng-tá kì-têu, kiu Kî-yî-lâ-sàng.”
[3] Chúng-he, Thai-ví ke phu-ha tui kì kóng: “Ngài-têu chhai Yù-thai chhiu kiâng-to voi sí, to Kî-yî-lâ hi kûng-tá Fî-li-sṳ-ngìn ke kiûn-chhui kám m̀-he hàn-kha chhám?”
[4] Só-yî Thai-ví yu khiù-mun Song-chú. Song-chú en kì kóng: “Cho ngì hi Kî-yî-lâ! Ngài voi sṳ́ ngì tá-yàng Fî-li-sṳ-ngìn.”
[5] Thai-ví lâu kì ke phu-ha chhiu hi Kî-yî-lâ kûng-tá Fî-li-sṳ-ngìn. Kì-têu chhṳ̀-sí tông-tô thi̍t-ngìn, yu chok chón-lòi thi̍t-ngìn ke thèu-sâng. Án-ngiòng, Thai-ví chhiu kiu-tó Kî-yî-lâ-sàng ke ngìn.
[6] Â-hî-mí-le̍t ke lai-é Â-pí-â-thâ thò-to Kî-yî-lâ hi thèu-kho Thai-ví ke-sṳ̀, yû chiông yî-fut-tet tai-tén hi.
[7] Só-lò tî Thai-ví to Kî-yî-lâ hi lé, chhiu kóng: “Song-ti yí-kîn chiông kì kâu chhai ngài sú-chûng lé. Thai-ví chéu-to yit-ke yû chhiòng, yû mùn-chhôn ke sàng-tú hi, chhiu-he chhṳ-kâ ham-ngi̍p lò-mióng.”
[8] Só-yî Só-lò seu-si̍p kiûn-chhui chún-phi chok-chan, hiong Kî-yî-lâ chin-kiûn, oi vì-kûng Thai-ví lâu kì ke phu-ha.
[9] Thai-ví tî Só-lò kie-va̍k kûng-tá kì, chhiu tui chi-sṳ̂ Â-pí-â-thâ kóng: “Chiông yî-fut-tet tai-to liá-vi lòi.”
[10] Thai-ví kóng: “Song-chú — Yî-set-lie̍t ke Song-ti â, Ngì ke phu̍k-ngìn khok-sṳ̍t thâng-kóng Só-lò kie-va̍k to Kî-yî-lâ lòi, vi-tó ngài ke yèn-ku oi fí-me̍t liá-sàng.
[11] Kî-yî-lâ ngìn-mìn voi chiông ngài kâu-pûn Só-lò mò? Ngì ke phu̍k-ngìn thâng-kóng Só-lò oi lòi, kì ton-chṳ̂n voi lòi mò? Song-chú — Yî-set-lie̍t ke Song-ti â, khién-khiù Ngì lâu phu̍k-ngìn kóng!” Song-chú en-kóng: “Só-lò voi lòi.”
[12] Thai-ví yu mun: “Án-ngiòng, Kî-yî-lâ ke ngìn-mìn voi chiông ngài lâu ngài ke phu-ha kâu-pûn Só-lò mò?” Song-chú kóng: “Voi!”
[13] Só-yî, Thai-ví lâu kì ke phu-ha yok-yû liuk-pak ngìn ngiàm-sṳ̀ lì-khôi Kî-yî-lâ to-chhu liù-long. Só-lò thâng-tó Thai-ví yí-kîn thò-chéu lì-khôi Kî-yî-lâ chhiu chhí-sêu ngièn-lòi ke kie-va̍k.
[14] Thai-ví khong chhai Sî-fut khóng-yâ ke-phién ke sân-chai tú. Só-lò yit-chhṳ̍t chhai chhìm kì, chúng-he Song-ti m̀ chiông Thai-ví kâu-pûn kì.
