[1] Só-lò tui kì ke lai-é Yok-nâ-tân lâu só-yû ke kôn-yèn kóng, oi sat-fap chhù-thet Thai-ví; chúng-he Yok-nâ-tân tông-siak Thai-ví,
[2] chhiu hi lâu kì kóng: “Ngâ-pâ sióng-oi chhṳ̀ ngì. Thiên-kông-ngit tá-chó, ngì oi khong chhai pi-me̍t ke só-chhai, liù chhai ke-vi.
[3] Ngài voi to ngì khong ke thièn-tú, khî chhai ngâ-pâ sṳ̂n-piên lâu kì thàm-lun ngì ke sṳ. Ngài fat-hien má-ke chhìn-khóng, yit-thin voi lâu ngì kóng.”
[4] Yok-nâ-tân chhai kiâ-pâ Só-lò mien-chhièn chhṳ̂n-chan Thai-ví, yu kóng: “Chhiáng vòng m̀-hó sông-hoi vòng ke phu̍k-ngìn Thai-ví. Kì chhiùng-lòi m̀-sṳt cho tui-m̀-hí ngì ke sṳ; fán-chón kì só-cho ke chhiòn-phu tui ngì thai-yû hó-chhu.
[5] Kì mo sâng-miang ke ngùi-hiám hi chhṳ̀ ke Fî-li-sṳ-ngìn Kô-li-â; Song-chú sṳ́ chhiòn Yî-set-lie̍t thai-thai tá-yàng. Ke-sṳ̀ ngì khon-tó, chhiu tông fôn-hí, liá-ha cho-má-ke oi sông-hoi yit-ke vù-kû ke ngìn, vù-yèn vù-ku hi chhṳ̀ Thai-ví nè?”
[6] Só-lò thâng Yok-nâ-tân ke fa, chhiu chṳ́ Song-chú ke miàng fat-sṳ m̀ chhṳ̀ Thai-ví.
[7] Yok-nâ-tân ham Thai-ví lòi, chiông liá yit-chhiet ke fa chhiòn-phu lâu kì kóng, yèn-heu tai kì hi kien Só-lò. Só-yî Thai-ví chhiong yî-chhièn án-ngiòng fu̍k-sṳ vòng.
[8] Yî-set-lie̍t-ngìn lâu Fî-li-sṳ-ngìn yu-chai fat-sên chan-chên. Thai-ví kûng-kit Fî-li-sṳ-ngìn, thai-thai tá-yàng kì-têu, kì-têu chhiu chhiòn-phu thò-chéu.
[9] Yû yit-ngit, tui Song-chú ke-vi lòi ke sià-lìn yu chok-chhau Só-lò. Só-lò sú-hong nâ-tén chhiông, chhô chhai vuk-tú; Thai-ví ya chhai ke-vi thàn-khìm.
[10] Só-lò sióng-oi yung kì ke chhiông chiông Thai-ví chhiuk chhai piak-táng, chúng-he Thai-ví sám-khôi, chhiông chhiuk chhai piak-táng. Thai-ví chhiu thò-chéu, lì-khôi ke-vi.
[11] Ke am-pû, Só-lò phai-ngìn hi kam-sṳ Thai-ví ke vuk-hâ, oi chhai thi-ngi chêu-sṳ̀n chhṳ̀ kì. Thai-ví ke pû-ngiòng Mí-kap kín-ko Thai-ví kóng: “Ngì kîm-am-pû na m̀-chéu, thiên-kông-ngit ngì yit-thin voi sí.”
[12] Só-yî Mí-kap tui chhûng-mùn chiông Thai-ví chhui hâ-hi, pûn kì thò-chéu.
[13] Mí-kap chiông yit-chûn vuk-hâ ke sṳ̀n-siong piong chhai mìn-chhòng táng, yung yit-chak sân-yòng-mô chṳ́m-thèu pûn sṳ̀n-siong thiap thèu-nà, yung phî koi-tén.
[14] Só-lò ke ngìn lòi chok Thai-ví ke sṳ̀, Mí-kap lâu kì-têu kóng Thai-ví pot phiang-é.
[15] Chúng-he Só-lò oi kì-têu chai hi khon Thai-ví. Só-lò yu fûn-fu: “Chiông kì lièn-ngìn tai mìn-chhòng khiung-ha kông chón-lòi, ngài oi chhṳ̀ kì.”
[16] Kì-têu ngi̍p-to vuk-tú, fat-hien soi chhai mìn-chhòng táng ke he yit-chûn vuk-hâ ke sṳ̀n-siong, thèu-nà thiap-tén yit-chak sân-yòng-mô ke chṳ́m-thèu.
[17] Só-lò mun Mí-kap: “Ngì ngióng-pân án-ngiòng phien ngài, piong ngài ke thi̍t-ngìn thò-chéu?” Mí-kap en-kóng: “Kì kóng ngài m̀ piong kì chéu, kì chhiu oi chhṳ̀ ngài.”
[18] Thai-ví thò-to Lâ-mâ hi kien Sat-mû-ngí, chiông Só-lò tui kì cho ke sṳ chhiòn-phu lâu Sat-mû-ngí kóng. Yèn-heu, kì lâu Sat-mû-ngí khiung-ha to Nâ-yok hi, he̍t chhai ke-vi.
[19] Yû-ngìn lâu Só-lò kóng, Thai-ví chhai Lâ-mâ ke Nâ-yok,
[20] Só-lò chhiu phai-ngìn hi-chok Thai-ví. Kì-têu khon-tó yit-khiùn siên-tî su-kám ngi̍p-sṳ̀n mong-hìn kóng-fa, Sat-mû-ngí khî chhai kì-têu tông-chûng tai-thèu. Song-ti ke Lìn ya lìm-to Só-lò phai-hi ke ngìn, kì-têu chhiu su-kám ngi̍p-sṳ̀n mong-hìn kóng-fa.
[21] Só-lò thâng-tó liá-ke sêu-sit, chhiu phai ko-kha tô ngìn hi; liá-têu ngìn ya lâu siên-chhièn hi ke ngìn khiung-yong su-kám ngi̍p-sṳ̀n mong-hìn kóng-fa. Só-lò thi-sâm pái phai-ngìn hi, khiung-yong ke sṳ yu fat-sên.
[22] Chui-mî Só-lò chhîn-sṳ̂n to Lâ-mâ hi. Tông kì lòi-to Sî-kû ke-héu thai-chiáng sùn ke sṳ̀, kì tá-tham Sat-mû-ngí lâu Thai-ví chhai má-ke só-chhai. Yû-ngìn lâu kì kóng, kì-têu chhai Lâ-mâ ke Nâ-yok.
[23] Só-lò oi hi ke-vi ke sṳ̀, Song-ti ke Lìn ya lìm-to kì, kì chhiu su-kám ngi̍p-sṳ̀n mong-hìn kín-hàng kín kóng-fa, chhṳ̍t-to Nâ-yok.
[24] Kì chhai Sat-mû-ngí mien-chhièn thot-thet chhṳ-kâ ke sâm-fu, su-kám ngi̍p-sṳ̀n mong-hìn kóng-fa, yit-ngit yit-ya mò chok sâm-fu vang-tén. Só-yî yû yit-ki siu̍k-ngî kóng: “Só-lò kám ya sàng-cho siên-tî mâ?”