[1] Â-mùn-ngìn ke vòng Nâ-hot kûng-tá Kî-lie̍t thi-khî ke Ngâ-pí-sàng; kì ke kiûn-chhui pâu-vì chhiòn sàng. Ngâ-pí-ngìn chhiòn-phu tui Nâ-hot kóng: “Ngì lâu ngài-têu li̍p-yok, ngài-têu chhiu fu̍k-sṳ ngì.”
[2] Â-mùn-ngìn Nâ-hot kóng: “Oi ngài lâu ngì-têu li̍p-yok? Cho-tet! Yû yit-ke thiàu-khien: Ngài oi chiông ngì-têu tak-sà ngìn ke yu-ngién yet chhut-lòi, yung án-ngiòng lòi vú-yu̍k só-yû ke Yî-set-lie̍t-ngìn.”
[3] Ngâ-pí ke-têu chóng-ló tui kì kóng: “Chhiáng khôn-yùng ngài-têu chhit-ngit, pûn ngài-têu phai sṳ́-chá to Yî-set-lie̍t kok thi-khî hi. Na-he mò-ngìn pông-chhu ngài-têu, ngài-têu chhiu hiong ngì thèu-hòng.”
[4] Sṳ́-chá to Só-lò he̍t ke Kî-pí-â, chiông sêu-sit chhòn chhut-hi. Ngìn-mìn chhiòn-phu chhie̍t-mong to thai-sâng kieu hí-lòi.
[5] Ke-sṳ̀, Só-lò chang tui thièn-tú kiuk-ngiù chón-lòi. Kì mun: “Thai-kâ kieu má-ke?” Kì-têu chhiu chiông Ngâ-pí-ngìn chhòn-lòi ke sêu-sit lâu kì kóng.
[6] Só-lò thâng-tó liá sêu-sit, pûn Song-ti ke Lìn thai-thai kám-thung, chhiu tông fat-khién.
[7] Kì khiên-chhut lióng-chak ngiù, chiông ngiù to̍k-cho se-se te, min-lin sṳ́-chá tai liá-têu se-te ngiuk to Yî-set-lie̍t kok thi-khî hi, kín-ko ngìn-mìn kóng: “Má-ngìn m̀ thèn Só-lò lâu Sat-mû-ngí hi siông-chhṳ̀, má-ngìn ke ngiù chhiu-oi to̍k-cho án-ngiòng!” Song-chú sṳ́ Yî-set-lie̍t-ngìn tông chho̍k-kiâng; só-yû ke ngìn chhiu thùng-sîm ha̍p-yi chhut-lòi chok-chan.
[8] Só-lò ham kì-têu chhai Pí-set si̍p-ha̍p. Yû sâm-sṳ̍p van ngìn tui Yî-set-lie̍t lòi, sâm-van ngìn tui Yù-thai lòi.
[9] Kì-têu tui Ngâ-pí lòi ke sṳ́-chá kóng: “Chón-hi Kî-lie̍t thi-khî lâu ngì-têu Ngâ-pí-ngìn kóng, thiên-kông-ngit tông-chu yî-chhièn, kì-têu voi tet-tó kié-kiu.” Ngâ-pí ngìn-mìn thâng-tó liá sêu-sit fî-sòng fôn-hí,
[10] chhiu tui Nâ-hot kóng: “Thiên-kông-ngit ngài-têu thèu-hòng, yù-chhai ngì-têu ngióng-pân tui-thai ngài-têu.”
[11] Thi-ngi chêu-sṳ̀n, Só-lò chiông kì ke kiûn-chhui fûn-cho sâm-chhui; thiên yit-kông, chhiu ngi̍p-to Â-mùn-ngìn ke yàng-tú kûng-kit kì-têu, chhṳ̍t-to tông-chu, chhṳ̀-thet chhin-tô ngìn; hàn-sâng ke sṳ-pîn chhiòn-phu si-san, sùi-ngìn thò-miang.
[12] Yî-set-lie̍t-ngìn tui Sat-mû-ngí kóng: “Má-ngìn kóng Só-lò mò chṳ̂-kiet cho ngài-têu ke vòng? Chiông ke-têu ngìn kâu chhut-lòi, ngài-têu oi chhṳ̀-thet kì-têu!”
[13] Chúng-he Só-lò kóng: “Kîm-pû-ngit cho-m̀-tet chhṳ̀ ngìn, yîn-vi kîm-pû-ngit Song-chú kiu-liáu Yî-set-lie̍t.”
[14] Sat-mû-ngí tui ngìn-mìn kóng: “Ngài-têu chhiòn-phu lòi-hi Kit-kap, chhai ke-vi chhùng-sîn li̍p Só-lò cho ngài-têu ke vòng.”
[15] Só-yî kì-têu chhiòn-phu hi-to Kit-kap, chhai Song-chú mien-chhièn li̍p Só-lò cho vòng, yu chhai Song-chú mien-chhièn hien phìn-ôn-chi. Só-lò lâu só-yû ke Yî-set-lie̍t-ngìn thai-thai khin-chuk liá-khien sṳ.