[15] Thai-ví ya chhîn-chhú Só-lò kiet-sîm oi chhṳ̀ kì. Thai-ví chhai vá-khiun Sî-fut khóng-yâ ke Ha̍p-lie̍t sṳ̀,
[16] Só-lò ke lai-é Yok-nâ-tân lòi kien kì, kú-li kì yí-kho Song-ti lòi tet-tó kông-khiòng,
[17] tui kì kóng: “M̀-sṳ́ kiâng! Ngâ-pâ Só-lò mò phan-fap hoi ngì; ngì chiông-lòi yit-thin voi cho Yî-set-lie̍t ke vòng, ngài ke thi-vi ya voi chhai ngì tái-hâ, pài thi-ngi vi. Liá-sṳ ngâ-pâ me tông chhîn-chhú.”
[18] Lióng-sà chhai Song-chú mien-chhièn chhùng-sîn kiet-cho sâng-sí phèn-yû. Thai-ví liù chhai Ha̍p-lie̍t; Yok-nâ-tân chhiu chón vuk-hâ hi.
[19] Yû-têu ngìn tui Sî-fut to Kî-pí-â hi kien Só-lò, kóng: “Thai-ví khong chhai ngài-têu ke-phién, chhai Yù-thai khóng-yâ ke nàm-phu, Ha̍p-kî-lâ sân-táng, Ha̍p-lie̍t ke sân-chai tú.
[20] Ngài-têu tî koet-vòng tông sióng-oi chok kì; chhiáng to ngài-têu ke-phién hi, ngài-têu yit-thin voi hia̍p-chhu koet-vòng chok-tó kì.”
[21] Só-lò kóng: “Ngì-têu tui ngài chhin-hó. Ngien Song-chú su-fuk pûn ngì-têu!
[22] Ngì-têu chón-hi, chai yit-pái chhà kha chhîn-chhú têu-é, kì chhai nai-vi, má-ngìn khon-ko kì. Ngài thâng-kóng kì tông káu-koai.
[23] Ngì-têu hi chhà-mìn kì só-yû khong ke só-chhai, ngiàm-sṳ̀ to-chón-lòi po-ko, ngài chhiu lâu ngì-têu hi. Na-he kì hàn chhai liá-ke thi-khî, chhiu-son oi chiông Yù-thai ke kok chûng-chhu̍k chhìm to pién chón-lòi, ngài ya oi chiông kì sêu chhut-lòi.”
[24] Só-yî, liá-têu ngìn chhut-fat, pí Só-lò siên chón-to Sî-fut hi. Thai-ví lâu kì ke phu-ha khong chhai Mâ-yùn khóng-yâ, chhai Yù-thai nàm-phién ke sân-lak tú.
[25] Só-lò tai kì ke phu-ha chhut-fat sêu-chhà Thai-ví; Thai-ví thâng-tó fûng-sâng, chhiu hiong Mâ-yùn khóng-yâ thò-chéu, khong chhai yit-ke thai ngàm-sa̍k heu-poi. Só-lò thâng-tó, chhiu hi kiuk kì.
[26] Só-lò lâu kì ke phu-ha chhai ngàm-sa̍k liá-phién hàng; Thai-ví lâu kì ke phu-ha chhai nang-ngoi yit-phién hàng, oi kiak-kiak thò-chéu. Só-lò liá-phién ke ngìn yí-kîn lì kì-têu tông-khiûn, voi chok-tó kì-têu ke sṳ̀,
[27] chhiu yû yit-ke sṳ́-chá to-lòi, hiong Só-lò po-ko kóng: “Kiak-kiak chón-hi! Fî-li-sṳ-ngìn lòi chhîm-fam ngài-têu ke thú-thi lô!”
[28] Só-yî Só-lò thìn hâ-lòi, mò ki-siu̍k kiuk Thai-ví, chhiu chón-hi tá Fî-li-sṳ-ngìn. Só-yî ke só-chhai pûn-ngìn ham-cho “Kak-lì ke Ngàm-sa̍k”.
[29] Thai-ví lì-khôi ke-vi, hi Yún-Kî-tí thi-khî, khong chhai ke-phién ke sân-chai tú.