[1] Sat-mû-ngí ngièn-ló ke sṳ̀, li̍p kiâ lai-é cho Yî-set-lie̍t ke sṳ-sṳ̂.
[2] Thai ke lai-é ôn-to Yok-ngí, se ke lai-é ôn-to Â-pí-â; kì-têu chhai Phe̍t-sṳ-pâ cho sṳ-sṳ̂.
[3] Kì-têu m̀ ho̍k â-pâ ke mù-fam, fán-chón thâm-oi chhièn-chhòi, pûn-ngìn sû-mâi, m̀ cheu kûng-tho ton sṳ-fî.
[4] Só-yî, Yî-set-lie̍t só-yû ke chóng-ló chhiòn-phu chhi-si̍p to Lâ-mâ hi-kien Sat-mû-ngí,
[5] tui kì kóng: “Ngì khon, ngì án-ló lé, ngì ke lai-é yu m̀ ho̍k ngì ke mù-fam. Só-yî, chhiáng vi ngài-têu li̍p yit-ke vòng, chhiong khì-thâ koet-kâ khiung-yong, yû vòng lòi chhṳ-lî ngài-têu.”
[6] Sat-mû-ngí tông mò fôn-hí kì-têu yêu-khiù li̍p-vòng ke sṳ, só-yî kì hi khiù-mun Song-chú.
[7] Song-chú tui Sat-mû-ngí kóng: “Cho ngì sun ngìn-mìn ke yi-sṳ! Kì-têu pin m̀-he fit-thet ngì, he fit-thet Ngài, mò-oi Ngài cho kì-têu ke vòng.
[8] Chhṳ-chhiùng Ngài thu kì-têu chhut Âi-khi̍p yî-lòi, kì-têu chhiu lì-khôi Ngài, hi-pai phe̍t ke sṳ̀n-mìn. Liá-ha kì-têu tui ngì só-cho ke, chhiu-he kì-têu yit-chhṳ̍t tui Ngài só-cho ke.
[9] Cho ngì sun kì-têu! Chúng-he ngì oi ngiàm-ngiàm kín-ko kì-têu, lâu kì-têu kóng chhîn-chhú, chiông-lòi kì-têu ke vòng voi ngióng-pân tui-thai kì-têu.”
[10] Sat-mû-ngí chiông Song-chú ke fa chhiòn-phu lâu ke-têu lòi hiong kì yêu-khiù li̍p-vòng ke ngìn-mìn kóng.
[11] Kì kóng: “Ngì-têu ke vòng voi án-ngiòng tui-thai ngì-têu: Kì voi ham ngì-têu ke lai-é cho-pîn, yû-têu cho chan-chhâ pîn, yû-têu cho khì-pîn, yû-têu cho siên-fûng chhui-yèn.
[12] Kì voi sat-li̍p ngìn cho kôn-chóng, yû-têu tai-pîn yit-chhiên sà, yû-têu tai-pîn ńg-sṳ̍p sà. Ngì-têu ke lai-é voi thoi kì kâng-thièn, thoi kì sû-kot, thoi kì chṳ-chho vú-hi lâu chan-chhâ ke chông-phi.
[13] Kì voi ham ngì-têu ke moi-é vi kì cho hiông-liau, chú-sṳ̍t, phoi-piáng.
[14] Kì voi chiông ngì-têu chui-hó ke thièn-thi, phù-thò-yèn, kám-lám-yèn su-pûn kì ke kôn-yèn.
[15] Kì voi chiông ngì-têu ke ńg-kuk lâu phù-thò ke sṳ̍p-fûn chṳ̂-yit su-pûn kì ke kiûng-thìn thai-sṳ̀n lâu khì-thâ kôn-yèn.
[16] Kì voi chiông ngì-têu ke phu̍k-ngìn, sṳ́-ńg, chui-hó ke thèu-sâng lâu lì tai-chéu, ham kì-têu thoi kì cho-kûng.
[17] Kì voi nâ-chéu ngì-têu yòng-khiùn ke sṳ̍p-fûn chṳ̂-yit, ngì-têu chhṳ-kâ ya voi cho kì ke nù-chhòi.
[18] To ke-sṳ̀, ngì-têu voi vi-tó chhṳ-kâ só yêu-khiù ke vòng ôi-khiù Song-chú, chúng-he Song-chú m̀-voi tap ngì-têu.”
[19] Ngìn-mìn m̀-thâng Sat-mû-ngí ke fa, fán-chón en-kóng: “M̀-sṳ́ ngì kón! Ngài-têu yit-thin oi yû vòng chhṳ-lî ngài-têu!
[20] Án-ngiòng ngài-têu chang voi chhiong phe̍t-koet ke ngìn-mìn yû chhṳ-kâ ke vòng chhṳ-lî ngài-têu, tai-liâng ngài-têu sông chan-chhòng siông-chhṳ̀.”
[21] Sat-mû-ngí thâng-tó kì-têu ke fa chhiu cheu án-ngiòng hiong Song-chú kóng.
[22] Song-chú tui Sat-mû-ngí kóng: “Cheu kì-têu só yêu-khiù ke, vi kì-têu li̍p yit-ke vòng!” Só-yî Sat-mû-ngí tui só-yû ke Yî-set-lie̍t-ngìn kóng: “Tak-sà chón chhṳ-kâ ke sàng hi!”