[1] Thai-ví sîm-tú sióng: “Chúng-yû yit-ngit ngài voi lo̍k chhai Só-lò ke sú-chûng; ngài chui-hó hàn-he thò-to Fî-li-sṳ hi. Án-ngiòng, Só-lò voi mò fap-thu chhai Yî-set-lie̍t koet-nui chhìm-tó ngài, ngài chhiu cho-tet thot-lì kì ke sú.”
[2] Só-yî Thai-ví tai kì ke phu-ha liuk-pak ngìn, ngiàm-sṳ̀ hi thèu-kho Kâ-thi̍t-vòng — Mâ-ngò ke lai-é Â-kit.
[3] Thai-ví lâu phu-ha tai-tén kâ-chhu̍k, chhiu lâu Â-kit khiung-ha he̍t chhai Kâ-thi̍t. Thai-ví ke lióng-ke pû-ngiòng — Yâ-sṳ̂-lie̍t-ngìn Â-hî-nôn lâu Nâ-pa ke koá-fu Kâ-me̍t-ngìn Oi-pí-kâi lâu kì khiung-ha.
[4] Só-lò thâng-kóng Thai-ví thò-to Kâ-thi̍t hi, chhiu mò chai chhìm kì.
[5] Thai-ví tui Â-kit kóng: “Vòng na khon ngài cho phèn-yû, chhiáng pûn ngài he̍t chhai hiông-ha yit-ke se-sàng; phu̍k-ngìn ngióng cho-tet lâu vòng khiung-ha he̍t chhai kîn-sàng nè?”
[6] Só-yî Â-kit chiông Sé-kiet-lâ-sàng su-pûn Thai-ví. Tui ke-ngit hí, Sé-kiet-lâ-sàng chhiu su̍k Yù-thai ke vòng.
[7] Thai-ví he̍t chhai Fî-li-sṳ-ngìn ke thi-khî chhièn-heu yit-ngièn yu si-chak ngie̍t.
[8] Ke-chham khì-kiên, Thai-ví tai-liâng kì ke phu-ha hi kûng-tá Kî-sut-ngìn, Kî-set-ngìn lâu Â-mâ-li̍t-ngìn. (Liá-têu ngìn he̍t chhai ke thi-khî yí-kîn tông-kiú lé. Kì-têu ke thú-thi yén tui Sû-ngí, chhṳ̍t-to Âi-khi̍p.)
[9] Thai-ví chhiu voi chhṳ̀-sí só-yû ke nàm-ngìn, fu-ńg, yu chhióng kì-têu ke yòng-khiùn, ngiù-khiùn, lì-è, lo̍k-thò, lièn sâm-fu ya voi chhióng-chéu. Thai-ví siông-chhṳ̀ heu voi chón-to Â-kit ke-vi,
[10] Â-kit chhiu voi mun: “Kîm-pû-ngit ngì hi má-ke só-chhai siông-chhṳ̀?” Thai-ví voi kóng he “Yù-thai nàm-phu”, ya-he “Yâ-lâ-me̍t phu-lo̍k ke-vi”, ya-he “Kî-nì-ngìn he̍t ke só-chhai”.
[11] Thai-ví voi chhṳ̀-thet só-yû ke nàm-ngìn lâu fu-ńg, m̀ liù yit-sà, miên-tet ke-ngìn to Kâ-thi̍t hi po-ko kì lâu phu-ha fa̍t-thung ke chhìn-hìn. Liá chhiu-he Thai-ví he̍t chhai Fî-li-sṳ ke sṳ̀ sòng-sòng cho ke sṳ.
[12] Â-kit siông-sin Thai-ví; kì sióng: “Thai-ví yí-kîn sṳ́ chhṳ-kâ ke thùng-pâu Yî-set-lie̍t-ngìn nâu kì, só-yî kì yit-thin voi yit-sên-ngìn fu̍k-sṳ ngài.”