[1] Sat-mû-ngí sí-thet; só-yû ke Yî-set-lie̍t-ngìn chhi-si̍p vi kì ôi-sông, yèn-heu chiông kì chong chhai kì ke ku-hiông Lâ-mâ. Liá-sṳ yî-heu, Thai-ví hâ-hi Pâ-làn ke khóng-yâ.
[2] Yû yit-ke Kâ-le̍t chûng-chhu̍k ke ngìn, ôn-to Nâ-pa, he tui Mâ-yùn-sàng lòi ke. Kì chhai Kâ-me̍t-sàng cho sên-lî, he yit-ke yû-chhièn ngìn, kì yû sâm-chhiên chak mièn-yòng lâu yit-chhiên chak sân-yòng. Kì ke pû-ngiòng ôn-to Oi-pí-kâi, he yit-ke chhin-chiâng yu hièn-fi ke fu-ngìn-kâ; chúng-he Nâ-pa he yit-ke tông-fái yu lû-fû ke ngìn.
[4] Thai-ví chhai khóng-yâ thâng-tó Nâ-pa tú-hó chhai Kâ-me̍t chién yòng-mô,
[5] chhiu phai sṳ̍p-ke heu-sâng ngìn to Kâ-me̍t chhìm Nâ-pa, hiong kì mun-ôn.
[6] Thai-ví ham kì-têu thoi kì hiong Nâ-pa chhiáng-ôn kóng: “Ngien ngì chhòng-su! Chhiòn-kâ khien-không! Só-yû su̍k ngì ke ya phìn-ôn sun-li!
[7] Ngài thâng-kóng ngì chhai liá-vi chién yòng-mô; ngì ke mu̍k-ngìn yit-chhṳ̍t lâu ngài-têu khiung-ha, ngài-têu mò khî-fu kì-têu, kì-têu chhai Kâ-me̍t ke sṳ̀, mò tiet-thet má-ke tûng-sî.
[8] Ngì mun kì-têu, kì-têu voi lâu ngì kóng. Chhai liá ko-chiet ke sṳ̀ ngài-têu to ngì liá-vi lòi, só-yî pai-thok ngì hó-hó khoán-thai ngài ke phu̍k-ngìn. Khon cho-tet nâ-têu tûng-sî pûn kì-têu mò? Ya pûn-têu ngài — ngì chhîn-oi ke phèn-yû Thai-ví.”
[9] Thai-ví ke phu-ha lòi-to, thì Thai-ví ke miàng lâu Nâ-pa kóng liá-têu hó-fa, tén kì fì-tap.
[10] Nâ-pa en-kóng: “Thai-ví he má-ngìn? Yâ-sî ke lai-é he má-ngìn? Chui-khiun yû tông-tô nùng-chhòi phoi-ngia̍k kì-têu ke chú-ngìn thò-to liá-vi lòi,
[11] ngài mò-oi sùi-phien chiông ngài ke piáng, súi lâu vi ngài chién yòng-mô ke ngìn yi-phi ke ngiuk, pûn ke-têu ngài m̀-tî tui nai-vi lòi ke ngìn!”
[12] Thai-ví ke phu-ha to-chón hi, chiông Nâ-pa só-kóng ke fa hiong Thai-ví po-ko.
[13] Thai-ví chhiu ha-lin: “Tai-tén tô-é!” Kì-têu chhiu cheu án-ngiòng cho. Thai-ví chhṳ-kâ ya tai-tén tô-é, thu si-pak ke phu-ha chhut-fat, liù-hâ lióng-pak sà khon-sú pú-kip-phín.
[14] Nâ-pa ke yit-ke phu̍k-ngìn tui Nâ-pa ke pû-ngiòng Oi-pí-kâi kóng: “Thai-ví phai-ngìn tui khóng-yâ lòi hiong ngài-têu ke chú-ngìn chhiáng-ôn, chúng-he ngài-têu ke chú-ngìn vú-yu̍k kì-têu.
[15] Kì-têu sṳ̍t-chhai tui ngài-têu tông-hó, chhiùng-lòi m̀-sṳt khî-fu ngài-têu. Ngài-têu lâu kì-têu khiung-ha chhai khóng-yâ ke sṳ̀, ngài-têu ya m̀-sṳt tiet-thet má-ke tûng-sî.
[16] Ngài-têu chóng yòng-è ke sṳ̀, chhiòn-phu lâu kì-têu khiung-ha, kì-têu ngit-ya pó-fu ngài-têu.
