[1] Ha̍p-nâ khì-tó kóng: Song-chú sṳ́ ngài sîm-kôn chhûng-mân fôn-hí; Song-chú sṳ́ ngài thèu-nà khià-to kô-kô. Ngài hiong ngài ke thi̍t-ngìn khôi-choi thai-seu, yîn-vi Song-ti kiu ngài, sṳ́ ngài khoai-lo̍k.
[2] Chṳ́-yû Song-chú he sṳ̀n-sṳn ke; chhù Kì yî-ngoi mò phe̍t-ke sṳ̀n, vì-yû Song-ti he pó-fu ngài-têu ke Phàn-sa̍k.
[3] Ngì-têu ke kóng-fa m̀-hó án kiêu-ngau; ngì-têu m̀-hó chhiong tiên-é kóng khòng-fa. Yîn-vi Song-chú chṳ̂n tî yit-chhiet; Kì he sṳ́m-phan ngìn ke Song-ti.
[4] Yúng-sṳ ke kiûng pûn-ngìn áu-thôn; ngiôn-ngio̍k ke ngìn pien-cho khiòng-chong.
[5] Yû-chhièn ngìn fán-chón vi-tó sṳ̍t lò-luk; mò hó-sṳ̍t ke ngìn m̀-voi chai tú-kî. M̀-voi kiung ke pû-ngiòng kiung chhit-ke; tông-voi kiung ke sa sóng-thet chṳ́-ńg.
[6] Song-chú nèn sṳ́ ngìn sí, ya nèn sṳ́ ngìn sâng; Kì sṳ́ ngìn lo̍k yîm-kiên, ya sṳ́ ngìn fán-sâng.
[7] Kì sṳ́ ngìn phìn-khiùng, ya sṳ́ ngìn fu-chiuk; Kì sṳ́ ngìn pî-mì, ya sṳ́ ngìn chûn-kui.
[8] Kì tui nài-fún chûng kô-sṳ̂n khiùng-khú ngìn; Kì tui pun-tôi tú khiên-hí khun-khú ngìn. Kì sṳ́ kì-têu lâu vòng-chṳ́ cho phèn-yû, sṳ́ kì-têu chhô thai-vi chhin-yû mien-chṳ́. Thi ke kîn-kî he Song-chú só-li̍p ke; Kì chhai thi ke táng-kô kien-li̍p sṳ-kie.
[9] Song-chú khon-ku chûng-sîm chṳ́-mìn ke kiok-phu; sià-ok ke ngìn voi chhai vû-am chûng sêu-me̍t. Ngìn mò phan-fap kho chhṳ-kâ ke li̍t-liong lòi yàng.
[10] Song-chú oi chhù-me̍t chhṳ-kâ ke sù-thi̍t; Kì oi yung lùi-kûng chiông kì-têu tá-sí. Song-chú oi sṳ́m-phan chhiòn sṳ-kie. Kì oi su nèn-li̍t pûn Kì só-li̍p ke vòng, sṳ́ chhṳ-kâ kò-yù sat-li̍p ke vòng tet-sṳn.
[11] Heu-lòi, Yî-li-kâ-nâ chón Lâ-mâ hi lé; se-â-kô-é Sat-mû-ngí chhiu liù chhai Sṳ-lò, chhai chi-sṳ̂ Yî-li ke kau-thô chṳ̂-ha sṳ-fung Song-chú.
[12] Yî-li ke lióng-ke lai-é he lù-màn-é. Kì-têu méu-sṳ Song-chú,
[13] m̀ sú chi-sṳ̂ chhí chi-ngiuk ke kûi-thin. Chhai ngìn hien-chi ke sṳ̀, kì-têu sòng-sòng phai phu̍k-ngìn tai-tén sâm-chhṳ́ chhâ hi, ngiuk hàn chhai vo̍k-thèu tú chú,
[14] phu̍k-ngìn chhiu chiông sâm-chhṳ́ chhâ chhap lo̍k-hi, chhap-tó má-ke, nâ chhut-lòi chhiu-son he chi-sṳ̂ ke. Kì-têu án-ngiòng tui-thai só-yû lòi Sṳ-lò hien-chi ke Yî-set-lie̍t-ngìn.
[15] M̀ tân-chhiang án-ngiòng, sṳm-chṳ sên-ngì ke yù hàn-màng sêu yî-chhièn, chi-sṳ̂ ke phu̍k-ngìn chhiu lòi, tui hien-chi ke ngìn kóng: “Pûn ngài yit-te ngiuk, ngài oi nâ-hi pûn chi-sṳ̂ phoi. Kì mò-oi chú-ko ke, sâng-ngiuk kì chang oi.”
[16] Na-he ke-ngìn en-kóng: “Cheu kûi-thin oi siên chiông yù sêu-thet, yèn-heu chang cho-tet yù-chhai ngì nâ!” Chi-sṳ̂ ke phu̍k-ngìn chhiu voi kóng: “Cho-m̀-tet, ngài liá-ha chhiu oi! Na-he m̀ pûn ngài, ngài chhiu oi yung chhióng!”
[17] Chhai Song-chú khon-lòi, Yî-li liá lióng-ke lai-é ke chhui-ok he fî-sòng ngiàm-chhung, yîn-vi kì-têu m̀ chûn-chhung hien-pûn Song-chú ke chi-vu̍t.
[18] Ke-sṳ̀, Sat-mû-ngí hàn se; kì chok mà-sâ ke yî-fut-tet sṳn-fu̍k sṳ-fung Song-chú.
[19] Kiâ-mê tak-ngièn vi kì cho yit-liâng se chhòng-sâm, thèn ló-kûng hi-hien ngièn-chi ke sṳ̀ tai-pûn kì.
