[1] Yû yit-ke Phien-ngâ-mén kî-chhu̍k ke ngìn, miàng ôn-to Kî-sṳ; kì he Â-phe̍t ke lai-é, Sé-lò ke sûn-é, su̍k Â-fî-â chûng-chhu̍k, Pí-kô-lâ kâ-chhu̍k ke ngìn. Kî-sṳ yû chhièn, yû thi-vi.
[2] Kì yû yit-ke lai-é miàng ôn-to Só-lò, he yit-ke tông chap-chen, tông yèn-tàu ke heu-sâng ngìn, mò ngìn lâu kì pí é-tet. Só-lò pí chui-kô ke Yî-set-lie̍t-ngìn hàn kô kâ yit-chak thèu.
[3] Kî-sṳ yû kí-chak lì-è tá m̀ kien-thet; kì tui Só-lò kóng: “Ngì tai yit-ke phu̍k-ngìn khiung-ha hi-chhìm lì-è!”
[4] Kì-têu hàng-phien Yî-fap-lièn sân-khî lâu Sâ-li-sâ thi-khî, chúng-he mò chhìm-tó. Kì-têu ki-siu̍k chhìm, kîn-ko Sâ-lìm thi-khî, lì-è ya mò chhai ke-vi. Só-yî kì-têu to Phien-ngâ-mén thi-khî hi-chhìm, hàn-he mò chhìm-tó.
[5] Heu-lòi, kì-têu to Sû-fut thi, Só-lò tui kì ke phu̍k-ngìn kóng: “Ngài-têu chón-hi kha-hó! Kiâng-pha ngâ-pâ mò-chai sèu lì-è, tiên-to sèu ngài-têu.”
[6] Phu̍k-ngìn kóng: “Tén yit-ha. Chhai liá-sàng yû yit-ke sṳ̀n-ngìn, su thai-kâ chûn-chhung, yîn-vi kì só-kóng ke tak-khien sṳ chhiòn-phu sṳ̍t-hien. Ngài-têu hi-mun kì, mò yit-thin kì voi lâu ngài-têu kóng to nai-vi hi chhìm lì-è.”
[7] Só-lò kóng: “Na-he ngài-têu hi kien kì, yû má-ke tûng-sî hó sung-pûn kì? Ngài-têu thoi-tú yí-kîn mò sṳ̍t-vu̍t, mò tûng-sî hó sung-pûn ke sṳ̀n-ngìn.”
[8] Phu̍k-ngìn en-kóng: “Ngài yû yit-chak se ngiùn-pi, cho-tet sung ke sṳ̀n-ngìn, chhiáng kì lâu ngài-têu kóng, oi to nai-vi hi-chhìm lì-è.”
[9] Só-lò kóng: “Cho-tet ô! Ngài-têu lòi-hi.” Kì-têu chhiu hiong sṳ̀n-ngìn só-he̍t ke sàng-tú hi. Kì-têu hàng-sông sân-kia, oi ngi̍p-sàng ke sṳ̀ tù-tó kí-ke chhut-lòi tá-súi ke se-moi-é, chhiu mun kì-têu: “Siên-kien chhai sàng-tú mò?” (Thèu-pái, siên-tî pûn Yî-set-lie̍t-ngìn chhṳ̂n-cho siên-kien. Na-he yû-ngìn oi khiù-mun Song-ti, chhiu kóng: “Ngài-têu lòi-hi kien siên-kien!”)
[12] Se-moi-é en-kóng: “He â, kì chhai sàng-tú. Khì-sṳ̍t, kì chhiu chhai ngì-têu thèu-chhièn mò kí-yén! Ngì-têu kiak-kiak ngi̍p-sàng hi-chhìm kì. Kì kîm-pû-ngit to sàng-tú lòi, he yîn-vi mìn-chung oi chhai sân-táng ke chi-thàn hien-chi.
[13] Mìn-chung yit-thin oi tén kì lòi, yîn-vi kì oi siên vi chi-vu̍t chuk-fuk, kì-têu chang cho-tet sṳ̍t. Na-he ngì-têu liá-ha chhiu ngi̍p-sàng hi, cho-tet chhai kì sông-sân sṳ̍t tûng-sî yî-chhièn chhìm-tó kì.”
[14] Só-lò lâu kì ke phu̍k-ngìn ki-siu̍k hiong-chhièn hàng, oi ngi̍p-sàng ke sṳ̀, khon-tó Sat-mû-ngí hiong kì-têu liá fông-hiong lòi, oi to kin-pai ke chi-thàn ke-vi hi.
