[1] Song-chú ke yok-khui chhai Fî-li-sṳ thi-khî thìn-liù chhit-ke ngie̍t yî-heu,
[2] Fî-li-sṳ-ngìn chhiáng chi-sṳ̂ lâu puk-koa ke lòi, mun kì-têu: “Ngài-têu yin-kôi ngióng-pân lòi chhú-lî Song-chú ke yok-khui? Chṳ́-sṳ ngài-têu oi ngióng-pân chiông yok-khui sung-chón ngièn-lòi ke thi-fông.”
[3] Kì-têu en-kóng: “Na-he ngì-têu oi chiông Yî-set-lie̍t Song-ti ke yok-khui sung chón-hi, yin-tông hiong Kì hien su̍k-chhui ke lî-vu̍t phòi-chhui, cho-m̀-tet tân-tân chiông yok-khui sung chón-hi. Án-ngiòng, ngì-têu ke phiang chhiu voi tet-tó yî-chhṳ, chang voi tî cho-má-ke Song-ti yit-chhṳ̍t chit-fa̍t ngì-têu.”
[4] Fî-li-sṳ-ngìn mun: “Ngài-têu oi sung má-ke su̍k-chhui ke lî-vu̍t nè?” Kì-têu en-kóng: “Yung kîm-é cho ńg-chak lia̍p-é lâu ńg-chak ló-chhú. Tak-chak kîm lia̍p-é lâu kîm ló-chhú thoi-péu yit-ke Fî-li-sṳ liâng-chhiu, yîn-vi khiung-yong ke châi-nan fat-sên chhai ngì-têu lâu ngì-têu liâng-chhiu ke sṳ̂n-song.
[5] Ngì-têu yit-thin oi cho thu̍k lia̍p-é ke hìn-siong lâu fí-fái ngì-têu thièn-thi ló-chhú ke hìn-siong, hiong Yî-set-lie̍t ke Song-ti sṳ̀n-ngin ngì-têu ke chhui. Án-ngiòng, mò yit-thin Kì chhiu m̀-voi ki-siu̍k chit-fa̍t ngì-têu lâu ngì-têu ke sṳ̀n-mìn, hàn-yû ngì-têu ke thú-thi.
[6] Ngì-têu hò má sí-khú chhiong Âi-khi̍p-vòng lâu Âi-khi̍p-ngìn án ngang-kiáng? Kì-têu pûn Song-ti met-to mò-kat mò-sat, kám m̀-he koâi-koâi piong Yî-set-lie̍t-ngìn lì-khôi Âi-khi̍p?
[7] Só-yî, ngì-têu oi yi-phi yit-liòng sîn-chhâ lâu lióng-chak chhiùng-lòi màng-sṳt koa-ko ak yû-nen ke ngiù-mà, chiông ngiù-mà khiên-to chhâ-é thèu-chhièn, ngiù-ak koa chhai ngiù-mà ke kiáng-kîn, hàn-oi chiông kì-têu ke se ngiù-è kiuk-chón ngiù-làn.
[8] Oi chiông Song-chú ke yok-khui piong chhai chhâ-táng, sùn-thèu nang-ngoi piong yit-ke siông-é, tî-poi chông ke-têu kîm-é ke hìn-siong, chhiu-he ngì-têu su̍k-chhui ke lî-vu̍t, yèn-heu yù-chhai ngiù lâi-tén chhâ-é hàng.
[9] Ngì-têu oi chu-yi chhâ-é hàng ke fông-hiong: Na-he kì hiong Pak-Sṳ-ma̍k hàng, liá châi-fo chhiu-he Yî-set-lie̍t ke Song-ti kong-pûn ngài-têu ke; na-he mò hiong ke thi-fông hàng, ngài-têu chhiu tî Song-ti mò kong-châi, liá châi-fo he m̀ tú-hó tù-tó ke.”
