[1] Inkoo gu'hassoo kuteen ka, Yoohanahi Enenyet Baattissiyo yimiyye, hidaaddi boroofenhi Ya'huudiya ka Yeedi Waakh cheeke.
[2] Wihi us yidah, “Uskeeliin kasoonokhda, i'di tahe dakhi goobi Waakh a soodowwaatee.”
[3] Yoohana a eti goorat eti Waákh íyeyyeedo Isaaya layadeeh ka lacheeke, “Etoo hidaad ka a rirriira, ‘Kamur jit imujjummoocha, jiti us leeyamiit ficcha,’” iche essa.
[4] Yoohana la gaaddiis tinti gaale lakahaaggiche, saabi us dabar kakhabe la niibe lakahaaggiche, gololiis la a gubaal ichoow malab.
[5] Enenyet ilkerengeetti weene Yeerusaleem ichoow boroofenhi Ya'huudiya tuumman ichoow ilkerengeetohi hawti Yoordane 'dusso idow tuumman kasoobahe, Yoohana iyimiyye, wihi us essi dagansate.
[6] Eti tuummane uskeeliis Waakh icheekte la, Yoohana hawti Yoordane 'dusso ka baattissiye.
[7] I'daasenyi Yoohana maanti us rabitti Farissaayo ichoow ti Sadukaayo ittaawenye iche laka baattissiyo timiy arge ka, wihi us iyidah, “Dessi toof! Ayyo atin tootooche 'dee holi Waakh dowwanoha ka keeno kafiriddaan?
[8] Taba gurnaanki saggi rumanka atin uskeel ikasoonokhatteen tuso dela.
[9] Taba la iisekkeysanna, ‘Aburaaham a aacchihaanya,’ eelanna. Wihi an atin icheeko, Waakh a geeddi us dagahta urgiyicho us nyaakhut nyaakhut Aburaaham kayeelo.
[10] Toolla laka Waakh i'di eti uroti geeyo hiiyyay khabaani goosso dahan kakhabuu, geeyohi gurnaanki haaggan idelin tuumman a goocha 'dab goya iseya.”
[11] Yoohana toro wihi us yidah, “Ani atinhi tuummane uskeeliin kasoonokhatteen, bicche atin kabaattissiya. I'daasenyi etoo 'dubeey ka yamiit weyti ikaweenyahe, ortiis ka walah an ahe mele, kobtiis laka sinnaan ma mu'dan. Us Rubeyti Munyee ka ichoow 'dab ka a atin baattissiya.
[12] Birtiisti gurnaan lakahafaricho, dahane kakhaba. Inti gurnaan lakatumo hara, 'dargaayyetiis koondi kichiba, urfo la 'dabi jirtuu ijitin goya kichiba.”
[13] Saahka Yeesso boroofenhi Gaalilaaya kayimiyye, hawti Yoordane 'dusso ka Yoohana iyimiy, 'dee Yoohana usu baattissiya.
[14] I'daasenyi Yoohana usuhi Yeessó jeycho 'doona wihi us iyidah, “Ati kootte incheenka ani ibaattissita, a i'doh ani ikatamiit?”
[15] I'daasenyi Yeesso wihi us ilaabe, “Toolla i'da on a titaahe. A mujjum chi'inno i'da yeello, 'dee mali fissane Waakh buuhinno.” Yoohana 'deerka wihi Yeesso iyidah ayyiche, baattissiye.
[16] Yeesso uus labaattissiye, chirraas on bicche goya kasoobahe. Chirraas on sereye bakkaahte, ulla Rubeyti Waakhe i'di kutukuurrug u sooyegto sartiis koorrommatti arge.
[17] Hooyoo la serey kasooyeede, wihi us yidah, “Waha a Weeleeyki an weyti 'doono, weyti ikahamaadicho.”