[20] Yî-li tak-pái chuk-fuk Yî-li-kâ-nâ lâu kiâ pû-ngiòng, tui kì kóng: “Ngien Song-chú thûng-ko ngì ke pû-ngiòng, chai su-pûn ngì chṳ́-ńg, lòi-thoi ngì hien-pûn Song-chú ke liá-ke lai-é.” Yèn-heu, kì-têu chhiu chón vuk-hâ hi.
[21] Song-chú su-fuk Ha̍p-nâ; kì yu kiung sâm-ke lai-é, lióng-ke moi-é. Se-â-kô-é Sat-mû-ngí sṳ-fung Song-chú, kín-lòi kín-thai.
[22] Yî-li yí-kîn tông-ló. Kì thâng-tó kì lióng-ke lai-é tui Yî-set-lie̍t-ngìn ke chúng-chúng fái hàng-vì, kì-têu sṳm-chṳ lâu ke-têu chhai sṳn-chong-phùng mùn-chhièn kûng-chok ke fu-ńg soi.
[23] Yî-li tui kì-têu kóng: “Ngì-têu ngióng-pân cho liá-chúng sṳ nè? Thai-kâ tû chiông ngì-têu só-cho ke fái-sṳ lâu ngài kóng.
[24] Ngâ lai-é â, cho-m̀-tet án-ngiòng! Chhai Song-chú chṳ́-mìn tông-chûng, liù-chhòn chhin-tô ngì-têu ke fái miàng-sâng!
[25] Na-he yû ngìn tet-chhui phe̍t-ngìn, hàn-yû Song-ti vi kì kóng-fa; chúng-he ngìn tet-chhui Song-chú, má-ngìn nèn vi kì kóng-fa nè?” Kì-têu m̀-thâng â-pâ ke fa, yîn-vi Song-ti yí-kîn kiet-thin oi chhṳ̀ kì-têu.
[26] Se-â-kô-é Sat-mû-ngí kín-lòi kín-thai, Song-chú lâu ngìn tông siak kì.
[27] Yû yit-ke sṳ̀n-ngìn lòi kien Yî-li, chiông Song-chú ke fa lâu kì kóng: “Ngì ke chú-siên Â-lùn kâ-chhu̍k cho Âi-khi̍p-vòng nù-chhòi ke sṳ̀, Ngài sṳt hiong kì khí-sṳ.
[28] Ngài tui Yî-set-lie̍t só-yû kî-chhu̍k tông-chûng, sién-chhut kì ke kâ-chhu̍k cho Ngài ke chi-sṳ̂, sṳ́ kì-têu chhai chi-thàn chhièn fu̍k-sṳ Ngài, hiong Ngài sêu-hiông, yu chok yî-fut-tet sṳn-fu̍k khiù-mun Ngài. Ngài hàn pûn kì-têu yû khièn-li hó pûn chi-thàn táng sêu-hien ke chi-ngiuk.
[29] Ngì-têu cho-má-ke khon-khiâng Ngài yêu-khiù Ngài chṳ́-mìn ke hien-chi lâu sên-ngì nè? Yî-li, ngì cho-má-ke khon-chhung ngiâ lai-é kô-ko khon-chhung Ngài, chún kì-têu chiông Ngài ke chṳ́-mìn Yî-set-lie̍t só-hien sên-ngì chûng chui-hó ke phu-fun nâ-hi hiuk-phì chhṳ-kâ nè?
[30] Ngài — Song-chú, Yî-set-lie̍t ke Song-ti sṳt yin-hí ngì ke kâ-chhu̍k lâu ngì ke chûng-chhu̍k voi yún-yén cho chi-sṳ̂ sṳ-fung Ngài. Chúng-he, Ngài liá-ha oi fi-chhù ngì-têu ke chṳt-vi! Chûn-chhung Ngài ke, Ngài yit-thin khon-chhung kì-têu; méu-sṳ Ngài ke, Ngài yit-thin khon-khiâng kì-têu.
[31] Khon â! Sṳ̀-chiet khoai to lé, Ngài oi sṳ́ ngì kâ-chhu̍k lâu ngì chûng-chhu̍k chûng ke heu-sâng ngìn tón-miang, mò ngìn chhòng-su.
[32] Ngì yit-thin voi fàn-lò, chhit-tu Ngài pûn khì-thâ Yî-set-lie̍t-ngìn ke fuk-hi. Ngì ke kâ-thìn m̀-voi chai yû-ngìn sṳ̍t-to ló.
[33] Ngài voi pó-liù yit-ke heu-thoi pûn ngì, sṳ́ kì cho chi-sṳ̂ sṳ-fung Ngài, chúng-he kì voi sṳ́ ngì chhiâng-miâng, chhie̍t-mong. Ngì só-yû khì-thâ ke heu-thoi chhiòn-phu voi mò hó-sí.
[34] Ngì lióng-ke lai-é Hò-fut-nì lâu Fî-nì-ha̍p voi khiung-ngit sí-thet; liá chhiu-he tui ngì hién-sṳ Ngài só-kóng ke fa chhiòn-phu voi sṳ̍t-hien ke chṳn-kí.
[35] Ngài oi sién yit-ke chi-sṳ̂, kì voi tui Ngài chûng-sîm, cheu Ngài ke sîm-yi cho-se. Ngài oi kiên-ku kì ke kâ-thìn; kì voi yún-yén chhai Ngài kò-yù sat-li̍p ke kiûn-vòng mien-chhièn fu̍k-sṳ.
[36] Ngì ke heu-thoi chûng liù hâ-lòi ke ngìn voi hiong ke chi-sṳ̂ khiù-khiet, thó-sṳ̍t, vi-tó ko ngit-è lòi yêu-khiù cho chi-sṳ̂ ke chhu-lî.”