[1] Inkoo Seeri Lanaso kute, baryoti ibeenki oraate teebataas ka, Maariyati ilkerengeetti Magdaala ichoow Maariyati addan irteene, go'ddi Yeesso lakahawwaale sooyeyeen.
[2] Harra weyti sesseehte, a mehe hertoo Kamur goobi Waakhe katimiyye go'd iratte, daddaab 'dembeleeliite, daddaab sarche koorrommatte.
[3] Herta fooliche i'di ankhad u a ababa, darfohiche la a waha dakhane i'di yooleete.
[4] Iskarti meel yuubisso Herta Waakh karoorte nahtim ka hamarte sussuuhte.
[5] Herti Waakh wihi iche deyyeho itidah, “Roorro akhabina! A mehe saggi atin Yeessohi goorat massalaaba lakakaahe iyowattaan a gardaa.
[6] Inta ma kijiro, i'di goorat us yidah u, omoot a kasookahe. Kaaleya, inti goorat us jiife yeya.
[7] 'Deerka dowwa irda, abattitiis mehe itadeehiin ya, ‘Us omoot a kasookahe, ortiin ili Gaalilaaya a irta. Intaas ka la a agartaan.’ Toolla an a atin isoocheeke.”
[8] 'Deerka oboorri usuhi roorro khabo i'daasenyi hamaado go'd kabahe, oryeen abattitiissa icheekaanee.
[9] Chirraas on Yeesso icho 'hele, “Waakh ba nebey atin kakaala,” iyidah. Icho la soonyaameene, luhlohiis khabteene, usu wahteen.
[10] Yeesso 'deerka wihi us icho iyidah, “Roorro akhabina! Nyaama 'doo'di irummeeste wihi atin itadeehiin, ‘Gaalilaaya irda, intaas ka 'dee a iagartaan.’ ”
[11] Oboorri 'dulaayi, iskarti kootte hawwaal yaakhisso ilkerengeet goya iratte, kuhaaniyyohi wewween wihi yitah tuumman icheekte.
[12] Kuhaaniyyohi wewween ichoow ewweenki Ya'huud ba tossateene, iskar chasteene, chilimmeti buure siicheen.
[13] Wihi icho iyidaaheen, “'Doo'd mehe itadeehiin ya, ‘Abatti Yeesso ibeen u'durraayi timiyye sartiis hatte!’
[14] Chirri gaafana waha daage la, uus 'dee sina atin kawaarinne, nahe yeed tuumman haagginna, atin ribna.”
[15] Iskare 'deerka chilimme khaatte, wihi kootte yeela liiyidah yeesse. Yeedaas beenaate sartiisti lahate miinsan la ichoow uliba laka, yaafohi Ya'huud goyaka a sohta.
[16] Abattiti tomon ichoow koowe iratte hali goorat Yeesso boroofenhi Gaalilaaya ka idowdowe iratte.
[17] Chirri icho usu argeen ka, usu wahteene, i'daasenyi gaasichokoo usu kamalaleen.
[18] Yeesso la icho iyimiyye wihi us iyidah, “Serey ichoow harra ka anto tuumman a liisiiche.
[19] Maantaka nyaama 'doo'di harra tuumman abattiteey kayeela. Magah Aabba ka ichoow ki Weel ka ichoow ki Rubeyti Munyee ka baattissiya.
[20] Toro la amuri tuummane an atin ibahche abcha a raaheen. Rumanka la an a atin leejira ichoowka ibeenki 'da'ddaboot yateeh.”