[1] Maalinkaas goya, Yeesso minki us kajire kabahe, irte beyti Gaalilaaya afiche orronte.
[2] Ururi Yeesso khaariche weyti buuraate, 'deerka koobanhoo kore goya koorronte, enenyet la bey afiche tolossate dagansate.
[3] Ulla mammaho ka wihi buure abche, wihi us yidah, “Etoo gos khabo, a irte ilmo harra kachibaa.
[4] Ilmoha us taa'hicho gaasoo jit goya kadiheene, chimbiro la yimaateene, yumheen.
[5] Gaasoo la ilassi ng'aajjeenye harrati rucchul khabto kadiheen. Wahaas dowwa on soobaheen, a mehe harra rucchulee.
[6] I'daasenyi chi' orrahe soobahte ka, orrahe geeyohaas soobahe gubte. Hiiyyaye laa yihiin gone angageen.
[7] Gaasoo laka inti geeyohi rurrucchule kudah khabo kadiheen. Geeyohaas la geeyohi soobahe afcheen.
[8] Gaasoo la inti harrati haaggan khabto kadiheene, gurnaan deleen. Gaasoo kol kudoo deleene, gaasoo kol tomon lih deleene, gaasoo la kol tomon seyyah deleen.
[9] Eti dogo khabo a daago gi'de!”
[10] Abatti Yeesso itimiyye, wihi iche usu worsatte, “At a i'doh chirri at 'doo'd walah abisso mammaho ikaayyeedda?”
[11] Yeesso la wihi us ilaabe, “Waakh garanti wihi dagsane dakhi goobi Waakh miinsan lagarti a atin siiche. I'daasenyi 'doo'di addan i'daas mee.
[12] Eti tuummane wihi dahan lagesse mujjum woywoye a liikakhaya ichoowka wihi us khabo buuraataan. I'daasenyi eti wihi dahan lagesse mujjum iwoywoyin, wihi us khabo laka a lakakhaata.
[13] Jeentetane icho mammah ka walah ikacheeka. “Walah a yeyaane eheet a ma argaan, wihi an eldi a daagaane eheet a ma abtaan.
[14] Wori eti Waákh íyeyyeedo Isaaya layadeeh cheeke icho ka a labuuhiche. “‘Atin walah a dagansattaane, dagansattaane, i'daasenyi jirtuu ma abattaan. Walah a yeytaane, yeytaane, i'daasenyi jirtuu ma atin gelaan.
[15] A mehe 'doo'da uurassicho a ga'daale, dogohicho la a 'duu'deene, toro la indohicho laka a 'duu'deen. Chi'iche i'daas ieheynan, indohicho a geeddi icho il argaane, dogo la khabaane, uurassicho la a geeddi icho walah abtaane, a geeddi icho ani isoourgiyaane anna samaacho.’
[16] I'daasenyi Waakh indohiin a imaale a mehe il a argaane, dogohiin la walah a daagaan.
[17] Rume atin icheeka, 'doo'di ittaawenye Waákh íyeyyeedo ichoow 'doo'di ittaawenye Waakhe fiffissan, wihi toolla atin agartaan argin a imooneene, i'daasenyi ma argin. Wihi atin toolla daagtaan daagin a imooneene, i'daasenyi ma daagin.”
[18] “Mammahti eti ilmo harra kachibo wihi iche miinsantahe dagansada gi'de.
[19] Chi' etoo wori dakhi Waakh miinsan daago toro la wihiis iaban, Seytaanki uskeel leh a yamiite, woraas icho daageen uurassicho kabahcha. Waha a ilmohi jit lakachibo.
[20] 'Doo'd gaasoo a i'di ilassi ng'aajjeenye harrati rucchul khabo. Ilmohi harrata kadihe a i'di eti uus Yeedi Waakh daago hamaadi buure ka khaatti.
[21] I'daasenyi hiiyyay us khabo mele, mujjum ma tolossati. Maanti jeenteti Yeedi Waakh u sinatoo isoobahte ommos sina loomhiche dowwa on soodiha.
[22] 'Doo'd gaasoo a i'di inti geeyohi rurrucchule kudah khabto. Ilmohi harrata kadiho a i'di eti Yeedi Waakh daago, raaho, i'daasenyi wa'dwaa'di harrata ichoow 'damaanki kamurroon ba afchaane, gurnaan icho delaan mele.
[23] 'Doo'd gaasoo a i'di inti harrati haaggan khabto. Ilmohi harrata kadiho a i'di eti Yeedi Waakh daago toro abti. Ulla gurnaan kol kudoo ommos kol tomon lih ommos kol tomon seyyah geeddi il lakachibe 'dirihiissa dela.”
[24] Yeesso mammahtoo addan 'doo'd ibahche, wihi us iyidah, “Dakhi goobi Waakh a i'di etoo gos khabo irte gosiis 'dargaayyeti haaggan kachibe.
[25] I'daasenyi ibeenkoo ka geeddi enenyet tuumman ur'do, chiiytaankiiskoo yimiyye ilmohi haraameet, gosaas 'dargaayye goya kachibe, katabe.
[26] Chirri 'dargaayye soobahte gurnaan bissaate ka, haraame laka soobahte.
[27] “Ilbooyyeti eti gos leh timiyye, wihi iche tidah, ‘Kamur, at goorat ilmohi hahhaaggan gosaah goya ma kachibina? Haraanta gos goya kasoobahte la a tohe?’
[28] “Eti gos leh la wihi us ilaabe, ‘Chiiytaankoo i'daas yeele.’ “Ilbooyye la wihi iche worsatte, ‘A iranna haraantaas gos goya kasoobahte soobbukkhinna?’
