[1] Sat-mû-ngí nâ yit-âng kám-lám-yù, tó chhai Só-lò thèu-nà táng, chîm kì kóng: “Song-chú m̀-he kò-yù li̍p ngì cho Kì ke chṳ́-mìn Yî-set-lie̍t ke thúng-chhṳ-chá mâ? Ngì oi chhṳ-lî Song-chú ke chṳ́-mìn, kiu kì-têu lì-khôi si chû-vì só-yû ke sù-thi̍t. Yî-ha chhiu-he Song-chú kò-yù li̍p ngì cho Kì ke chṳ́-mìn thúng-chhṳ-chá ke chṳn-kí:
[2] Kîm-pû-ngit lì-khôi ngài yî-heu, ngì voi chhai Phien-ngâ-mén thi-khî ke Siet-sat, vá-khiun Lùi-kiet ke fùn-mu ke-vi tù-tó lióng-ke ngìn. Kì-têu voi lâu ngì kóng: ‘Ngì oi chhìm ke lì-è yí-kîn chhìm-tó lé. Ngiâ-pâ mò chai sèu lì-è, tiên-to sèu ngì, yit-chhṳ̍t mun ngìn: Ngài vi ngâ lai-é oi ngióng-pân chang hó?’
[3] Ngì tui ke-vi chai hiong-chhièn hàng, to Thâ-phok ke sṳn-su ke-vi, voi tù-tó sâm-ke ngìn; kì-têu oi hi Pak-thi̍t-li hiong Song-ti hien-chi. Khì-chûng yit-sà tai-tén sâm-chak se sân-yòng, nang-ngoi yit-sà tai-tén sâm-chak piáng, thi-sâm sà tai-tén yit phì-thoi chiú.
[4] Kì-têu voi lâu ngì chhiáng-ôn, pûn ngì lióng-chak piáng; ngì oi sû hâ-lòi.
[5] “Yèn-heu, ngì oi hi Kî-pí-â, to Song-ti ke sân; ke-vi yû Fî-li-sṳ-ngìn ke chu-fòng pîn. Ngì chhai ngi̍p-sàng ke só-chhai voi tù-tó yit-khiùn tui sân-táng chi-thàn ke-vi hâ-lòi ke siên-tî; kì-têu mien-chhièn yû-ngìn tá-kú, phùn-tha̍k, thàn su-khìm lâu chhit-hièn-khìm; kì-têu yu su-kám ngi̍p-sṳ̀n mong-hìn kóng-fa.
[6] Song-chú ke Lìn oi khiòng-lie̍t lìm-to ngì; ngì chhiu voi lâu kì-têu khiung-ha su-kám ngi̍p-sṳ̀n mong-hìn kóng-fa, chhiong pien nang-ngoi yit-ke ngìn.
[7] Liá-têu seu-thèu fat-sên ke sṳ̀, cho ngì cheu Song-ti chṳ́-sṳ ngì ke hi-cho, yîn-vi Song-ti lâu ngì khiung-ha.
[8] Ngì oi pí ngài siên to Kit-kap; ngài voi chhai ke-vi lâu ngì fi-ha̍p, yu hien sêu-fa-chi lâu phìn-ôn-chi. Ngì oi chhai ke-vi tén chhit-ngit; ngài to yî-heu, voi pûn ngì tî yin-kôi cho ke sṳ.”
[9] Só-lò lì-khôi Sat-mû-ngí ke sṳ̀, Song-ti sṳ́ kì ke sîm pien-cho sîn ke. Sat-mû-ngí lâu kì kóng ke tak-ke seu-thèu, ke-ngit chhiòn-phu sṳ̍t-hien lé.
[10] Só-lò lâu kì ke phu̍k-ngìn to Kî-pí-â ke sṳ̀, yit-khiùn siên-tî ngiàng-chiap kì. Song-ti ke Lìn khiòng-lie̍t lìm-to kì, kì chhiu lâu ke-khiùn siên-tî khiung-ha su-kám ngi̍p-sṳ̀n mong-hìn kóng-fa.
[11] Yî-chhièn ngin-sṳt Só-lò ke ngìn khon-tó kì án-ngiòng, thai-kâ fu-siông mun-kóng: “Kî-sṳ ke lai-é ngióng-voi án-ngiòng? Só-lò kám ya sàng-cho siên-tî mâ?”
