[1] Ke-sṳ̀, Yî-set-lie̍t-ngìn chhut-hi oi lâu Fî-li-sṳ-ngìn siông-chhṳ̀. Yî-set-lie̍t-ngìn chhai Yî-phien-yî-chhia ôn-yàng; Fî-li-sṳ-ngìn chhai Â-fut ôn-yàng.
[2] Fî-li-sṳ-ngìn pài-chhṳn kûng-kit Yî-set-lie̍t-ngìn, tá to fî-sòng kit-lie̍t, chui-heu tá-yàng kì-têu, chhṳ̀-thet chhâ-m̀-tô si-chhiên Yî-set-lie̍t-ngìn.
[3] Sṳ-pîn chón-to yàng-tú ke sṳ̀, Yî-set-lie̍t ke-têu chóng-ló kóng: “Kîm-pû-ngit Song-chú cho-má-ke pûn Fî-li-sṳ-ngìn tá-yàng ngài-têu nè? Ngài-têu kiak-kiak to Sṳ-lò hi, chiông Song-chú ke yok-khui kông chhut-lòi! Án-ngiòng, Kì chhiu voi lâu ngài-têu khiung-ha hi, chiông ngài-têu tui thi̍t-ngìn ke sú-chûng kiu chhut-lòi.”
[4] Só-yî, kì-têu phai ngìn to Sṳ-lò hi, chiông chhô chhai lióng-ke kî-lu-pak chûng-kiên ke Song-chú — Van-kiûn Ngièn-soi ke yok-khui kông chhut-lòi. Yî-li ke lióng-ke lai-é Hò-fut-nì lâu Fî-nì-ha̍p thèn Song-ti ke yok-khui khiung-ha lòi.
[5] Song-chú ke yok-khui to kiûn-yàng ke sṳ̀, Yî-set-lie̍t-ngìn chhiu thai-sâng fôn-fû, lièn thi-nài tû voi chûn.
[6] Fî-li-sṳ-ngìn thâng-tó fôn-fû ke sâng, chhiu kóng: “Hî-pak-lòi yàng-tú cho-má-ke hêm-to án thai-sâng! He má-ke yi-sṳ nè?” Tông kì-têu fat-hien ke he Song-chú ke yok-khui to Hî-pak-lòi yàng-chûng,
[7] chhiu chhiòn-phu chho̍k-kiâng, kóng: “Yû sṳ̀n-mìn to kì-têu ke yàng-tú lòi lé! Ngài-têu chhám lé! Ngài-têu chhiùng-lòi m̀-sṳt tù-tó liá-chúng sṳ!
[8] Ngài-têu chhám lé! Má-ngìn nèn kiu ngài-têu lì-khôi ke-têu thai-nèn ke sṳ̀n-mìn nè? Chhai khóng-yâ yung kok-chúng châi-fo chhṳ̀-sí Âi-khi̍p-ngìn ke, chhiu-he ke-têu sṳ̀n-mìn â!
[9] Fî-li-sṳ-ngìn â, oi yúng-kám! Oi cho thai-chhong-fû chhut-hi siông-chhṳ̀! Na-mò, ngài-têu chhiu voi cho Hî-pak-lòi-ngìn ke nù-chhòi, chhiong kì-têu yî-chhièn cho ngài-têu ke nù-chhòi khiung-yong. Só-yî, ngài-têu oi cho thai-chhong-fû yúng-kám hi siông-chhṳ̀!”
[10] Fî-li-sṳ-ngìn piang-miang siông-chhṳ̀. Yî-set-lie̍t-ngìn yu sû-thet, tak-sà chéu-chón chhṳ-kâ ke vuk-hâ. Liá-pái sí-thet ke ngìn fî-sòng tô, Yî-set-lie̍t yû sâm-van kiûn-ngìn pûn-ngìn chhṳ̀-sí.
