[1] Só-lò kiuk Fî-li-sṳ-ngìn, chón-lòi thâng-tó Thai-ví chhai Yún-Kî-tí ke khóng-yâ,
[2] chhiu tai-liâng Yî-set-lie̍t chui chîn-liòng ke kiûn-chhui sâm-chhiên miàng, to “Yâ-sân-yòng ke Ngàm-sa̍k” sêu-chhà Thai-ví lâu kì ke phu-ha.
[3] Só-lò lòi-to lu-sùn yòng-làn fu-khiun ke yit-ke sân-lùng, ngi̍p tî-poi hi ô-sṳ́, tú-hó Thai-ví lâu thèn kì ke ngìn khong chhai liá sân-lùng chui tî-poi.
[4] Thai-ví ke phu-ha tui kì kóng: “Ngì ke kî-fi to lé! Song-chú lâu ngì kóng-ko, Kì oi chiông ngì ke thi̍t-ngìn kâu chhai ngì sú-chûng, ngì cho-tet cheu chhṳ-kâ ke yi-sṳ chhú-lî kì.” Thai-ví tiâm-tiâm-é phà ko-hi, kot-hâ Só-lò ngoi-sâm ke yit-kok.
[5] Heu-lòi Thai-ví vi-tó só-cho ke sṳ sîm-tú mò phìn-ôn,
[6] chhiu tui phu-ha kóng: “Ngien Song-chú chú-tóng ngài cho-chhut sông-hoi ngài chú-ngìn ke sṳ; kì he Song-chú kò-yù li̍p ke kiûn-vòng! Ngài chhie̍t-tui cho-m̀-tet sông-hoi kì; yîn-vi kì he vòng, he Song-chú kò-yù sat-li̍p ke.”
[7] Thai-ví chhin khien kì ke phu-ha, m̀ chún kì-têu sông-hoi Só-lò. Só-lò hong hí-lòi, hàng-chhut sân-lùng, cho kì lì-khôi;
[8] Thai-ví chhut-lòi thèn chhai kì heu-poi, thai-sâng hêm: “Ngài ke chú-ngìn! Ngài ke vòng!” Só-lò chón-ko sṳ̂n lòi khon, Thai-ví chhiu phu̍k chhai thi-song pai kì, kóng:
[9] “Ngìn kóng ngài sióng-oi sông-hoi ngì, koet-vòng cho-má-ke siông-sin nè?
[10] Chhiáng ngì chhṳ-kâ khon, kîm-pû-ngit chhai sân-lùng tú, Song-chú chiông ngì kâu chhai ngài sú-chûng. Ngài ke phu-ha yû-ngìn ham ngài chhṳ̀ ngì, chúng-he ngài thung-siak ngì; ngài kóng, ngài chhie̍t-tui m̀ sông-hoi ngài ke chú-ngìn, yîn-vi ngì he Song-chú kò-yù sat-li̍p ke vòng.
[11] Ngâ-pâ, chhiáng khon! Ngài sú-chûng kha̍k-tén ngì ngoi-sâm ke yit-kok! Ngài oi chhṳ̀ ngì chhin kién-tân, chúng-he ngài chṳ́-yû kot-hâ liá-te sâm-kok. Án-ngiòng ngì yin-kôi siông-sin, ngài mò phoi-ngia̍k ya-he sông-hoi ngì ke sióng-fap. Sûi-yèn ngài mò cho má-ke tui-m̀-hí ngì ke sṳ, ngì hàn-he tak só-chhai chhìm ngài, oi chhṳ̀ ngài.
[12] Ngien Song-chú phan-ton ngì lâu ngài chûng-kiên ke sṳ-fî. Ngien Song-chú thoi ngài sṳ̂n-yên, yîn-vi ngài m̀-voi sông-hoi ngì.
[13] Kú-ngìn yû siu̍k-ngî kóng: ‘Fái-ngìn chang voi cho fái-sṳ.’ Só-yî ngài chhie̍t-tui m̀-voi sông-hoi ngì.
[14] Yî-set-lie̍t-vòng chhut-lòi oi chhṳ̀ má-sà! Ngì oi kiuk má-ngìn! He yit-thiàu sí-kiéu, yit-chak thiau-cháu thin-thin!
[15] Song-chú voi sṳ́m-phan, voi phan-ton ngì lâu ngài chûng-kiên ke sṳ-fî. Ngien Kì kam-chhat ngài, vi ngài sṳ̂n-yên, kiu ngài thot-lì ngì ke sú.”
[16] Thai-ví kóng-so̍t, Só-lò kóng: “Ngài ke lai-é Thai-ví, kám ton-chṳ̂n he ngì?” Chiap-tén, Só-lò chhiu khôi-sâng thai-kieu,
[17] tui Thai-ví kóng: “Ngì chang chho̍k, ngài m̀-chho̍k lé. Ngài án-ngiòng yung yen-hen tui-thai ngì, ngì hàn-he yung san-liòng khoán-thai ngài.
[18] Kîm-pû-ngit, ngì yí-kîn péu-hien ngì he ngióng-pân san-liòng; yîn-vi Song-chú sûi-yèn chiông ngài kâu chhai ngì sú-chûng, chúng-he ngì mò chhṳ̀ ngài.
[19] Ngìn na-he chok-tó thi̍t-ngìn, ngióng-voi piong kì phìn-ôn mò-sṳ chéu? Ngien Song-chú yîn-vi ngì kîm-pû-ngit tui ngài só-cho ke su-fuk pûn ngì!
[20] Liá-ha ngài tî ngì yit-thin voi cho Yî-set-lie̍t ke vòng, koet-kâ ya voi pûn ngì thúng-chhṳ.
[21] Liá-ha, ngì oi chṳ́ Song-chú hiong ngài fat-sṳ, ngì m̀-voi chién-chhù ngài ke heu-thoi, m̀-voi chiông ngài ke miàng tui kâ-chhu̍k chûng chhù-thet.”
[22] Thai-ví chhiu hiong Só-lò fat-sṳ. Sṳ-heu, Só-lò chón vuk-hâ hi; Thai-ví lâu kì ke phu-ha yu chón-to kì-têu khong ke sân-chai hi.