[17] Chhiáng ngì sióng khon-é ngì yin-kôi ngióng-pân cho? Liá-sṳ khó-nèn voi sàng-cho ngài-têu chú-ngìn lâu chhiòn-kâ ke châi-nan. Ngài-têu ke chú-ngìn tông-ok, má-ngìn ke fa kì chhiòn m̀-thâng!”
[18] Oi-pí-kâi kón-kín yi-phi hó lióng-pak te piáng, lióng phì-thoi chiú, ńg-chak phoi-hó ke yòng, sṳ̍p-chhit kûng-kîn phoi-su̍k ke ma̍k-é, yit-pak te phù-thò-piáng, lióng-pak te vù-fâ-kó piáng, chhiòn-phu thia̍p chhai kí-chak lì-è ke poi-nòng táng,
[19] yèn-heu kì tui phu̍k-ngìn kóng: “Ngì-têu chhai thèu-chhièn hàng, ngài chhai heu-poi thèn.” Chúng-he kì mò chiông liá-sṳ lâu kiâ ló-kûng Nâ-pa kóng.
[20] Oi-pí-kâi khì-tén lì-è, chang thèn-tén sân-lu hâ-lòi ke sṳ̀, fut-yèn khon-tó Thai-ví lâu kì ke phu-ha chhai tui-mien hàng hâ-lòi.
[21] Thai-ví pún-lòi sióng: “Ngài cho-má-ke oi chhai liá khóng-yâ pó-fu ke-ngìn ke chhòi-sán, sṳ́ kì mò tiet-thet má-ke tûng-sî. Ngài án-ngiòng lâu kì then-sú, kì sa yung-ok po-san!
[22] Thiên-kông yî-chhièn, na-he ngài m̀ chiông kì só-yû ke se-lai-é chhṳ̀ chhiang-chhiang, ngien Song-ti ngiàm-ngiàm lòi chit-fa̍t ngài!”
[23] Oi-pí-kâi yit khon-tó Thai-ví, kón-kín tui lì-è ke poi-nòng táng hâ-lòi, phu̍k chhai thi-song khúi-pai,
[24] chhai Thai-ví kiok-chhièn kóng: “Thai-ngìn â, liá chhui-ko pûn ngài yit-sà lòi-khâi! Khiù ngì pûn ngì ke sṳ́-ńg tui ngì kóng-fa, khiù ngì kâm-ngien thâng sṳ́-ńg ke sot-mìn.
[25] Thai-ngìn â, chhiáng m̀-hó chhap Nâ-pa ke-chak fái tûng-sî; kì ke sin-chhìn lâu kì ke miàng khiung-yong, kì ôn-to Nâ-pa, kì cho ngìn chhiu-he ngong-é. Lun-tó ngài, thai-ngìn só phai-lòi ke phu̍k-ngìn to ke sṳ̀, ngì ke sṳ́-ńg mò chhai ke-vi.
[26] Thai-ngìn â, ki-yèn Song-chú mò-oi ngì chhîn-sú hiong thi̍t-ngìn po-sù, liù kì-têu ke hiet, liá-ha ngài chṳ́-tén yún-sên ke Song-chú, yu kám chhai ngì mien-chhièn fat-sṳ: Ngien ngì ke thi̍t-ngìn lâu só-yû sióng hoi ngì ke ngìn, chhiòn-phu chhiong Nâ-pa yit-yong su chit-fa̍t.
[27] Khiù thai-ngìn sû sṳ́-ńg tai-lòi ke lî-vu̍t, pûn-pûn ngì ke phu-ha.
[28] Ya khiù ngì sa-miên sṳ́-ńg ke m̀-chho̍k. Song-chú yit-thin voi sṳ́ ngì cho vòng, ngì ke heu-thoi ya voi cho vòng, yîn-vi thai-ngìn he vi Song-chú siông-chhṳ̀. Ngì yit-sên-ngìn m̀-voi cho má-ke m̀-chho̍k ke sṳ.
[29] Yû-ngìn sióng-oi kûng-kit ngì, chhṳ̀ ngì, Song-chú — ngì ke Song-ti voi pó-sú ngì, chhiu-chhiong ngìn pó-fu chṳ̂n-kui ke pó-vu̍t. Ngì ke thi̍t-ngìn, Song-chú voi vok-thet kì-têu, chhiu-chhiong ngìn yung fin sa̍k-é ke sok-è chiông sa̍k-é fin to yén-yén hi khiung-yong.