[11] Song-ti ke yok-khui pûn-ngìn chhióng-chéu; Yî-li ke lióng-ke lai-é Hò-fut-nì lâu Fî-nì-ha̍p ya pûn-ngìn chhṳ̀-sí.
[12] Ke-ngit, yû yit-ke Phien-ngâ-mén kî-chhu̍k ke ngìn tui chan-chhòng yit-chhṳ̍t chéu-to Sṳ-lò. Kì chhá-lan sâm, ve-fôi chhai thèu-nà táng, péu-sṳ pî-sông.
[13] Yî-li sîm-kôn-tú fî-sòng tâm-sîm Song-ti ke yok-khui, chhô chhai lu-sùn kín-khon. Ke-ngìn chhai sàng-tú chiông sêu-sit chhòn-khôi, tak-sà chhiòn-phu chho̍k-kiâng thai-kieu.
[14] Yî-li thâng-tó thai-kieu ke sâng, chhiu mun: “Cho-má-ke yû liá-ke thai-sâng?” Ke-ngìn ya chéu-to Yî-li thèu-chhièn po-ko sêu-sit.
[15] (Tông-sṳ̀ Yî-li yí-kîn kiú-sṳ̍p pat-se, chhâ-m̀-tô vàn-chhiòn khon m̀-tó.)
[16] Ke-ngìn tui Yî-li kóng: “Kîm-pû-ngit ngài tui chan-chhòng yit-chhṳ̍t thò-to liá-vi.” Yî-li mun kì: “Ngâ lai-é â, fat-sên má-ke sṳ-chhìn?”
[17] Ke-ngìn kóng: “Yî-set-lie̍t-ngìn tui Fî-li-sṳ-ngìn mien-chhièn thò-chéu; ngài-têu ke kiûn-chhui sû-to tông-chhám; nang-ngoi, ngì lióng-ke lai-é Hò-fut-nì lâu Fî-nì-ha̍p ya pûn-ngìn chhṳ̀-sí. Song-ti ke yok-khui me pûn-ngìn chhióng-chéu lé!”
[18] Ke-ngìn kóng-tó Song-ti yok-khui ke sṳ̀, Yî-li chhiu tui sàng-mùn sùn, kì ke chho-vi táng hiong heu-poi vang lo̍k-hi. Yî-li chhin-ló yu thai-khiêu, yit vang lo̍k-hi chhiu tiet-thôn kiáng-kîn sí-thet. Kì cho Yî-set-lie̍t ke sṳ-sṳ̂ chúng-khiung si-sṳ̍p ngièn.
[19] Yî-li ke sîm-khiû, Fî-nì-ha̍p ke pû-ngiòng, tú-hó yû sṳ̂n-hong, sán-khì voi to. Kì thâng-kóng Song-ti ke yok-khui pûn-ngìn chhióng-chéu, kiâ kâ-kôn lâu ló-kûng ya sí-thet, kì ke tú-sṳ́ chhiu thung-to mò-kat mò-sat, kiung-chhut se-ngìn-è.
[20] Kì thôn-hi yî-chhièn, chhai sùn-thèu cheu-ku kì ke fu-ngìn-kâ tui kì kóng: “M̀-sṳ́ kiâng! Ngì kiung-tó yit-ke lai-é lô!” Chúng-he kì m̀-tap ngìn, ya m̀ chhut-sâng.
[21] Kì lâu se-ngìn-è ôn-to Yî-kâ-pok, yu kié-sṳt kóng: “Song-ti ke yùng-kông lì-khôi Yî-set-lie̍t lé”, yi-sṳ he chṳ́ Song-ti ke yok-khui pûn-ngìn chhióng-chéu, kiâ kâ-kôn lâu ló-kûng ya sí-thet.
[22] Kì kóng: “Song-ti ke yùng-kông yí-kîn lì-khôi Yî-set-lie̍t, yîn-vi Song-ti ke yok-khui pûn-ngìn chhióng-chéu lé.”