[1] Sat-mû-ngí tui só-yû ke Yî-set-lie̍t-ngìn kóng: “Ngài yí-kîn cheu ngì-têu ke yêu-khiù li̍p-vòng chhṳ-lî ngì-têu.
[2] Liá-ha, ngì-têu yû vòng hó tai-liâng ngì-têu. Ngài yí-kîn án-ló, thèu-nà-mô pha̍k lô, ngài ke lai-é chhiòn-phu chhai ngì-têu tông-chûng. Ngài heu-sâng to liá-ha, yit-chhṳ̍t tai-liâng ngì-têu.
[3] Liá-ha, ngài chhai liá-vi; na-he ngài cho-ko má-ke m̀-chho̍k ke sṳ, ngì-têu cho-tet chhai Song-chú lâu Kì kò-yù li̍p ke vòng mien-chhièn ko ngài. Ngài chhióng-ko ngìn ke ngiù ya-he lì-è mò? Ngài sṳt khî-phien ya-he ap-chṳ má-ngìn mò? Ngài sṳt pûn má-ngìn sû-mâi mò? Na-he ngài cho-ko liá-chúng sṳ, ngài yit-thin oi phòi.”
[4] Mìn-chung en-kóng: “Ngì m̀-sṳt khî-phien ngài-têu ya m̀-sṳt ap-chṳ ngài-têu; ngì m̀-sṳt tui má-ngìn nâ mò yin-kôi nâ ke tûng-sî.”
[5] Sat-mû-ngí tui kì-têu kóng: “Kîm-pû-ngit, Song-chú lâu Kì kò-yù li̍p ke vòng he ngài ke chṳn-ngìn; ngì-têu tî ngài he chhîn-pha̍k ke.” Mìn-chung kóng: “Mò m̀-chho̍k! Song-chú cho-tet vi ngài-têu cho-chṳn.”
[6] Sat-mû-ngí ki-siu̍k tui ngìn-mìn kóng: “Sṳ̍t-chhai he Song-chú kién-sién Mô-sî lâu Â-lùn, Kì yu tai-liâng ngì-têu ke chú-siên chhut Âi-khi̍p.
[7] Liá-ha, ngì-têu oi khî-hó! Ngài chhai Song-chú mien-chhièn oi kín-ko ngì-têu: Song-chú vi-tó kiu ngì-têu lâu ngì-têu ke chú-siên hàng án tô kûng-ngi ke thai-sṳ.
[8] Ngâ-kok chhiòn-kâ to Âi-khi̍p hi, heu-lòi Âi-khi̍p-ngìn khî-fu kì-têu ke sṳ̀, ngì-têu ke chú-siên hiong Song-chú khiù-ham. Song-chú chhiu phai Mô-sî lâu Â-lùn tai-liâng kì-têu chhut Âi-khi̍p, chiông kì-têu ôn-tún chhai liá só-chhai.
[9] “Mò sióng-tó kì-têu sa m̀ ki-tet Song-chú — kì-têu ke Song-ti. Só-yî, Song-chú pûn Fî-li-sṳ-ngìn, Mô-ap-vòng lâu Ha-só-sàng ke chiông-kiûn Sî-sî-lâ kûng-tá ngì-têu ke chú-siên, chṳ̂n-fu̍k kì-têu.
[10] Só-yî kì-têu hiong Song-chú khiù-ham kóng: ‘Song-chú â! Ngài-têu yû-chhui lé; yîn-vi ngài-têu phoi-ngia̍k Ngì, hi-pai ke-têu Pâ-li̍t lâu Â-sṳ̂-thâ-liu̍k. Liá-ha khiù Ngì kiu ngài-têu lì-khôi sù-thi̍t! Ngài-têu yit-thin voi kin-pai Ngì!’
[11] Song-chú chhiu phai Kî-thien, Pâ-lâ lâu Yâ-fut-thâ, chui-mî phai ngài lòi-kiu ngì-têu thot-lì si chû-vì ke sù-thi̍t, sṳ́ ngì-têu phìn-ôn ko-ngit.
