[1] Só-lò tên-kî cho vòng ke sṳ̀ sâm-sṳ̍p se, kì cho Yî-set-lie̍t-vòng lióng-ngièn.
[2] Só-lò tui Yî-set-lie̍t-ngìn tông-chûng sién-chhut sâm-chhiên ngìn, chiông lióng-chhiên ngìn liù chhai kì sṳ̂n-piên, chhai Me̍t-mat lâu Pak-thi̍t-li sân-khî, chiông nang-ngoi yit-chhiên ngìn phai-to Phien-ngâ-mén kî-chhu̍k ke Kî-pí-â só-chhai, pûn kì ke lai-é Yok-nâ-tân tai-liâng. Só-lò fûn-fu khì-thâ ke ngìn chón vuk-hâ.
[3] Yok-nâ-tân chhai Kâ-pâ kûng-tá Fî-li-sṳ-ngìn ke chu-fòng yàng; Fî-li-sṳ-ngìn chhiòn-phu thâng-tó liá-sṳ. Só-lò phai chôn-ngìn to chhiòn-koet kok-thi, phùn yòng-kok seu-si̍p Hî-pak-lòi-ngìn chhut-lòi siông-chhṳ̀.
[4] Só-yû ke Yî-set-lie̍t-ngìn thâng-tó Só-lò kûng-tá Fî-li-sṳ-ngìn ke chu-fòng yàng, yu thâng-kóng Fî-li-sṳ-ngìn yen-hen kì-têu, chhiu hióng-yin Só-lò ke fû-seu, si̍p-ha̍p chhai Kit-kap.
[5] Fî-li-sṳ-ngìn chhi-si̍p kûng-tá Yî-set-lie̍t-ngìn. Kì-têu yû sâm-van chan-chhâ, liuk-chhiên khì-pîn, lâu chhin-tô ke phu-pîn, tô-to chhiong hói-sùn ke sâ-é án-tô. Kì-têu chiông phu-chhui tiau-to Pak-Â-vùn tûng-phién ke Me̍t-mat, chhai ke-vi ôn-yàng.
[6] Yî-set-lie̍t-ngìn khon-tó khiòng-thi̍t lòi-to, tî thai-nan lìm-thèu, yû-têu ngìn chhiu hi khong chhai sân-khûng tú, su-lìm tú, sa̍k-lùng tú, chiáng-tú ya-he hâng-fut tú;
[7] yû-têu Hî-pak-lòi-ngìn ko Yok-tan-hò, thò-to Kâ-tet lâu Kî-lie̍t thi-khî hi. Só-lò hàn chhai Kit-kap, thèn kì ke ngìn chhiòn-phu kiâng-to kín-chûn.
[8] Kì cheu Sat-mû-ngí ke chṳ́-sṳ, chhai Kit-kap tén chhit-ngit, chúng-he Sat-mû-ngí hàn-màng to. Ngìn-mìn khôi-sṳ́ lì-khôi Só-lò san-thet hi,
[9] só-yî Só-lò tui kì-têu kóng: “Chiông sêu-fa-chi lâu phìn-ôn-chi ke sên-ngì tai-to ngài liá-vi lòi!” Kì chhiu hien sêu-fa-chi.
[10] Kì hien-chi yit vàn-sṳ̀n, Sat-mû-ngí chhiu to. Só-lò chhut-hi ngiàng-chiap kì, oi lâu kì chhiáng-ôn,
[11] chúng-he Sat-mû-ngí chit-phi kì: “Ngì cho má-ke sṳ nè?” Só-lò kóng: “Ngìn-mìn lì-khôi ngài san-thet hi, ngì me mò cheu yok-hó ke sṳ̀-kiên lòi, chai-kóng, Fî-li-sṳ-ngìn yu chhi-si̍p chhai Me̍t-mat.
[12] Ngài sióng, Fî-li-sṳ-ngìn oi chhai Kit-kap kûng-kit ngài, ngài hàn-màng tet-tó Song-chú ke khon-ku, só-yî ngài mò nai-hò chhṳ-kâ chhiu hi hien-chi.”
[13] Sat-mû-ngí tui Só-lò kóng: “Ngì ngióng-pân án fù-thù! Ngì ngióng-pân mò chûn-sú Song-chú — ngì Song-ti pûn ngì ke min-lin? Na-he ngì chûn-sú, Song-chú voi sṳ́ ngì lâu ngì ke heu-thoi yún-yén thúng-chhṳ Yî-set-lie̍t.
[14] Liá-ha, ngì ke vòng-vi m̀-voi chhòng-kiú, yîn-vi ngì mò thâng-chhiùng Kì. Song-chú oi chhìm ha̍p Kì sîm-yi ke ngìn, li̍p kì cho Kì chṳ́-mìn ke thúng-chhṳ-chá.”
[15] Yèn-heu, Sat-mû-ngí lì-khôi Kit-kap, ki-siu̍k kì ke hàng-chhàng. Khì-thâ ke ngìn-mìn thèn Só-lò, hi lâu kì ke phu-chhui fi-ha̍p. Kì-têu tui Kit-kap to Phien-ngâ-mén thi-khî ke Kî-pí-â. Só-lò son kì ke phu-chhui, thai-yok yû liuk-pak ngìn.
[16] Só-lò lâu kì ke lai-é Yok-nâ-tân, hàn-yû thèn kì-têu ke ngìn, chhai Phien-ngâ-mén thi-khî ke Kâ-pâ ôn-yàng; Fî-li-sṳ-ngìn chhai Me̍t-mat ôn-yàng.
[17] Fî-li-sṳ ke kiûn-chhui tui yàng-thi fûn sâm-chhui chhut-lòi kûng-kit: Yit-chhui hiong Sû-â thi-khî ke Ngò-fut-lâ hi,
[18] yit-chhui hiong Pak-Fò-lùn hi, nang-ngoi yit-chhui chhai Sé-pô-yîm sân-lak ke tui-mien vông khóng-yâ ke sân-tú hi.
[19] Ke-sṳ̀, Yî-set-lie̍t chhiòn-thi mò tá-thiet sṳ̂-fu, yîn-vi Fî-li-sṳ-ngìn m̀-pûn Hî-pak-lòi-ngìn chṳ-chho tô-kiam ya-he chhiông.
[20] (Yî-set-lie̍t-ngìn oi chhìm Fî-li-sṳ-ngìn lòi nò lài-è, kiok-thèu, pú-thèu, liàm-è.
[21] Nò pú-thèu lâu kiuk-ngiù ke chhiuk-kun oi yit-chak se thùng-chhièn; nò lài-è lâu kiok-thèu chhiu oi lióng-chak thùng-chhièn.)
[22] Só-yî, siông-chhṳ̀ ke sṳ̀, chhù-liáu Só-lò lâu kiâ lai-é Yok-nâ-tân yî-ngoi, Yî-set-lie̍t kiûn-chhui mò yit-ke sṳ-pîn yû tô-kiam ya-he chhiông.
[23] Fî-li-sṳ-ngìn phai yit-chhui chu-fòng pîn hi chóng-tén Me̍t-mat chhut-ngi̍p ke lu-héu.