[12] Ke thi-fông yû yit-ke ngìn kóng: “Án-ngiòng, khì-thâ ke ngìn nè? Kì-têu ke â-pâ he siên-tî mò?” Liá chhiu-he “Só-lò kám ya sàng-cho siên-tî mâ?” liá-ki siu̍k-ngî ke lòi-ngièn.
[13] Só-lò chhai ke-vi su-kám ngi̍p-sṳ̀n mong-hìn kóng-fa yî-heu, chhiu hi sân-táng chi-thàn ke-vi.
[14] Só-lò ke â-suk khon-tó kì lâu phu̍k-ngìn, chhiu mun kì-têu: “Ngì-têu to nai-vi hi?” Só-lò kóng: “Ngài-têu hi chhìm lì-è â! Chhìm m̀-tó, ngài-têu chhiu hi kien Sat-mû-ngí.”
[15] Só-lò ke â-suk mun: “Sat-mû-ngí lâu ngì-têu kóng má-ke?”
[16] Só-lò en-kóng: “Kì lâu ngài-têu kóng lì-è yí-kîn chhìm-tó lé.” Chúng-he Só-lò mò lâu kiâ-suk thì-hí Sat-mû-ngí só-kóng li̍p-vòng ke fa.
[17] Sat-mû-ngí seu-si̍p Yî-set-lie̍t-ngìn hi Mí-sṳ̂-pâ, to Song-chú ke mien-chhièn hi,
[18] tui kì-têu kóng: “Song-chú — Yî-set-lie̍t ke Song-ti kóng, Kì tai-liâng ngì-têu chhut Âi-khi̍p, kiu ngì-têu thot-lì Âi-khi̍p-ngìn lâu só-yû khî-fu ngì-têu ke koet-kâ.
[19] Kì he ngì-têu ke Song-ti, he kiu ngì-têu thot-lì só-yû châi-nan lâu ap-chṳ ke Song-ti. Chúng-he kîm-pû-ngit, ngì-têu khî-chhie̍t Kì, yêu-khiù ngài vi ngì-têu li̍p yit-ke vòng. Liá-ha ngì-têu oi cheu kî-chhu̍k lâu chûng-chhu̍k ke sun-si si̍p-ha̍p chhai Song-chú mien-chhièn.”
[20] Só-yî, Sat-mû-ngí ham Yî-set-lie̍t tak kî-chhu̍k hàng-chhièn lòi ngiâm-khiêu, chhiu ngiâm-chhut Phien-ngâ-mén kî-chhu̍k.
[21] Sat-mû-ngí ham Phien-ngâ-mén kî-chhu̍k ke tak kâ-chhu̍k hàng-chhièn lòi, ngiâm-chhut Mâ-thi̍t-li kâ-chhu̍k, yèn-heu ngiâm-chhut Kî-sṳ ke lai-é Só-lò. Chung-ngìn oi chhìm Só-lò, chúng-he chhìm kì m̀-tó.
[22] Kì-têu khiù-mun Song-chú: “Liá-sà ngìn yû lòi mò?” Song-chú en-kóng: “Só-lò chhai ke-phién, khong chhai pâu-fu̍k tôi heu-poi.”
[23] Yû ngìn chéu-hi lâi Só-lò chhut-lòi, tai kì to chung-ngìn tông-chûng; kì pí só-yû ke ngìn kô kâ yit-chak thèu.
[24] Sat-mû-ngí tui chung-ngìn kóng: “Ngì-têu khon, liá chhiu-he Song-chú kién-sién ke ngìn! Ngài-têu tông-chûng mò yit-ke ngìn lâu kì pí é-tet.” Chung-ngìn thai-sâng hêm: “Ngien vòng van-soi!”
[25] Sat-mû-ngí hiong chung-ngìn sot-mìn vòng ke chit-ngim lâu khièn-li, yu chiông liá-têu kûi-thin siá chhai sû-kién song, piong chhai Song-chú mien-chhièn, yèn-heu ham tak-sà chón vuk-hâ hi.
[26] Só-lò chhiu chón Kî-pí-â vuk-hâ hi; yû yit-khiùn pûn Song-ti kám-thung ke yúng-sṳ thèn Só-lò khiung-ha hi.
[27] Chúng-he yû-têu lù-màn-é kóng: “Liá-chúng kiok-sṳ kám yû phan-fap kiu ngài-têu?” Kì-têu khon m̀-hí Só-lò, ya mò sung lî-vu̍t pûn kì; Só-lò sa m̀-tap kì-têu.