[1] Yeesso toro wihi us 'doo'd iyidah, “Chirri atin 'doo'd haag iyeessaan, wahaas saggoo 'dee enenyet atin ikoolicho iiyeelina. Chirri atin i'daas yeessaan Aabbahiinki serey jiro kala'd us atin guto mele.
[2] “Maantaka kolbaaw at etoo miskiine wohoo siisso, enenyet iistuttusin i'di orran 'doo'di iskaayyeelo minassi weysiite Ya'huud ichoow jitat ka yeelo 'dee 'doo'd iinkaanyituu. Rume atin icheeka, icho kala'ddicho tuum a 'heleen.
[3] I'daasenyi geedda at etoo miskiine wohoo siisso, uus etoo kalday laka saggi at isiisse garanne,
[4] 'dee wihi at siisso dagsi on a eheetti. 'Deerka Aabbahaahki wihi dagsi ka layeelo argo, kala'd a kiguta.
[5] “Kolbaaw atin weysattaan, i'di 'doo'di iskaayyeelo iitaahana. I'di tahe icho wihi icho 'doonaan, a ichohi minassi weysiite Ya'huud ichoow inti enenyet tuumman kaargo ka tolossati weestaane, 'dee 'doo'd tuumman saa'do. Rume atin icheeka, icho kala'ddicho tuum a 'heleen.
[6] I'daasenyi kolbaaw at weysatti, meessi liikaargin gele, Aabbahaahki indo ka liiargin waho, 'dee Aabbahaahki wihi at dagsi ka yeesso argo kala'd a kiguto.
[7] Kolbaaw atin weysattaan la i'di 'doo'di Waakh igaran yeeluu, yeedassi ittaawenye indigir laa eelanna. Wihi tahe icho kol waakkhassicho jeenteti yeedassaas ittaawe u weysihicho daagaane koogyahiin.
[8] Saggi icho iweestaan iiweysanna, wihi tahe, Aabbahaah wihi at 'doonto geeddi at isooidaahan laka a garta.
[9] “Cha'atin weysattaan, sagga iweesda, “‘Aabbaheenyoki serey jiro, magahaahki munyee a liinkaanyito.
[10] At ba enenyet tuumman dakhatta. Saggi goobaah ka in at 'doonto liiyeeluu, harrata ka laka in at 'doonto a layeelo.
[11] Gololeenyoki maan dakkhan nah sii.
[12] Uskeeli nah yeelle nah ikakut, saggi nah laka 'doo'di uskeel nah iyeele uskeel ikakunnuu.
[13] Kajmeti uskeel nah kalugu'ddo nah kajeyiche, i'daasenyi Seytaanki uskeel leh nah karib!’
[14] A mehe cha'atin 'doo'di uskeel atin iyeele uskeel ikakuttaan, Aabbahiinki serey jiro laka uskeeliin a atin ikakuta.
[15] I'daasenyi chirri atin 'doo'di uskeel atin iyeele uskeelaas ikakutin, Aabbahiin uskeeliin ma atin ikakuto.
[16] “Kolbaaw at af hidatti, i'di 'doo'di iskaayyeeluu fool ariboon. A mehe icho fool a dakhnaata, 'dee saggi icho af ihiiteen tusaan. Rume atin icheeka, icho kala'ddicho tuum a 'heleen.
[17] I'daasenyi geedda at af hidatti subakki geeyi oolif matah kasubho, foolaah dikho,
[18] 'dee 'doo'di addan menye, Aabbahaahki indo ka liiargin kalday on saggi at af ihidatte a abti, 'dee Aabbahaahki wihi dagsi ka layeelo argo, kala'd a kiguto.
[19] “Kamurroonkiin harrata ka meel iisigelinna. A mehe inta ka gubaal ichoow kuuttu a suujaachaane 'doo'di walah hato la min a jebcha hata.
[20] I'daasenyi goobi Waakh ka kamurroonkiin meel isigessa. Intaas ka gubaal ichoow kuuttu ma suujaachaane, toro la 'doo'di walah hato min ma jebchaane ma hataan.
[21] A mehe inti kamurroonkaah kajiro, iche uuraah laka kajira.
[22] “Ile i'di taa u sar banaye ikeenta. Chirri indohaah haagganyahiin sartaah tuumman banaye buuha.
[23] I'daasenyi chirri indohaah suujyahiin sartaah mug'di buuha. 'Deerka chirri banayhi at khabto lajicche at mug'dihi reebenye goya kijirta.
[24] “Et kamur lamma ifalo mele. A mehe koo a 'dii'dda ki addan la 'doonta, toro la koo inkaanyitta ki addan la 'darraawta. Waakh ichoow chilimme ba koloo kalday ma ifasso.
[25] “Maantaka wihi an atin iadeeh, jirotiin akawa'dwaa'dina, wihi atin tamhiin ommos wihi atin dantaan, ommos sartiin ka wihi atin gessattaan. Jiro golol ma kussan a? Sare la gaad ma kussan a?
[26] Chimbirohi saraat kamalda bal. Ilmo icho gos kachibaan mele, gurnaan bissaate icho meel gessataan la mele. I'daasenyi Aabbahiinki serey jiro on goollicha! Atin icho weyti kussantahiin gon.
[27] Etiinkoo maanta wa'dwaa'di us wa'dwaa'do ka jirotiis saha'ddoo kalday kakhayaayi?
[28] “A i'doh jeenteti gaadeet u wa'dwaa'd ikhabtaan? Bal fiikhti bahto yeya. Hil iche haaggisso gaad isikayowatti mele.
[29] I'daasenyi wihi an atin iadeeh, karnati goorat Soolomon layadeeh laka, kamurroonkiis tuumman khabaayi, gaaddiis geeddi fiikhta ma haaggan.
[30] Chirri Waakh hoosi keley baho, toolla jiro saahta 'dab lakalug'do gaado, atin geeddaas 'dirihiis weyti ma atin gaado? Atin eenna geeddoo rucchul on Waakh kakhuuftaane!
[31] 'Deerka awa'dwaa'dina, ‘Mehe numhe?’ eelanna, ommos, ‘Mehe nubhaabe?’ eelanna, ommos ‘Mehe gessanni?’ eelanna.
[32] I'di tahe 'doo'di Waakh igaranne wahanyeyyohaas kaalloo'da. Aabbahiinki serey jiro saggi atin waha dakkhan i'doontaan a garta.
[33] I'daasenyi koloo dakhi Waakh ichoow fissanoonki Waakh 'don'doon, ulla wahanyeyyoha dakkhan a ikaasookhayaa.
[34] Maantaka wihi at saahta 'doonto akawa'dwaa'din. I'di tahe maane ba wihicheki lakawa'dwaa'do a khabta. Walah at sinati ibeen ba keeno sinatoo addan ikakhayto mele.