[10] Fî-li-sṳ-ngìn cheu kì-têu kóng ke hi-cho. Kì-têu chiông lióng-chak yû-nen ke ngiù-mà lap chhai chhâ-é thèu-chhièn, chiông se ngiù-è koân chhai ngiù-làn tú,
[11] chiông Song-chú ke yok-khui piong chhai chhâ-táng, hàn-yû ke chông kîm ló-chhú lâu kîm lia̍p-é ke siông-é ya piong chhai chhâ-táng.
[12] Ngiù-mà chhai hiong Pak-Sṳ-ma̍k ke lu-song, m̀ phiên-chó ya m̀ phiên-yu chhṳ̍t-chhṳ̍t hi; kì-têu kín-hàng kín-kieu. Ńg-ke Fî-li-sṳ-ngìn ke liâng-chhiu thèn-tén kì-têu, chhṳ̍t-to Pak-Sṳ-ma̍k ke piên-kie.
[13] Pak-Sṳ-ma̍k ngìn-mìn chhai sân-lak kot ma̍k-é; kì-têu thèu-nà yit khià hí-lòi, khon-tó yok-khui, thai-kâ chhiu fî-sòng fôn-hí.
[14] Chhâ-é lòi-to Pak-Sṳ-ma̍k-ngìn Yok-sû-â ke thièn-tú, thìn chhai yit-te thai sa̍k-thèu sùn-thèu. Ngìn-mìn chiông chhâ-é phiak-thet, chiông lióng-chak ngiù-mà chhṳ̀-thet cho sêu-fa-chi hien-pûn Song-chú.
[15] Li-vi-ngìn chiông Song-chú ke yok-khui lâu chông kîm-é ke hìn-siong ke siông-é kông hâ-lòi, piong chhai thai sa̍k-thèu táng. Ke-ngit, Pak-Sṳ-ma̍k ngìn-mìn hiong Song-chú hien sêu-fa-chi lâu khì-thâ sên-ngì.
[16] Ńg-ke Fî-li-sṳ-ngìn ke liâng-chhiu khon-tó kì-têu só-cho ke sṳ, ke-ngit chhiu chón Yî-kiet-lùn hi lé.
[17] Fî-li-sṳ-ngìn hien ńg-chak kîm lia̍p-é pûn Song-chú cho su̍k-chhui ke lî-vu̍t: Yit-ke vi Â-sṳ̍t-thut, yit-ke vi Kâ-sat, yit-ke vi Â-sṳ̍t-kî-lùn, yit-ke vi Kâ-thi̍t, yit-ke vi Yî-kiet-lùn.
[18] Kì-têu ya hien kîm ló-chhú, tak-chak he vi kok Fî-li-sṳ liâng-chhiu kón-hot ke sàng-chṳ́n, pâu-hàm fòng-ví ke sàng-chṳ́n lâu mò vì-chhiòng ke chhûn-chông. Pak-Sṳ-ma̍k-ngìn Yok-sû-â thièn-tú ke-te thai sa̍k-thèu, chhiu-he kì-têu piong Song-chú yok-khui ke-te thai sa̍k-thèu, to liá-ha hàn liù chhai ke-vi, cho fat-sên liá-sṳ ke chṳn-kí.
[19] Song-chú chhṳ̀-thet chhit-sṳ̍p ke Pak-Sṳ-ma̍k-ngìn, yîn-vi kì-têu thêu-khon yok-khui ke tî-poi. Ngìn-mìn yîn-vi Song-chú chhai kì-têu tông-chûng chhṳ̀-thet án-tô ngìn chhiu chhin sông-sîm.
[20] Pak-Sṳ-ma̍k-ngìn kóng: “Chhai Song-chú liá-vi sṳ̀n-sṳn ke Song-ti mien-chhièn, má-ngìn khî tet-he̍t nè? Ngài-têu cho-tet chiông yok-khui sung to nai-vi hi, sṳ́ kì lì-khôi ngài-têu nè?”
[21] Kì-têu phai-ngìn hi tui Kî-lie̍t-Yâ-lìm-sàng ke ngìn kóng: “Fî-li-sṳ-ngìn chiông Song-chú ke yok-khui sung chón-lòi lé; chhiáng chiông yok-khui chiap-to ngì-têu ke-vi hi!”