[1] Chhai Yî-fap-lièn sân-khî ke Lâ-mâ-sàng yû yit-ke ngìn, miàng-ham Yî-li-kâ-nâ. Kì he Yâ-lò-hón ke lai-é, Yî-li-fu ke sûn-é, he su̍k Yî-fap-lièn kî-chhu̍k, Sû-fut chûng-chhu̍k, Thok-fu kâ-chhu̍k ke ngìn.
[2] Yî-li-kâ-nâ yû lióng-ke pû-ngiòng — Ha̍p-nâ lâu Pí-nì-nâ. Pí-nì-nâ yû chṳ́-ńg, Ha̍p-nâ chhiu mò.
[3] Yî-li-kâ-nâ tak-ngièn tui Lâ-mâ to Sṳ-lò hi kin-pai Song-chú — Van-kiûn ke Ngièn-soi, hiong Kì hien-chi. Chhai ke-vi, yû Yî-li ke lióng-ke lai-é — Hò-fut-nì lâu Fî-nì-ha̍p cho Song-chú ke chi-sṳ̂.
[4] Yî-li-kâ-nâ tak-pái hien-chi heu, yit-thin chiông chi-ko ke ngiuk pûn-pûn Pí-nì-nâ yit-fun, pûn kì ke chṳ́-ńg kok yit-fun.
[5] Chúng-he pûn Ha̍p-nâ ke he thi̍t-sién ke sûng-fun, yîn-vi Yî-li-kâ-nâ tông-siak Ha̍p-nâ, sûi-yèn Song-chú yit-chhṳ̍t mò pûn kì kiung.
[6] Ha̍p-nâ ke tui-thèu Pí-nì-nâ sòng-sòng vú-yu̍k kì, khî-fu kì, yîn-vi Song-chú mò pûn kì chṳ́-ńg.
[7] Liá-chúng chhìn-hìn ngièn-ngièn khiung-yong, tak-pái kì-têu lòi-to Song-chú ke thien, Pí-nì-nâ chhiu sṳ́ Ha̍p-nâ kân-khú to liù muk-chṳp, sṳ̍t m̀-lo̍k tûng-sî.
[8] Kiâ ló-kûng Yî-li-kâ-nâ voi mun kì: “Ha̍p-nâ! Ngì cho-má-ke kieu? Cho-má-ke m̀ sṳ̍t tûng-sî? Ngì ngióng-pân án sông-sîm? Yû ngài kám m̀-he pí yû sṳ̍p-ke lai-é kha-yàng?”
[9] Yû yit-pái, kì-têu chhai Sṳ-lò, chhai Song-chú ke thien sṳ̍t-páu fan, Ha̍p-nâ khî hí-lòi. Kì fî-sòng nàn-ko, chhiu khôi-sâng thai-kieu, kín-kieu kín hiong Song-chú khì-tó. Ke-sṳ̀, chi-sṳ̂ Yî-li chhô chhai thien mùn-sùn chi-sṳ̂ ke chho-vi.
[11] Ha̍p-nâ hí-ngien kóng: “Song-chú — Van-kiûn ke Ngièn-soi â, chhiáng khon-ku Ngì sṳ́-ńg ke khú-chhìn, ki-ngiam ngài, m̀-hó m̀ ki-tet ngài! Na-he Ngì su-pûn ngài yit-ke lai-é, ngài yit-thin voi chiông kì yit-sên-ngìn hien-pûn Ngì; kì ke thèu-nà-mô yit-chhṳ̍t m̀ thi-thet.”
[12] Ha̍p-nâ yit-chhṳ̍t hiong Song-chú khì-tó; Yî-li kín-khon kì ke choi-sùn.
[13] Yîn-vi Ha̍p-nâ sîm-chûng tiâm-tiâm khì-tó, chṳ́-yû choi-sùn thîn-thûng, mò chhut-sâng, Yî-li láu-tó kì sṳ̍t chiú-chui,
[14] chhiu tui kì kóng: “Ngì oi chui-to kí-sṳ̀? M̀-hó chai chui lé!”