[29] “Ulla wihi us ilaabe, ‘Mele, chirri atin haraam soobukkhissaan a geeddi atin 'dargaayye laka leesoobukkhissaan.
[30] Lammacho ba 'diicha a isleebaheene ichoowka ibeenki gurnaan lagoocho. Anna ibeenkaas ka 'doo'di gurnaan goocho wihi icho yeelaan a icheeka. Koloo haraam soobbukkhicha, koobbino ka iskaahhida, 'dee a lagubo. 'Dargaayye la soogoocha koondiheey kichiba.’ ”
[31] Yeesso toro icho mammahtoo addan icheeke, “Dakhi goobi Waakh a i'di ilinti weyti rucchule, etoo khaate gosiis goyaka il gesse.
[32] Ilinta a ilinti ilmo tuumman goyaka weyti rucchul. Eheetteey laka maanti iche soobahte, gos goyaka geeyi geeyo tuumman kabuurenye tateehe, 'dee chimbirohi saraat yamiitiine liikhimohiis kafiddiyaan.”
[33] Yeesso toro mammahtoo addan ibahche, “Dakhi goobi Waakh a i'di booddati makaate fuurisso makhaabassoo wohoor khaatte, ingangaanoti buure kakhayte ichoowka ingangaano tuumman fuurte.”
[34] Yeesso urur waha tuumman mammaho ikacheeke. Enenyet mammah on menye, wohoo addan walah ma kaabin.
[35] 'Deerka wihi goorat eti Waákh íyeyyeedo ka lacheeke labuuhiche. “Chirri an icho leeyeyyeedo, a imammahda, wahanyeyyohi uus an harra soouume dagsaneet icheeka.”
[36] Yeesso 'deerka urur katabe min gele, abattitiis la itimiyye wihi iche itidah, “Wihi mammahti haraameet miinsantahe nah isoocheek.”
[37] Yeesso wihi us ilaabe, “Eti ilmohi haaggane 'dargaayye gos kachibe a Ínam Aadam.
[38] Gos la harra itoolla, ilinti haaggan la 'doo'di dakhi Waakhe itolossa, haraame la a nyaakhuti ki uskeel leh.
[39] Chiiytanki haraam gos kachibe la a Seytaan. Gurnaanki lagoocho la ibeenki yomboote tusa, 'doo'di gurnaan goocho la a herti Waakh.
[40] “Saggaas haraam liibukkhicho 'dab ka liigubo, ibeenki yomboot laka i'daas on yateeh.
[41] Ínam Aadam hertiis a sooerga, iche la 'doo'di tuummane enenyet uskeel kalug'do ichoow ki hugun'darri kaassohti tuumman dakhiis goya kabahchaan.
[42] Herta Waakh la 'dab goya kalugu'dda. Intaas ka la ooyaane ilko iskarobaan.
[43] 'Deerka 'doo'di fiffissan la goob Aabbahicho goyaka i'di banayhi orraheet u a ababa. Eti dogo khabo, a daago gi'de.”
[44] “Dakhi goobi Waakh a i'di wohoo weyti gato miigenye gos goya lakadagche. Etoo chu'us soosuune ka, toro dagche. Eta hamaad ka irte wihi us khabo tuumman ororiche gosaas gatte.
[45] “Toro dakhi goobi Waakh a i'di daakki weyti gato miigenye eti bacchaarti yowti.
[46] Chirri us daakkoo weyti gato miige 'hele ka irti wihi us khabo tuumman ororicho daakkaas soogatti.
[47] “Toro dakhi goobi Waakh a i'di oroohti bahag lakakhabti bey liiseye, bahaggi fil ittaawe sookhabatti.
[48] Chirri oroohtaas buuhsante ka 'doo'di bahag khabti bey afiche isoobahcho. 'Deerka orronti, bahaggi hahhaaggan enjelle kachibo, i'daasenyi ki sussuuje rogo.
[49] Ibeenki yomboote Waakh enenyet tuumman hukkumo laka i'daas on tateeh. Herti Waakh a tamiite 'doo'di uskeel yeele ichoow ki fiffissan ba seley saahta.
[50] Ki uskeel yeele 'dab goya kachibta, intaas ka la weyti ooyaane ilko iskarobaan.”
[51] Yeesso la wihi us abattitiis worsate, “Atin waha tuumman a abatteen on a?” Icho la wihi icho ilaabeen, “Aa.”
[52] Wihi us iyidah, “Maantaka eti tuummane tagaanki amurreenye wihi dakhi goobi Waakh miinsan laabche a i'di eti minki us walah gessati ka wihi husub ichoow wihi raagan soobahcho.”
[53] Yeesso inkoo us mammahtaas massiche ka intaas katabe.
[54] Chirra us ilkerengeetti goobicheenye Naasaret yimiy ka, minki weysiite Ya'huud ka enenyet Yeedi Waakh abin sookhabte, icho la girmeesteene, “Us eta kharata ichoow miigta us waha weeli enenyet yeelin iubaa'dan kayeelo intoh ka'hele?” worsateen.
[55] “Us eta aabbahiis eti tagaanki kho'doommee menya? Magah abartiis Maariya menya? Yaakoobo ichoow Yuussuf ichoow Siimon ichoow Yuuda la walaalinyetiis menya?
[56] Albehi leedesse tuumman goyteen ma kijiro? Eta 'deerka waha tuumman intoh ka'hele?”
[57] Icho la usu 'dii'deen. I'daasenyi Yeesso wihi us icho iyidah, “Eti Waákh íyeyyeedo, 'doo'di goobicho ichoow 'doo'di yaaftiise kalday on iinkaanyitin.”
[58] Ulla jeenteti icho usu ikakhuufin u, intaas ka wihi weeli enenyet yeelin iubaa'dan wohoo rucchul on yeele.