[1] Song-chú tui Sat-mû-ngí kóng: “Ngì hàn oi vi Só-lò pî-sông to kí-sṳ̀? Ngài yí-kîn vok-thet kì, mò oi kì cho Yî-set-lie̍t ke vòng. Ngì oi chiông kám-lám-yù chông-mân kok, tai to Pak-li-hèn-ngìn Yâ-sî ke-vi, yîn-vi Ngài yí-kîn sién kì yit-ke lai-é cho vòng.”
[2] Sat-mû-ngí kóng: “Ngài ngióng cho-tet án-ngiòng cho nè? Na-he Só-lò tî-tó, yit-thin voi chhṳ̀ ngài!” Song-chú kóng: “Ngì tai yit-chak se-ngiù-è hi, chhiu kóng ngì he hi ke-vi hiong Song-chú hien-chi ke.
[3] Ngì oi chhiáng Yâ-sî lòi chhâm-kâ hien-chi tién-lî; ke-sṳ̀, Ngài voi lâu ngì kóng oi ngióng-pân cho. Ngài chṳ́-sṳ ngì má-ngìn, ngì chhiu kò-yù li̍p kì cho vòng.”
[4] Sat-mû-ngí chûn-cheu Song-chú ke fa hi-cho. Kì hi to Pak-li-hèn, sàng-tú ke-têu chóng-ló kiâng lu̍k-lu̍k-é, mun kóng: “Ngì ke fóng-mun he tai phìn-ôn lòi mò?”
[5] Sat-mû-ngí en-kóng: “Ngài voi tai-lòi phìn-ôn. Ngài he lòi hiong Song-chú hien-chi ke. Ngì-têu oi sé-chhiang chhṳ-kâ, yèn-heu thèn ngài lòi.” Sat-mû-ngí ya ham Yâ-sî lâu kì ke-têu lai-é sé-chhiang chhṳ-kâ, chhièn-lòi chhâm-kâ chi-lî.
[6] Kì-têu to ke sṳ̀, Sat-mû-ngí khon-tó Yâ-sî ke lai-é Yî-li-ap, sîm-tú sióng: “Khî chhai Song-chú mien-chhièn liá-sà ngìn yit-thin he Kì oi kò-yù sat-li̍p ke.”
[7] Chúng-he Song-chú tui Sat-mû-ngí kóng: “M̀-hó khon kì ke ngoi-péu ya-he khon kì án kô-thai. Ngài mò sién kì, yîn-vi Ngài khon ngìn mò-chhiong sṳ-kiên ngìn án-ngiòng. Ngìn he khon ngoi-péu, Song-chú he khon nui-sîm.”
[8] Yèn-heu, Yâ-sî ham kiâ lai-é Â-pí-nâ-tha̍t tui Sat-mû-ngí mien-chhièn hàng ko-hi. Chúng-he Sat-mû-ngí kóng: “Song-chú me mò sién liá-sà.”
[9] Yâ-sî yu ham Sâ-mâ tui Sat-mû-ngí mien-chhièn hàng ko-hi; Sat-mû-ngí yu kóng: “Song-chú me mò sién liá-sà.”
[10] Án-ngiòng, Yâ-sî ham kì chhit-ke lai-é chhiòn-phu kîn-ko Sat-mû-ngí mien-chhièn. Sat-mû-ngí tui kì kóng: “Song-chú mò sién kì-têu tông-chûng ke yit-sà.”
[11] Só-yî Sat-mû-ngí mun Yâ-sî: “Ngì hàn-yû khì-thâ ke lai-é mò?” Yâ-sî kóng: “Hàn-yû yit-ke mân-chṳ́; kì chhai yâ-ngoi chóng-yòng.” Sat-mû-ngí kóng: “Ham kì to liá-vi lòi. Kì m̀ lòi, ngài-têu chhiu m̀ hien-chi.”
[12] Só-yî Yâ-sî phai-ngìn hi ham kì lòi. Kì he yit-ke mien-set fùng-yun, sûng-muk yû sṳ̀n, ngoi-péu sṳ̂-vùn ke chhiâng-ngièn. Song-chú tui Sat-mû-ngí kóng: “Chhiu-he liá-sà! Hi lâu kì kò-yù!”
[13] Sat-mû-ngí chiông kám-lám-yù nâ chhut-lòi, chhai Thai-ví ke-têu â-kô mien-chhièn kò kì. Song-chú ke Lìn khiòng-lie̍t lìm-to Thai-ví, tui ke-ngit hí lâu kì khiung-ha. Yèn-heu Sat-mû-ngí chhiu chón Lâ-mâ hi lé.
[14] Song-chú ke Lìn lì-khôi Só-lò; yû sià-lìn tui Song-chú lòi châu-tha̍p kì.
[15] Só-lò ke kôn-yèn tui kì kóng: “Ngài-têu tî yû sià-lìn tui Song-ti lòi châu-tha̍p ngì.
[16] Só-yî chhiáng ha-lin phu̍k-ngìn hi chhìm yit-ke chhin voi thàn-khìm ke ngìn lòi. Sià-lìn tui Song-ti lòi-to ngì sṳ̂n-song ke sṳ̀, ke-ngìn yit thàn-khìm, ngì chhiu voi hó.”
[17] Só-lò chhiu min-lin kì-têu: “Hi lâu ngài chhìm yit-ke chhin voi thàn-khìm ke ngìn lòi!”
[18] Só-lò yit-ke phu-ha en-kóng: “Pak-li-hèn-sàng ke Yâ-sî yû yit-ke lai-é; kì chhin voi thàn-khìm. Kì he tông yúng-kám ke chan-sṳ, ngìn chhin sṳ̂-vùn, yu yû khiéu-chhòi; Song-chú lâu kì khiung-ha.”
[19] Só-yî, Só-lò phai sṳ́-chá to Yâ-sî ke-vi, kóng: “Ham ngì ke chóng-yòng ke lai-é Thai-ví to ngài liá-vi lòi.”
[20] Yâ-sî chhiu yung lì-è chai piáng-è, yit phì-thoi ke chiú lâu yit-chak se sân-yòng, kâu-pûn kiâ lai-é Thai-ví sung-pûn Só-lò.
[21] Thai-ví to Só-lò ke-vi, fu̍k-sṳ kì. Só-lò tông siak Thai-ví, sién kì cho nâ vú-hi ke sṳ-ví.
[22] Só-lò phai-ngìn chhòn-fa pûn Yâ-sî: “Ngài tông chung-yi Thai-ví; chhiáng pûn kì liù chhai liá-vi fu̍k-sṳ ngài!”
[23] Tui ke-sṳ̀ hí, tak-pái yû sià-lìn tui Song-ti lòi-to Só-lò sṳ̂n-song ke sṳ̀, Thai-ví chhiu nâ kì ke khìm lòi-thàn, sià-lìn ngiàm-sṳ̀ lì-khôi Só-lò, Só-lò chhiu kám-kok chhin sóng-khoai.