[15] Só-lò hàn-màng to ke chhièn yit-ngit, Song-chú yí-kîn chṳ́-sṳ Sat-mû-ngí kóng:
[16] “Thiên-kông-ngit liá-sṳ̀, Ngài voi phai yit-ke Phien-ngâ-mén kî-chhu̍k ke ngìn to ngì liá-vi lòi. Ngì oi yung yù kò kì, li̍p kì cho Ngài chṳ́-mìn Yî-set-lie̍t ke thúng-chhṳ-chá. Kì voi kiu kì-têu thot-lì Fî-li-sṳ-ngìn ke sú. Ngài ke chṳ́-mìn su-khú, Ngài yû khon-tó; kì-têu ke ôi-khiù Ngài yû thâng-tó.”
[17] Sat-mû-ngí khon-tó Só-lò ke sṳ̀, Song-chú tui kì kóng: “Khon â! Liá-ke ngìn chhiu-he Ngài lâu ngì kóng ke ngìn; kì voi chhṳ-lî Ngài ke chṳ́-mìn.”
[18] Ke-sṳ̀ Sat-mû-ngí lòi-to sàng-mùn sùn; Só-lò hàng-chhièn mun kì: “Chhiáng-mun, siên-kien he̍t chhai nai-vi?”
[19] Sat-mû-ngí en-kóng: “Ngài chhiu-he siên-kien. Ngì siên-hàng, siên-to chi-thàn hi. Ngì lióng-sà kîm-pû-ngit oi lâu ngài khiung-ha sṳ̍t-fan; thiên-kông chêu-sṳ̀n ngài voi fì-tap ngì só-yû ke mun-thì, yèn-heu sung ngì lì-khôi.
[20] Sâm-ngit chhièn tá m̀ kien-thet ke kí-chak lì-è, ngì m̀-sṳ́ sèu, yí-kîn chhìm-tó lé. Chúng-he, Yî-set-lie̍t ngìn-mìn chhin khì-thai ke he má-ngìn nè? M̀-he ngì lâu ngiâ-pâ ke kâ-chhu̍k mâ?”
[21] Só-lò en-kóng: “Ngài su̍k Phien-ngâ-mén kî-chhu̍k, he Yî-set-lie̍t chui-se ke kî-chhu̍k. Ngài kâ-chhu̍k me he Phien-ngâ-mén kî-chhu̍k chûng chui pî-mì ke kâ-chhu̍k. Ngì cho-má-ke tui ngài kóng án-ngiòng ke fa?”
[22] Sat-mû-ngí thu Só-lò lâu kì ke phu̍k-ngìn ngi̍p-hi yit-kiên thai fòng-kiên, pûn kì-têu chhô thai-vi. Ke-vi thai-yok yû sâm-sṳ̍p ke ngìn-hak, thai-kâ chhiòn-phu chhô-hó.
[23] Sat-mû-ngí tui chú-sṳ̍t ke kóng: “Hi chiông ngài kâu-pûn ngì ke-te thi̍t-phe̍t liù hâ-lòi ke ngiuk nâ-lòi.”
[24] Chú-sṳ̍t ke chhiu chiông ke-te thi̍t-sién ke heu-thúi ngiuk nâ-lòi, piong chhai Só-lò mien-chhièn, Sat-mû-ngí kóng: “Liá he vi ngì liù-hâ ke ngiuk. Nâ-hi sṳ̍t! Liá he ngài thi̍t-phe̍t liù hâ-lòi, oi chhai ngìn-hak mien-chhièn pûn ngì ke.” Ke-ngit, Só-lò chhiu lâu Sat-mû-ngí khiung-ha sṳ̍t-fan.
[25] Kì-têu tui sân-táng ke chi-thàn chón-sàng yî-heu, Sat-mû-ngí lâu Só-lò chhai vuk-táng kóng-fa.
[26] Thi-ngi chêu-sṳ̀n, kì-têu tông-chó chhiu hong hí-lòi. Sat-mû-ngí to vuk-táng ham Só-lò: “Oi chún-phi hó! Ngài sung ngì chón.” Só-lò chún-phi hó-se, lâu Sat-mû-ngí khiung-ha to kiê-hong hi.
[27] Kì-têu hàng-to sàng-sùn, Sat-mû-ngí tui Só-lò kóng: “Ham ngì ke phu̍k-ngìn siên-hàng.” Phu̍k-ngìn lì-khôi yî-heu, Sat-mû-ngí kóng: “Chhai liá-vi thìn yit-ha, ngài oi chiông Song-ti ke fa lâu ngì kóng.”