[30] Thai-ngìn â, Song-chú cheu Kì ke yin-hí vi ngì sṳ̀n-chhiu yit-chhiet hó-sṳ, sṳ́ ngì cho Yî-set-lie̍t-vòng ke sṳ̀-chiet,
[31] ngì chhiu m̀-voi yîn-vi vù-ku chhṳ̀-ngìn ya-he chhîn-sú po-sù kám-kok liòng-sîm put-ôn. Song-chú su-fuk pûn ngì ke sṳ̀-chiet, khiù ngì m̀-hó m̀ ki-tet ngì ke sṳ́-ńg.”
[32] Thai-ví tui Oi-pí-kâi kóng: “Song-chú — Yî-set-lie̍t ke Song-ti he yin-tông chhṳ̂n-siung ke! Yîn-vi Kì kîm-pû-ngit phai ngì lòi-kien ngài!
[33] Ngài vi ngì ke kien-sṳt lâu ngì kîm-pû-ngit só-cho ke yit-chhiet kám-chhia Song-chú, yîn-vi ngì sṳ́ ngài m̀-sṳ́ chhîn-sú po-sù, liù ngìn ke hiet.
[34] Ngài chṳ́-tén ke sṳ́ ngài m̀-sṳ́ sông-hoi ngì ke Song-chú — Yî-set-lie̍t yún-sên ke Song-ti ló-sṳ̍t kóng, na-m̀-he ngì kón-lòi kien ngài, Nâ-pa vuk-hâ só-yû ke se-lai-é chhai thiên-kông yî-chhièn chhiòn-phu voi sí chhiang-chhiang!”
[35] Só-yî Thai-ví sû-hâ Oi-pí-kâi tai-lòi ke lî-vu̍t, pin tui kì kóng: “Ôn-sîm chón-hi. Ngài voi cheu ngì kóng ke hi-cho.”
[36] Oi-pí-kâi chón-to Nâ-pa ke-vi, khon-tó Nâ-pa chhai vuk-hâ hióng-su yèn-si̍t, chhiu-chhiong vòng ke yèn-si̍t. Nâ-pa sîm-chhìn sóng-khoai, sṳ̍t-to tông-chui, só-yî Oi-pí-kâi ke am-pû mò lâu kì kóng só fat-sên ke sṳ,
[37] tén-to thi-ngi chêu-sṳ̀n Nâ-pa chhîn-siáng chang lâu kì kóng. Nâ-pa ngiàm-sṳ̀ sîm-chhong phiang fat-chok, vàn-chhiòn m̀-tî ngìn-sṳ.
[38] Sṳ̍p-ngit heu, Song-chú kit-tá Nâ-pa, kì chhiu sí-thet.
[39] Thai-ví thâng-kóng Nâ-pa sí-thet, chhiu kóng: “Chan-mî Song-chú! Kì vi ngài po Nâ-pa vú-yu̍k ngài ke yên-sù, yu sṳ́ ngài — kì ke phu̍k-ngìn mò cho m̀-chho̍k sṳ. Song-chú yîn Nâ-pa ke fái hàng-vì chit-fa̍t kì.” Ko mò kí-kiú, Thai-ví phai-ngìn hi lâu Oi-pí-kâi kóng, oi thó kì cho pû-ngiòng.
[40] Thai-ví ke phu̍k-ngìn to Kâ-me̍t kien Oi-pí-kâi, tui kì kóng: “Thai-ví phai ngài-têu lòi ngì liá-vi, kì sióng-oi thó ngì cho pû-ngiòng.”
[41] Oi-pí-kâi chhiu phu̍k chhai thi-song, kóng: “Ngài kâm-ngien cho kì ke sṳ́-ńg, sé ngài chú-ngìn ke-têu phu̍k-ngìn ke kiok.”
[42] Oi-pí-kâi ngiàm-sṳ̀ hong-hí-lòi, khì-sông kì ke lì-è, tai-tén ńg-ke sṳ́-ńg, lâu Thai-ví ke phu̍k-ngìn khiung-ha hi. Oi-pí-kâi chhiu cho Thai-ví ke pû-ngiòng.
[43] Thai-ví yí-kîn thó Yâ-sṳ̂-lie̍t-ngìn Â-hî-nôn, só-yî kì lióng-sà tû cho kì ke pû-ngiòng.
[44] Yî-chhièn cho Thai-ví ke pû-ngiòng, Só-lò ke moi-é Mí-kap, Só-lò chó chhiu chiông kì ka-pûn Kâ-lìm-ngìn Lâ-yi ke lai-é Pha-thì cho pû-ngiòng.