[15] Ha̍p-nâ en-kóng: “Thai-ngìn â, m̀-he án-ngiòng! Ngài kîn-pún mò lîm-chiú; ngài he sîm-tú kân-khú ke fu-ńg, tông lâu Song-chú kóng ngài só-yû ke khú-chhìn.
[16] M̀-hó láu-tó ngì ke sṳ́-ńg he mò kûi-kí ke fu-ngìn-kâ; ngài yit-chhṳ̍t chhai liá khì-tó, yîn-vi ngài sṳ̍t-chhai chhin sông-sîm, chhin thung-khú.”
[17] Yî-li kóng: “Ngì cho-tet phìn-phìn ôn-ôn chón-hi! Ngien Yî-set-lie̍t ke Song-ti cheu ngì só-khiù ke su-pûn ngì!”
[18] Ha̍p-nâ kóng: “Ngien ngì sòng-sòng yung chhṳ̀-oi khoán-thai ngì ke sṳ́-ńg.” Kóng-so̍t, kì chhiu lì-khôi, hi sṳ̍t tûng-sî, mien mò-chai yù-sèu.
[19] Thi-ngi chêu-sṳ̀n, Yî-li-kâ-nâ chhiòn-kâ ngìn tá-chó hong-hí-lòi kin-pai Song-chú, yèn-heu chhiu chón Lâ-mâ hi. Yî-li-kâ-nâ lâu kiâ pû-ngiòng Ha̍p-nâ thùng-fòng, Song-chú thâng Ha̍p-nâ ke khì-tó,
[20] kì chhiu yû sṳ̂n-hong, kiung yit-ke lai-é. Ha̍p-nâ lâu se-ngìn-è ôn-miàng Sat-mû-ngí, yîn-vi kì kóng: “Liá he ngài hiong Song-chú khiù-lòi ke.”
[21] Hi Sṳ-lò ke sṳ̀-kiên yu to lé, Yî-li-kâ-nâ tai kiâ vuk-hâ ngìn sông-hi hiong Song-chú hien ngièn-chi, vàn kì só-hí ke ngien.
[22] Liá-pái Ha̍p-nâ mò-hi; kì tui ló-kûng kóng: “Tén se-ngìn-è tón-nen, ngài chang tai kì hi chhèu-kien Song-chú, pûn kì yit-sên-ngìn liù chhai ke-vi.”
[23] Yî-li-kâ-nâ en-kóng: “Hó! Ngì ngin-vì án-ngiòng cho kha-hó, chhiu án-ngiòng cho; liù chhai vuk-hâ tén se-ngìn-è tón-nen yî-heu chang hi! Chúng-he, ngien Song-chú sṳ̍t-hien Kì chhṳ-kâ ke fa!” Só-yî Ha̍p-nâ liù chhai vuk-hâ yông-yuk se-ngìn-è.
[24] Se-ngìn-è tón-nen yî-heu, Ha̍p-nâ tai kì to Sṳ-lò hi, thùng-sṳ̀ khiên-hi yit-chak sâm-se ke ngiù-kú, sṳ̍p kûng-kîn mien-fún, yit phì-thoi chiú. Ha̍p-nâ tai-tén hàn-se ke Sat-mû-ngí hi Sṳ-lò, to Song-chú ke thien.
[25] Chhṳ̀-thet ngiù-kú yî-heu, kì-têu chhiu chiông se-ngìn-è kâu-pûn Yî-li.
[26] Ha̍p-nâ tui kì kóng: “Thai-ngìn â, ngài fat-sṳ, ngài chhiu-he ngì yî-chhièn khon-tó, khî chhai liá-vi hiong Song-chú khì-tó ke fu-ngìn-kâ.
[27] Ngài hiong Song-chú khiù liá se-ngìn-è, Kì cheu ngài só-khiù ke su-pûn ngài.
[28] Só-yî ngài oi chiông kì hien-pûn Song-chú; kì oi yit-sên-ngìn kûi-su̍k Song-chú.” Kì chhiu chhai ke-vi kin-pai Song-chú.