[1] Thai-ví tui Kâ-thi̍t-sàng thò-to vá-khiun Â-thu-làn-sàng ke yit-ke sân-lùng. Kì ke hiûng-thi lâu kâ-chhu̍k thâng-kóng kì chhai ke-vi, chhiòn-phu hi khon kì.
[2] Só-yû pûn-ngìn khî-fu ke, khiam-chai ke, lâu put-mân hien-khóng ke ngìn chhiòn-phu si̍p-ha̍p to kì ke-vi hi; ngìn-su yok-yû si-pak sà. Thai-ví chhiu cho kì-têu ke liâng-chhiu.
[3] Thai-ví tui ke-vi hi Mô-ap ke Mí-sṳ̂-pâ, tui Mô-ap-vòng kóng: “Khiù ngì chún ngài ke yà-ôi he̍t chhai ngì liá-vi, tén-to ngài tî Song-ti ngióng-pân vi ngài ôn-phài chang lòi cho tá-son.”
[4] Án-ngiòng, Thai-ví chiông yà-ôi tap Mô-ap-vòng. Kì khong chhai sân-chai tú ke-chham khì-kiên, kì ke yà-ôi yit-chhṳ̍t he̍t chhai ke-vi.
[5] Heu-lòi, siên-tî Kâ-tet lòi tui Thai-ví kóng: “M̀-hó chai thìn-liù chhai liá sân-chai tú; kón-kín to Yù-thai hi.” Só-yî Thai-ví lì-khôi ke-vi, hi Ha̍p-lie̍t ke su-lìm.
[6] Yû yit-ngit, Só-lò chhai Kî-pí-â, chhô chhai sân-kia táng yit-thèu liû-su hâ, sú-hong nâ-tén chhiông. Kì só-yû ke kôn-yèn khî chhai kì sṳ̂n-piên. Só-lò thâng-kóng, yû ngìn fat-hien Thai-ví lâu kì sú-hâ khong ke só-chhai.
[7] Só-lò chhiu tui kôn-yèn kóng: “Phien-ngâ-mén-ngìn nâ, oi thâng ngài ke fa! Ngì-têu láu-tó Yâ-sî ke lai-é voi chiông thièn-thi lâu phù-thò-yèn pûn ngì-têu, voi sat-li̍p ngì-têu chhai kiûn-chhui tú cho kiûn-kôn mâ?
[8] Ngì-têu yîm-mèu oi tui-khong ngài he-mò? Ngài chhṳ-kâ ke lai-é lâu Yâ-sî ke lai-é kiet-mèn, ngì-têu ngióng mò lâu ngài po-ko. Mò ngìn koân-sîm ngài; ya mò ngìn lâu ngài kóng ngài ke phu-ha Thai-ví kîm-pû-ngit chhìm kî-fi oi chhṳ̀ ngài, ngài ke lai-é hàn sô-súng kì!”
[9] Yî-tûng-ngìn Tô-yit lâu Só-lò khì-thâ ke kôn-yèn khî khiung-ha; kì en-kóng: “Yâ-sî ke lai-é Thai-ví to Nò-pak sàng, to Â-hî-thut ke lai-é Â-hî-mí-le̍t ke-vi ke sṳ̀, ngài yû khon-tó kì.
[10] Â-hî-mí-le̍t vi Thai-ví khiù-mun Song-chú, yèn-heu chiông liòng-sṳ̍t lâu Fî-li-sṳ-ngìn Kô-li-â ke-kî tô kâu-pûn kì.”
[11] Só-yî, Só-lò-vòng phai-ngìn hi ham chi-sṳ̂ Â-hî-thut ke lai-é Â-hî-mí-le̍t lâu kì ke kâ-chhu̍k, chhiu-he só-yû chhai Nò-pak cho chi-sṳ̂ ke ngìn; kì-têu chhiòn-phu chhiu lòi kien vòng.
[12] Só-lò tui Â-hî-mí-le̍t kóng: “Â-hî-thut ke lai-é, thâng-hó!” Â-hî-mí-le̍t en-kóng: “Koet-vòng, chhiáng fûn-fu!”
[13] Só-lò tui kì kóng: “Ngì cho-má-ke lâu Yâ-sî ke lai-é mèu-hoi ngài? Cho-má-ke pûn kì liòng-sṳ̍t lâu tô-é, yu vi kì khiù-mun Song-ti? Kì liá-ha phoi-ngia̍k ngài, kîm-pû-ngit chhìm kî-fi oi chhṳ̀ ngài!”
[14] Â-hî-mí-le̍t en vòng kóng: “Thai-ví he koet-vòng chui chûng-sîm ke kôn-yèn, he koet-vòng ke se-lòng, koet-vòng ke sṳ-ví-chóng, yu he kiûng-thìn tú chui su kin-chhung ke ngìn.
[15] Ngài khok-sṳ̍t vi kì khiù-mun ko Song-ti, liá me m̀-he thi-yit pái! Chhiáng koet-vòng m̀-hó chiông chhui kûi-pûn ngài lâu ngài ke kâ-chhu̍k, yîn-vi ngiâ phu̍k-ngìn vàn-chhiòn m̀-tî liá-khien sṳ!”
[16] Vòng kóng: “Â-hî-mí-le̍t, ngì lâu ngì kâ-chhu̍k só-yû ke ngìn chhiòn-phu kôi-sí!”
[17] Yèn-heu vòng tui khî chhai sṳ̂n-piên ke sṳ-ví kóng: “Hi chhṳ̀ Song-chú ke chi-sṳ̂! Kì-têu lâu Thai-ví thùng-mèu, yu tî Thai-ví thò-to liá-vi lòi, me mò hiong ngài po-ko.” Chúng-he vòng ke sṳ-ví m̀-kám chhut-sú chhṳ̀ Song-chú ke chi-sṳ̂.
[18] Só-yî vòng fûn-fu Tô-yit kóng: “Hi chhṳ̀ ke-têu chi-sṳ̂!” Yî-tûng-ngìn Tô-yit chhiu chiông kì-têu chhiòn-phu chhṳ̀-thet. Ke-ngit, Tô-yit chhîn-sú chhṳ̀-thet pat-sṳ̍p ńg-ke yû chṳ̂-kiet chok yî-fut-tet ke chi-sṳ̂.
[19] Kì yu chiông he̍t chhai Nò-pak — chi-sṳ̂ sàng ke khì-thâ ngìn-mìn chhiòn-phu chhú-sí, mò-lun nàm-ńg, se-ngìn-è ya-he ô-nga-é, pin ngiù, yòng, lì-è chhiòn-phu chhṳ̀-thet.
[20] Chúng-he, Â-hî-mí-le̍t ke yit-ke lai-é Â-pí-â-thâ thò-hi thèu-kho Thai-ví.
[21] Â-pí-â-thâ lâu Thai-ví kóng, Só-lò ngióng-pân chhṳ̀-thet ke-têu Song-chú ke chi-sṳ̂.
[22] Thai-ví tui Â-pí-â-thâ kóng: “Ngài ke-ngit khon-tó Yî-tûng-ngìn Tô-yit chhai ke-vi, chhiu tî kì yit-thin voi hi hiong Só-lò po-ko. Ngì kâ-chhu̍k ke sí, ngài tui tak-sà chhiòn-phu yû chit-ngim.
[23] Chhiáng ngì liù chhai ngài liá-vi, m̀-sṳ́ kiâng. Só-lò sióng-oi chhṳ̀ ên lióng-sà, chúng-he ngì liù chhai ngài liá-vi voi ôn-chhiòn.”