[12] Chúng-he ngì-têu khon-tó Â-mùn-ngìn ke vòng Nâ-hot kûng-kit ngì-têu, chhiu khî-chhie̍t Song-chú — ngì-têu ke Song-ti cho ngì-têu ke vòng, yêu-khiù ngài kóng: ‘Ngài-têu yit-thin oi yû vòng lòi chhṳ-lî ngài-têu.’
[13] “Liá-ha, ngì-têu só sién ke vòng chhai liá-vi. Ngì-têu oi yit-ke vòng; khon nâ, Song-chú yí-kîn pûn ngì-têu lé.
[14] Ngì-têu na kin-vi Song-chú — ngì-têu ke Song-ti, sṳ-fung Kì, thâng-chhiùng Kì, chûn-sú Kì ke kie-min, ngì-têu lâu ngì-têu ke vòng na tui Kì chûng-sṳ̀n, ngì-têu chhiu voi phìn-ôn mò-sṳ.
[15] Chúng-he, ngì-têu na m̀ thâng-chhiùng Song-chú, m̀ chûn-sú Kì ke kie-min, Kì chhiu voi kûng-kit ngì-têu, chhiong thèu-pái kûng-kit ngì-têu ke chú-siên khiung-yong.
[16] Liá-ha, ngì-têu khî-hó! Ngì-têu voi khon-tó Song-chú oi cho ke thai-sṳ.
[17] Liá-ha kám m̀-he sû-kot, m̀-voi lo̍k-yí ke sṳ̀-khì? Chúng-he ngài oi khì-khiù Song-chú, Kì chhiu voi tá lùi-kûng, lo̍k-yí. Ngì-têu khon-tó chhiu tî, ngì-têu hiong Song-chú thó oi li̍p-vòng he fam thai-chhui.”
[18] Só-yî, Sat-mû-ngí khì-khiù Song-chú; ke-ngit, Song-chú chhiu tá lùi-kûng, lo̍k-yí. Ngìn-mìn chhiòn-phu chhin-kiâng Song-chú lâu Sat-mû-ngí;
[19] kì-têu tui Sat-mû-ngí kóng: “Chhiáng vi phu̍k-ngìn hiong Song-chú — ngì ke Song-ti khì-tó, miên-tet ngài-têu sí-thet. Liá-ha ngài-têu tî, ngài-têu thó oi li̍p-vòng he chhui-song kâ-chhui.”
[20] Sat-mû-ngí en-kóng: “M̀-sṳ́ kiâng! Sûi-yèn ngì-têu cho liá fái-sṳ, chúng-he cho-m̀-tet lì-khôi Song-chú, fán-chón oi chôn-sîm sṳ-fung Kì.
[21] Ngì-têu m̀-hó lì-khôi Song-chú hi-thèn ke-têu ká-sṳ̀n, kì-têu m̀-voi pông-chhu ngì-têu, kiu ngì-têu, yîn-vi kì-têu he ká ke.
[22] Song-chú yîn-vi Kì chhṳ-kâ ke sṳn-miàng, chhie̍t-tui m̀-voi vok-thet ngì-têu, yîn-vi Kì fôn-hí sién ngì-têu cho Kì chhṳ-kâ ke chṳ́-mìn.
[23] Lun-tó ngài, Song-chú oi ngài yit-chhṳ̍t vi ngì-têu khì-tó, án-ngiòng ngài chang m̀-voi chai tet-chhui Kì. Ngài voi kâu ngì-têu ngióng-pân cho hó-sṳ hàng chṳn-lu.
[24] Oi kin-vi Song-chú, sṳ̀n-sîm sṳ̀n-yi sṳ-fung Kì; oi ki-tet Kì vi ngì-têu cho-ko ke thai-sṳ.
[25] Na-he ngì-têu yit-chhṳ̍t kín fam-chhui, ngì-têu lâu ngì-têu ke vòng chhiu voi me̍t-mòng.”