[1] Fî-li-sṳ-ngìn chhióng-tó Song-ti ke yok-khui yî-heu, kì-têu tui Yî-phien-yî-chhia chiông kì kông-tó Â-sṳ̍t-thut-sàng.
[2] Fî-li-sṳ-ngìn chiông Song-ti ke yok-khui kông-ngi̍p Thai-kún sṳ̀n-meu tú, piong chhai Thai-kún sṳ̀n-siong ke sùn-thèu.
[3] Thi-ngi ngit tá-chó, Â-sṳ̍t-thut-ngìn hong-hí-lòi, khon-tó Thai-kún sṳ̀n-siong mien-hiong thi-nài, vang chhai Song-chú yok-khui thèu-chhièn. Kì-têu chiông kì fù hí-lòi, piong-chón ngièn-lòi ke só-chhai.
[4] Thi-sâm chêu-sṳ̀n, kì-têu hong-hí-lòi yu khon-tó Thai-kún sṳ̀n-siong mien-hiong thi-nài, vang chhai Song-chú yok-khui thèu-chhièn. Liá-pái, Thai-kún ke thèu-nà lâu sûng-sú chhiòn-phu áu thôn-thet, tiet chhai mùn-khiâm, chṳ́-yû chhûn-to vû-sṳ̂n.
[5] (Só-yî, chhṳ̍t-to kîm-pû-ngit, Thai-kún-sṳ̀n ke chi-sṳ̂ lâu só-yû chhai Â-sṳ̍t-thut ke sin-thù chhiòn-phu khiam-ko Thai-kún sṳ̀n-meu ke mùn-khiâm, m̀-kám tha̍p sông-hi.)
[6] Song-chú chhûng-chhûng chit-fa̍t Â-sṳ̍t-thut lâu si chû-vì thi-khî ke ngìn-mìn, sṳ́ kì-têu chhiòn-phu pot thu̍k lia̍p-é, kiâng-to mò-kat mò-sat.
[7] Kì-têu khon-tó liá chhìn-hìn, chhiu kóng: “Yî-set-lie̍t ke Song-ti chhûng-chhûng chit-fa̍t ngài-têu lâu ngài-têu ke Thai-kún sṳ̀n lé. Ngài-têu cho-m̀-tet ki-siu̍k chiông yok-khui liù chhai liá-vi.”
[8] Só-yî, kì-têu phai-ngìn hi chhiáng Fî-li-sṳ ke ńg-ke liâng-chhiu lòi, mun kì-têu: “Ngài-têu yin-kôi ngióng-pân lòi chhú-lî Yî-set-lie̍t Song-ti ke yok-khui nè?” Kì-têu en-kóng: “Chiông kì sái-to Kâ-thi̍t hi!” Só-yî mìn-chung chhiu chiông Yî-set-lie̍t Song-ti ke yok-khui sái-to ke-vi.
[9] Chúng-he yok-khui sái-to ke-vi yî-heu, Song-chú ya chit-fa̍t ke-sàng, yîn-hí tông-thai ke kín-chông. Song-ti sṳ́ chhiòn-sàng só-yû ke ngìn pot thu̍k lia̍p-é, ló ke, heu-sâng ke chhiòn-phu khiung-yong.
[10] Só-yî kì-têu chiông Song-ti ke yok-khui sung-to Fî-li-sṳ nang-ngoi yit-ke sàng Yî-kiet-lùn hi. Song-ti ke yok-khui to ke-vi ke sṳ̀, Yî-kiet-lùn ngìn chhiòn-phu chhin hêm kóng: “Kì-têu chiông Yî-set-lie̍t Song-ti ke yok-khui kông-lòi, oi chiông ngài-têu chhiòn-phu hoi-sí!”
[11] Só-yî, kì-têu phai-ngìn hi chhiáng Fî-li-sṳ ke ńg-ke liâng-chhiu lòi, tui kì-têu kóng: “Chiông Yî-set-lie̍t Song-ti ke yok-khui sung-chón kì ngièn-lòi ke thi-fông hi! Án-ngiòng kì chang m̀-voi hoi-sí ngài-têu lâu ngài-têu ke ngìn-mìn.” Yîn-vi Song-ti chhûng-chhûng chit-fa̍t kì-têu, chhiòn-sàng ke ngìn pûn sí kiâng-to mò-kat mò-sat.
[12] Ke-têu mò sí ke ngìn ya mân-sṳ̂n pot thu̍k lia̍p-é. Thai-kâ chhiu chhin-hêm, hiong kì-têu ke sṳ̀n-mìn khiù kiu-miang.